ޗެމްޕިއަން އިންޓަ އާއި ޔުވެންޓަސް ކުރިއަށް

އިޓާލިއަން ލީގުގައި ހޮނިހިރު ދުވަހުގެރޭ ކުޅުނު މެޗުތަކުން މޮޅުވެ އެންމެ ފަހުގެ ޗެމްޕިއަން އިންޓަ މިލާނާއި ޔުވެންޓަސް ތާވަލުގެ ކުރިއަށް ޖެހިލައިފިއެވެ.

ރަށުން ބޭރުގައި ކުޅުނު މެޗުން އިންޓަ މޮޅުވީ ސަސުއޯލޯ އަތުން ފަހަތުން އަރައި 2-1 ގެ ނަތީޖާއަކުންނެވެ.

ފޯރިގަދަ ކުޅުމެއް ފެނިގެންދިޔަ މި މެޗުގައި އެންމެ ފުރަތަމަ ލަނޑު ޖަހައި ލީޑު ނަގާފައިވަނީ ސަސުއޯލޯއިންނެވެ. މެޗުގެ 22 ވަނަ މިނެޓުގައި ލިބުނު ޕެނަލްޓީއަކުން މި ލަނޑު އެ ޓީމަށް ކާމިޔާބުކޮށްދިނީ ޑޮމެނިކޯ ބެރާޑީއެވެ. މިއީ އޭރިއާ ތެރެއިން ސަސުއޯލޯގެ ޖެރެމީ ބޯގާއަށް އިންޓަގެ މިލާން ސްކްރިނިއާ ކުރި ފައުލަކަށް ރެފުރީ ދިން ޕެނަލްޓީއެކެވެ.

އޭގެ ފަހުން އިންޓައިން ގިނަ ހަމަލާތަކެއް އުފެއްދިއިރު، އެ ޓީމުން ނަތީޖާ އެއްވަރުކޮށްފައިވަނީ ދެވަނަ ހާފު ފަށައިގެން 13 ވަނަ މިނެޓުގައެވެ. އޭރިއާ ތެރެއަށް އިވާން ޕެރިސިޗް ހުރަސްކޮށްދިން ބޯޅައަކުން މި ލަނޑު އެ ޓީމަށް ކާމިޔާބުކޮށްދިނީ އެޑިން ޒެކޯއެވެ. އަދި މި މެޗުން އިންޓަ މޮޅުކޮށްދިން ލަނޑު މެޗުގެ 78 ވަނަ މިނެޓުގައި ލިބުނު ޕެނަލްޓީއަކުން ކާމިޔާބުކޮށްދިނީ ލަޓާރޯ މާޓިނޭޒެވެ. މއީ އޭރިއާ ތެރެއިން އިންޓަގެ ޒެކޯއަށް ސަސުއޯލޯގެ ގޯލްކީޕަރު އަންދްރެއާ ކޮންސީލީ ކުރި ފައުލަކަށް ރެފުރީ ދިން ޕެނަލްޓީއެކެވެ.

މި މެޗުން އިންޓަ މޮޅުވިއިރު، ލީގުގައި ހޮނިހިރު ދުވަހުގެރޭ ކުޅުނު މެޗުން ޔުވެންޓަސް މޮޅުވީ ވާދަވެރި ޓޮރީނޯ އަތުން 1-0 ގެ ނަތީޖާއަކުންނެވެ.

ޓޮރީނޯގެ ދަނޑުގައި ކުޅުނު މި މެޗުގެ ފުރަތަމަ ހާފުގައި ލަނޑެއް ނުފެނުނު ނަމަވެސް، މި ހާފުގައި ލަނޑެއް ޖަހަން ޔުވެންޓަސްގެ މޮއިސް ކީން އާއި ވެސްޓަން މެކެނީއަށް ވަނީ ރަނގަޅު ފުރުސަތުތަކެއް ލިބި ބޭކާރުވެފައެވެ. އަދި މި ހާފުގައި އޭރިއާ ބޭރުން ޓޮރީނޯގެ ކެޕްޓަން ރޮލާންޑޯ މަންޑްރަގޯރާ ފޮނުވާލި ނުރައްކާތެރި ހަމަލާއެއް ޔުވެންޓަސްގެ ގޯލްކީޕަރު ވޮސިއެޗް ޝެޒްނީ ވަނީ ދިފާއުކޮށްފައެވެ.

މި މެޗުގެ ދެވަނަ ހާފުގައިވެސް ޔުވެންޓަސްއިން ގިނަ ހަމަލާތަކެއް އުފެއްދިއިރު، އެ ޓީމުން ކާމިޔާބުކުރި ހަމައެކަނި ލަނޑު ފެނިގެންގޮސްފައިވަނީ މެޗު ނިމެން ހަތަރު މިނެޓަށް ވެފައި ވަނިކޮށެވެ. ފެޑެރީކޯ ކިއޭސާގެ އެހީތެރިކަމާއެކު މި ލަނޑު އެ ޓީމަށް ކާމިޔާބުކޮށްދިނީ ސަސުއޯލޯގެ ލޯނު އެއްބަސްވުމެއްގެ ދަށުން ކުޅެމުން އަންނަ މަނުއެލް ލޮކަޓެއްލީއެވެ.

މި ނަތީޖާތަކާއެކު އިންޓަ އޮތީ ތާވަލުގެ ދެވަނައިގައި ކުޅުނު ހަތް މެޗުން ލިބުނު 17 ޕޮއިންޓާއެކުއެވެ. އެއްވަނައިގައި އޮތް ނާޕޮލީއަށް ހަ މެޗުން 18 ޕޮއިންޓް ލިބިފައިވާއިރު، ޔުވެންޓަސް އޮތީ ތާވަލުގެ އަށްވަނައިގައި ހަތް މެޗުން 11 ޕޮއިންޓާއެކުއެވެ.