ޔާމިނުގެ ޝަރީއަތް: ޙުކުމް ތަންފީޒުކުރުން ފަސްކުރުން، ކަފާލާތު އަދި އައު ހެކިތަކަށް ގޮތެއް ނިންމެވުން މާދަމާ
ކަފާލާތާއި، ޙުކުމް ތަންފީޒު ކުރުން ފަސްކޮށްދިނުމާ ގުޅޭ 2 ހުށަހެޅުމެއްވޭ
ރައީސް ޔާމީނުގެ ޖަލު ހުކުމުގެ އިސްތިއުނާފު އަޑުއެހުން ސުޕްރީމް ކޯޓުގައި ކުރިއަށްދަނީ
މަނީ ލޯންޑަރިން ގެ ކުށް ސާބިތުވެ، ޖަލު ޙުކުމެއް ތަންފީޒު ކުރައްވަމުން ގެންދަވާ ކުރީގެ ރައީސް އަބްދުﷲ ޔާމީނުގެ ފަރާތުން އެ މައްސަލައިގެ ޙުކުމް ތަންފީޒު ކުރުން ފަސްކޮށްދިނުމާއި، ކަފާލާތުގެ ދަށުން ދޫކޮށްލެއްވުމަށް އެދި ސުޕްރީމް ކޯޓަށް ހުށަހެޅުއްވި ހުށަހެޅުންތަކާއި، އައު ހެކިތަކާ ގުޅޭގޮތުން އަންގާރަ ދުވަހު ގޮތެއް ނިންމަވާނެކަމަށް މައްސަލަ ބައްލަވާ ފަނޑިޔާރުން ވިދާޅުވެއްޖެއެވެ.
ރައީސް ޔާމީނުގެ ފަރާތުން ހޯމަ ދުވަހުގެ އަޑުއެހުމުގައި ވަނީކަފާލާތާއިޙުކުމް ތަންފީޒުކުރުން ފަސްކޮށްދިނުމުގެ އަމުރަކަށް އެދޭ ސަބަބުތަކާ ގުޅޭގޮތުން ވާހަކަ ދައްކަވާފައެވެ. އަދި ޙުކުމް ތަންފީޒު ކުރުން ފަސްކޮށްގެން ދައުލަތަށް ލިބޭނެ ގެއްލުމެއް ނެތްކަން ޔާމީނުގެ ވަކީލު ފާހަގަ ކުރެއްވިއެވެ. އެ ކަންކަމަށް ދައުލަތުން ވެސް ވަނީ ރައްދު ދެއްވާފައެވެ.
އޭގެ އިތުރުން، ރައީސް ޔާމީނުގެ ފަރާތުން ހުށަހަޅަން ބޭނުންވާ އައު ހެކިތަކާ ގުޅޭގޮތުން ޚުލާސާ ގޮތެއްގައި ވާހަކަ ދެއްކުން ވެސް ހޯމަ ދުވަހުގެ އަޑުއެހުމުގައި ކުރިއަށް ގެންގޮސްފައިވެއެވެ. ޔާމީނުގެ ފަރާތުން އައު ހެކިތަކެއްގެ ގޮތުން ކުރީގެ ޓޫރިޒަމް މިނިސްޓަރ އަހުމަދު އަދީބުގެ ވީޑިއޯ ރެކޯޑިންގ އަކާއި، ޝަފަހީ 2 ހެކިން ކަމަށްވާ މުޙައްމަދު އިސްމާއިލް އަދި މުޙައްމަދު ޝާހިދުގެ އިތުރުން، އޭސީސީގެ ކުރީގެ ނާއިބުރައީސް މުއައްވިޒު ރަޝީދުގެ އަޑުކަމަށް ބަޔާންކޮށްފައިވާ އޯޑިއޯއަކާއި، އޭސީސީގެ ކުރީގެ ރައީސް ޙަސަން ލުތުފީގެ ފަރާތުން ހެކިބަސް ދެއްވަން އިންކާރުކުރައްވައި ކްރިމިނަލް ކޯޓަށް ފޮނުއްވި ސިޓީއެއް ހިމެނެއެވެ.
