ދުނިޔޭގެ ބޮޑީބިލްޑިން މުބާރާތުން ރާއްޖެއަށް ދެ ރިހި މެޑަލް

އުޒްބެކިސްތާނުގެ ވެރިރަށް ޓަޝްކެންޓުގައި ކުރިއަށްދާ 12 ވަނަ ވޯލްޑް ބޮޑީބިލްޑިން އެންޑް ފިޒީކް ސްޕޯޓްސް ޗެމްޕިއަންޝިޕް 2021 އިން ރާއްޖޭގެ މުޙައްމަދު މޫސާ އާއި މުޙައްމަދު ރަޝީދު ރިހި މެޑަލް ހޯދައިފިއެވެ.

އަންނަ ބުރާސްފަތި ދުވަހުގެ ނިޔަލަށް ކުރިއަށްދާ މި މުބާރާތުގައި ރާއްޖޭގެ ހަ ބޮޑީބިލްޑަރުން އަންނަނީ ވާދަކުރަމުންނެވެ. އެއީ މުޙައްމަދު މޫސާ އާއި މުޙައްމަދު ރަޝީދުގެ އިތުރުން، އަޒްނީން ރަޝީދާއި، ހުސެއިން ހިމްޔާނާއި، ފަތުހުﷲ މުޙައްމަދު އަދި އިބްރާހީމް ނަބީލެވެ.

މި މުބާރާތުން މުޙައްމަދު މޫސާ ރިހި މެޑަލް ހޯދާފައިވަނީ 55 ކިލޯގެ ސީނިއާ މެންސް ބޮޑީބިލްޑިން ކެޓަގަރީންނެވެ. މި ފަހަރުގެ މުބާރާތުން މުޙައްމަދު މޫސާ ރިހި މެޑެއްޔެއް ހޯދިއިރު، ދެކުނު ކޮރެއާގައި 2019 ވަނަ އަހަރު ބޭއްވި 11 ވަނަ ވޯލްޑް ބޮޑީބިލްޑިން އެންޑް ފިޒީކް ސްޕޯޓްސް ޗެމްޕިއަންޝިޕުގައި އޭނާ ވަނީ ހަމަ މި ކެޓަގަރީން ލޯ މެޑެއްޔެއް ހޯދާފައެވެ.

މީގެ އިތުރުން މި ފަހަރުގެ މުބާރާތުގައި ރާއްޖޭގެ މުޙައްމަދު ރަޝީދު ރިހި މެޑަލް ހޯދީ 65 ކިލޯގެ ސީނިއާ މެންސް ބޮޑީބިލްޑިން ކެޓަގަރީގައި ވާދަކޮށްގެންނެވެ. މިއީ ބައިނަލްއަގުވާމީ މުބާރާތާކުން މުޙައްމަދު ރަޝީދު ހޯދި ފުރަތަމަ މެޑެއްޔެވެ.

ޓަޝްކެންޓުގައި ހުންނަވާ "ރާއްޖެ.އެމްވީ" އަށް ދެއްވި އިންޓަވިއުއެއްގައި ރާއްޖޭގެ ބޮޑީބިލްޑިިން ފެޑެރޭޝަން (ބީބީއޭއެމް) ގެ ރައީސް އިބްރާހީމް ހަމީދު (އިއްބެ) ވިދާޅުވީ މިއީ ކުޑަ ދުވަސްކޮޅެއްގެ ތަމްރީނުތަކަށްފަހު ލިބުނު ކާމިޔާބީއެއް ކަމަށާއި، މި ކާމިޔާބީ ހޯދުމަށް އެތުލީޓުން ވަރަށް ރަނގަޅު މަސައްކަތްތަކެއް ކޮށްފައިވާ ކަމަށެވެ. އަދި މި ކާމިޔާބީއަށް ވާސިލުވުމުން ސަރުކާރާއި ކުޅިވަރާ ބެހޭ ވުޒާރާއިން ވެ ދެއްވި އެހީތެރިކަމަށް ޝުކުރުއަދާކުރާ ކަމަށްވެސް ވިދާޅުވިއެވެ.

އިއްބެ އިތުރަށް ވިދާޅުވީ މި ފަހަރުގެ ދުނިޔޭގެ ބޮޑީބިލްޑިން މުބާރާތުން ލިބުނު ކާމިޔާބީތަކާއެކު، ބޮޑީބިލްޑިންގެ މުސްތަގުބަލު އުޖާލާވެއްޖެ ކަމަށާއި، އަދި މިއީ ބައިނަލްއަގުވާމީ މައިދާނުގައި އިތުރު ކާމިޔާބީތައް ހޯދަން ލިބިގެންދިޔަ ހިތްވަރެއް ކަމަށެވެ. އެހެންކަމުން ގަދައަޅައި، ރަން ވަނަތައް ހޯދުމަށް އެތުލީޓުން މަސައްކަތްކުރާނެ ކަމަށްވެސް އިއްބެ ވަނީ ވިދާޅުވެފައެވެ.

މި އަހަރުގެ ދުނިޔޭގެ މުބާރާތުގައި ރާއްޖޭގެ ހަ ބޮޑީބިލްޑަރުން ވާދަކުރަމުން އަންނައިރު، މި މުބާރާތުގައި ވާދަކުރާ ގައުމީ ޓީމު އެކުލަވާލާފައިވަނީ މި އަހަރުގެ ޖުލައި މަހުގެ 16 ވަނަ ދުވަހު ބޭއްވި ސިލެކްޝަނުންނެވެ.