ކަފާލާތާ ގުޅިގެން ޔާމީނުގެ ފަރާތުން ނަޖީބު ރައްޒާޤުގެ މިސާލު، ޝަރީއަތުން ވިދާޅުވީ ކުއްލި ކުއްލި ސަޕްރައިޒް ނުދެއްވުމަށް

މަނީ ލޯންޑަރިން ގެ ކުށް ސާބިތުވެ، ޖަލު ޙުކުމެއް ތަންފީޒު ކުރައްވަމުން ގެންދަވާ ކުރީގެ ރައީސް އަބްދުﷲ ޔާމީނުގެ ފަރާތުން އެ މައްސަލައިގެ ޙުކުމް ތަންފީޒު ކުރުން ފަސްކޮށްދިނުމާއި، ކަފާލާތުގެ ދަށުން ދޫކޮށްލެއްވުމަށް އެދި ސުޕްރީމް ކޯޓަށް ހުށަހެޅުއްވި ހުށަހެޅުންތަކާ ގުޅޭގޮތުން ސުޕްރީމް ކޯޓުގައި އަޑުއެހުމެއް ކުރިއަށް ގެންގޮސްފިއެވެ.

ހޯމަ ދުވަހު ބޭއްވި މި އަޑުއެހުމުގައި ޔާމީނުގެ ވަކީލުން ވަނީ އެ ހުށަހެޅުންތައް ހުށަހަޅުއްވާ ސަބަބުތަކާ ގުޅޭގޮތުން ވާހަކަ ދައްކަވާފައެވެ. އެގޮތުން ކަފާލާތުގެ ޙައްޤު ފެށިގެން އަންނަނީ ދިރިހުރުމުގެ ޙައްޤާ ގުޅޭ މާއްދާއިންކަން ފާހަގަ ކުރައްވައި ޔާމީނުގެ ވަކީލު ޑރ. މުޙައްމަދު ޖަމީލް އަޙުމަދު ވިދާޅުވީ، އެ ޙައްޤުތައް ހަނިވާގޮތަށް ދައުލަތަށް ވެސް ފުރުސަތު ދެވިގެން ނުވާނެ ކަމަށެވެ. އަދި ކުރީގެ ބައެއް ސިޔާސީ ބޭފުޅުން ކަފާލާތުގެ ދަށުން ދޫކޮށްލެއްވުމަށް ނިންމަވާފައިވާ ބައެއް ނިންމުންތައް މިސާލެއްގެ ގޮތުން ޑރ. ޖަމީލް ފާހަގަ ކުރެއްވިއެވެ.

އޭގެ އިތުރުން، އިންޑިއާގެ ބައެއް ކޭސްތަކާއި، މެލޭޝިއާގެ ކުރީގެ ބޮޑުވަޒީރު ނަޖީބު ރައްޒާޤުގެ މައްސަލައިގައި ފަނޑިޔާރުން ނިންމަވާފައިވާ ނިންމުމަށްވެސް ޑރ. ޖަމީލް އަލިއަޅުވައިލެއްވިއެވެ. އެގޮތުން ދިގު މުއްދަތެއްގެ ޙުކުމެއް އޮތުމަކީ ކަފާލާތު ނުދެވޭނެ ސަބަބެއް ނޫންކަން އެ ނިންމުމުގައި ބަޔާންކޮށްފައިވާކަން ޑރ. ޖަމީލް ފާހަގަ ކުރެއްވިއެވެ. ނަމަވެސް ޝަރީއަތުން ވަނީ މިއީ "ކުއްލި ކުއްލިއަށް ސަޕްރައިޒް" އަންނަ މަރުޙަލާއެއް ނޫންކަން ފާހަގަކުރައްވައި، ހުށަހަޅުއްވާފައިވާ ބައިތަކުގެ ތަރަހައިގައި ހިފެހެއްޓުމަށް އެދިވަޑައިގަންނަވާފައެވެ.

ކަފާލާތުގެ ދަށުން ދޫކޮށްލެއްވުމާއި، ޙުކުމް ތަންފީޒު ކުރުން ފަސްކޮށްދިނުމުގެ އަމުރަކަށް ރައީސް ޔާމީނުގެ ފަރާތުން އެދިފައިވާއިރު، މިހާރުވެސް ކްރިމިނަލް ކޯޓުގައި، ރ. ފުއްގިރި މައްސަލާގައި މަނީ ލޯންޑަރކުރުމާއި ރިޝްވަތު ގަބޫލުކުރުމުގެ ކުށުގެ ދައުވާގެ ޝަރީޢަތުގެ އަޑުއެހުންތަކެއް ކުރިއަށްދެއެވެ. އޭގެއިތުރުން ވެސް، އެމްއެމްޕީއާރުސީގެ މައްސަލަތަކެއް ފުލުހުންނާއި އެސެޓް ރިކަވަރީ ކޮމިޝަން އަދި އެންޓި ކޮރަޕްޝަން ކޮމިޝަން ގުޅިގެން ތަހުގީގު ކުރަމުންދެއެވެ.

މާފުށީ ޖަލުގައި ކޮވިޑް ފެތުރޭތީއާއި ގައިދީންގެ ބަލި ހާލަތު ހުރިގޮތުން, ކޮވިޑުގެ ސަބަބުން ނުރައްކާތެރި ގޮތެއް މެދުވެރިވެދާނެ މީހުންނަށް ބަލައިގެން ކަރެކްޝަން ސަރވިސްއިން ވަނީ ވަގުތީގޮތުން ރައީސް ޔާމީން ގޭ ބަންދަށް ބަދަލުކޮށްފައެވެ.

މި މައްސަލަ ބައްލަވާ ފަނޑިޔާރުންގެ މަޖިލީހުގައި ހިމެނިވަޑައިގަންނަވަނީ ފަނޑިޔާރު މަހާޒް ޢަލީ ޒާހިރާއި ފަނޑިޔާރު ޑރ. އަޒްމިރާލްދާ ޒާހިރާއި ފަނޑިޔާރު ޑރ. މުހައްމަދު އިބްރާހީމްއެވެ.