މި ހެކިތައް ބަލައިގަތުމާ ގުޅޭގޮތުން ގޮތެއް ނިންމެވުން ވެސް އަންގާރަ ދުވަހުގެ އަޑުއެހުމުގައި އޮންނާނެކަން ފާހަގަ ކުރައްވައި ފަނޑިޔާރު މަހާޒް އަލީ ޒާހިރު ވިދާޅުވީ، އެއަށްފަހު ދެފަރާތަށް ޚުލާސާ ގޮތެއްގައި ފަހު ވާހަކަތައް ދެއްކެވުމަށް ފުރުސަތު ދެއްވައި މައްސަލައިގެ އަޑުއެހުންތައް ނިންމަވާލައްވާނެ ކަމަށެވެ.
އެމްއެމްޕީއާރުސީގެ ހިޔާނާތުގައި ހިމެނޭ، ރިސޯޓެއްގެ ގޮތުގައި ތަރައްގީކުރުމަށް ކުއްޔަށް ދޫކުރި ގއ. ވޮޑުމުލާގެ އިކުއިޒިޝަން ކޮސްޓްގެ ގޮތުގައި ދައުލަތަށް ލިބެންޖެހޭ ފައިސާގެ ތެރެއިން އެއް މިލިއަން ޑޮލަރު އަމިއްލަފުޅު އެކައުންޓަށް ޖަމާކޮށް، އެފައިސާއިން މަނީ ލޯންޑަރ ކުރުމުގެ ކުށް، ރައީސް ޔާމީންގެ މައްޗަށް ސާބިތުވެ، އެމަނިކުފާނު ފަސް އަހަރަށް ޖަލަށްލުމާއެކު ފަސް މިލިއަން ޑޮލަރުން ޖޫރިމަނާކޮށް، އެފައިސާ ހަ މަސްދުވަހުގެ ތެރޭގައި މީރާއަށް ދެއްކުމަށް ކްރިމިނަލް ކޯޓުން ހުކުމްކުރީ 28 ނޮވެމްބަރު، 2019ގައެވެ. ކްރިމިނަލް ކޯޓުން ކުރި ހުކުމް ރަނގަޅު ނޫންކަމަށް ބުނެ، ރައީސް ޔާމީންގެ ފަރާތުން ހައިކޯޓުގައި އެ މައްސަލަ އިސްތިއުނާފްކުރިއެވެ.
ހައިކޯޓުގައި އިސްތިއުނާފްކުރި އެ މައްސަލާގައި މިދިޔަ ޖެނުއަރީ މަހުގެ 21 ވަނަ ދުވަހު ހައިކޯޓުން ވަނީ ކްރިމިނަލް ކޯޓުން ރައީސް ޔާމީންގެ މައްޗަށް އިއްވާފައިވާ ހުކުމަށް ތާއީދުކޮށް، ދަމަހައްޓާފައެވެ.
އެހެންކަމުން، ރައީސް ޔާމީންގެ ފަރާތުން، އެމަނިކުފާނުގެ ގާނޫނީ ޓީމުން އެ މައްސަލަ ސުޕްރީމް ކޯޓުގައި އިސްތިއުނާފު ކުރީއެވެ.
ޔާމީނުގެ ފަރާތުން ސުޕްރީމް ކޯޓަށް ހުށައަޅުއްވާފައިވާ އިސްތިއުނާފީ މައްސަލައިގައި22 ނުކުތާއެއް ހިމެނެއެވެ. އެ ނުކުތާތައް ޔާމީނުގެ ފަރާތުން ވަކީލުންގެ ޓީމުން ތަފްސީލު ކޮށްދެއްވާފައިވާއިރު، ދައުލަތުންވެސް ވަނީ ތަފްސީލީ ގޮތެއްގައި އެ ނުކުތާތަކަށް ރައްދު ދެއްވާފައެވެ.
ސުޕްރީމް ކޯޓުގައި މި މައްސަލަ ބައްލަވާ ފަނޑިޔާރުންގެ މަޖިލީހުގައި ހިމެނިވަޑައިގަންނަވަނީ ފަނޑިޔާރު މަހާޒް ޢަލީ ޒާހިރާއި ފަނޑިޔާރު ޑރ. އަޒްމިރާލްދާ ޒާހިރާއި ފަނޑިޔާރު ޑރ. މުހައްމަދު އިބްރާހީމްއެވެ.
