ޔާމީނުގެ އިސްތިއުނާފީ ޝަރީއަތުގެ އަޑުއެހުންތައް ނިންމާލައިފި، ރިސެސްގެ ކުރިން ޙުކުމް ކުރައްވަނީ

ކުރީގެ ރައީސް ޔާމީން އަބްދުލްގައްޔޫމްގެ މައްޗަށް އިއްވާފައިވާ ހުކުމާ ގުޅިގެން ސުޕްރީމް ކޯޓުގައި އިސްތިއުނާފް ކޮށްފައިވާ މައްސަލައިގެ އަޑުއެހުންތައް ނިންމާލައިފިއެވެ.

މި މައްސަލައިގެ އަޑުއެހުންތައް އެންމެ ފުރަތަމަ ސުޕްރީމް ކޯޓުގައި ފަށާފައިވަނީ މިދިޔަ ސެޕްޓެމްބަރު މަހުގެ 12 ވަނަ ދުވަހުއެވެ. މި މައްސަލައިގައި ރައީސް ޔާމީނުގެ ފަރާތުން22އިސްތިއުނާފީ ނުކުތާއެއް ހުށައަޅާފައިވާއިރު، ތަފްސީލީ ގޮތެއްގައި އިސްތިއުނާފީ ނުކުތާތަކަށް ދެފަރާތުން ވާހަކަ ދައްކާފައިވެއެވެ.

އޭގެ އިތުރުން، އަޑުއެހުންތައް ކުރިއަށް ދިޔައިރު، ރައީސް ޔާމީނުގެ ފަރާތުން 3 ކަމެއް ހުށައަޅުއްވާފައިވެއެވެ. އެއީ އެމަނިކުފާނުގެ ޙުކުމް ތަންފީޒު ކުރުން ފަސްކޮށްދިނުމުގެ އަމުރެއް ނެރެދެއްވުމާއި، ކަފާލާތުގެ ދަށުން ދޫކޮށްލެއްވުމުގެ އިތުރުން، އައުހެކިތަކެއްހުށައެޅުއްވުމެވެ. މި ކަންކަމަށް ތަފްސީލީ ގޮތެއްގައި ޔާމީނުގެ ފަރާތުންނާއި، ދައުލަތުން ވާހަކަ ދައްކާފައިވާއިރު، އަންގާރަ ދުވަހު ވަނީ އެކަމަށް ގޮތެއް ނިންމަވާފައެވެ. އެގޮތުން ޖަލު ޙުކުމް ތަންފީޒު ކުރުން ފަސްކޮށްދިނުމާއި، ކަފާލާތުގެ ދަށުން ދޫކޮށްލުމުގެ އަމުރެއްނެރެދެވެންނެތްކަމަށް ސުޕްރީމް ކޯޓުގައި މި މައްސަލަ ބެއްލެވި 3 ފަނޑިޔާރުންގެ އިއްތިފާޤުން ވަނީ ނިންމަވާފައެވެ.

އެހެންނަމަވެސް، ޙުކުމުގައި ހިމެނޭ ޖޫރިމަނާ ފައިސާ ހޯދުން ފަސްކޮށްދިނުމުގެއަމުރެއްސުޕްރީމް ކޯޓުން ނެރެދެއްވާފައިވެއެވެ. އެގޮތުން 3 ފަނޑިޔާރުންގެ އިއްތިފާޤުން ނިންމަވާފައިވަނީ ޔާމީނުގެ ޙުކުމުގެ ފައިސާ ހޯދުމުގެ ކަންކަން އެއްވެސް ކޯޓެއްގައި ކުރިއަށް ގެންގޮސް ގޮތެއް ނިންމަވައިފިނަމަ، ސުޕްރީމް ކޯޓުގައި މިހާރު ކުރިއަށްދާ އިސްތިއުނާފު މައްސަލައަށް އޭގެ އަސަރު ކުރާނެ ކަމަށެވެ. ވުމާއެކު ޖޫރިމަނާ ފައިސާ ހޯދުމުގެ ގޮތުން އެއްވެސް ކޯޓެއްގައި އަދި ދައުލަތުގެ އެއްވެސް އިދާރާއެއްގައި މައްސަލައެއް ކުރިއަށް ނުގެންދިއުމަށް ސުޕްރީމް ކޯޓުން ވަނީ ދައުލަތުގެ އިދާރާތަކުގެ މައްޗަށް އަންގައި އަމުރުކޮށްފައެވެ.

އެއަށްފަހު އަންގާރަ ދުވަހު ވަނީ މި މައްސަލައިގައި ރައީސް ޔާމީނުގެ ފަރާތުންނާއި، ދައުލަތުގެ ފަރާތުން މައްސަލައާ ގުޅޭގޮތުން ޚުލާސާ ގޮތެއްގައި ވާހަކަ ދެއްކެވުމަށް ފަހު ފުރުސަތެއް ދެއްވައި، އަޑުއެހުންތައް ނިންމަވާލައްވާފައެވެ. ދެން މި މައްސަލައިގައި އޮންނާނީ ގޮތެއް ނިންމުމަށް ބާއްވާ އަޑުއެހުމެވެ. ފަނޑިޔާރު މަހާޒް ވަނީ ޙުކުމް ކުރައްވާއިރު ދެފަރާތުން ފާހަގަކުރެއްވި ހުރިހާ ކަމަކަށް ވެސް ރިއާޔަތް ކުރައްވާނެކަމަށް ވިދާޅުވެފައެވެ.

ފަނޑިޔާރު މަހާޒް އިތުރަށް ވިދާޅުވީ، ކޯޓު ރިސެސަށް ދާން 56 ދުވަސް އެބައޮތް ކަމަށާއި، ރިސެސަށް ދިއުމުގެ ކުރިން މައްސަލަ ނިންމެވުމަށް މަސައްކަތް ކުރައްވާނެ ކަމަށެވެ. އަދި މި ވަގުތުގެ ތެރޭގައި މައްސަލަ ލަސްވެދާނެ ފަދަ އެއްވެސް ކަމެއް ނުކުރެއްވުމަށް ފަނޑިޔާރު ވަނީ އިލްތިމާސް ކުރައްވާފައެވެ.

ސުޕްރީމް ކޯޓުގައި މި މައްސަލަ ބައްލަވާ ފަނޑިޔާރުންގެ މަޖިލީހުގައި ހިމެނިވަޑައިގަންނަވަނީ ފަނޑިޔާރު މަހާޒް ޢަލީ ޒާހިރާއި ފަނޑިޔާރު ޑރ. އަޒްމިރާލްދާ ޒާހިރާއި ފަނޑިޔާރު ޑރ. މުހައްމަދު އިބްރާހީމްއެވެ.