އެވަޓަނުން ޔުނައިޓެޑާ އެއްވަރުކޮށްފި

އިނގިރޭސި ޕްރިމިއާ ލީގުގައި ހޮނިހިރު ދުވަހުގެ ހަވީރު ކުޅުނު މެޗުން އެވަޓަނުން މެންޗެސްޓާ ޔުނައިޓެޑާ އެއްވަރުކޮށްފިއެވެ.

ޔުނައިޓެޑުގެ ދަނޑުގައި ކުޅުނު މި މެޗު އެއްވަރުވީ 1-1 ގެ ނަތީޖާއަކުންނެވެ. މި މެޗުން ޔުނައިޓެޑް އެއްވަރުވިއިރު، ލީގުގައި އެންމެ ފަހުން ކުޅުނު ދެ މެޗުންވެސް ޔުނައިޓެޑަށް މޮޅެއް ހޯދިފައެއް ނުވެއެވެ.

ހޮނިހިރު ދުވަހު ކުޅުނު މެޗު ޔުނައިޓެޑުން ފަށާފައިވަނީ އިތުބާރު ފޯވާޑް ކްރިސްޓިއާނޯ ރޮނާލްޑޯ ބެންޗުގައި ބައިންދައިގެންނެވެ. އެކަމަކު މެޗުގެ ފުރަތަމަ ހާފު ނިމުމުގެ ކުރިން ޔުނައިޓެޑުން ވަނީ ލީޑު ނަގާފައެވެ. މި ހާފު ނިމެން ދެ މިނެޓަށް ވެފައި ވަނިކޮށް ބްރޫނޯ ފެނާންޑޭސް ދިން ޕާހަކުން މި ލަނޑު އެ ޓީމަށް ކާމިޔާބުކޮށްދިނީ އެންތަނީ މާޝިއާލެވެ.

މި މެޗުގެ ދެވަނަ ހާފު ފަށައިގެން 12 ވަނަ މިނެޓުގައި ރޮނާލްޑޯ ކުޅެން އެރުވި ނަމަވެސް، މެޗުގެ 65 ވަނަ މިނެޓުގައި އެވަޓަނުން ވަނީ ނަތީޖާ އެއްވަރުކޮށްފައެވެ. ކައުންޓަ އެޓޭކެއްގައި ޑޮކޫރޭ ދިން ޕާހަކުން މި ލަނޑު އެ ޓީމަށް ކާމިޔާބުކޮށްދިނީ އަންޑްރޮސް ޓައުންސެންޑެވެ. އޭގެ ފަހުން އަލުން ލީޑު ނެގުމަށް ޔުނައިޓެޑުގެ ރޮނާލްޑޯ އާއި ޕައުލް ޕޮގްބާއަށް ވަނީ ރަނގަޅު ފުރުސަތުތަކެއް ލިބި ބޭކާރުވެފައެވެ.

އަދި މި މެޗު ނިމެން ފަސް މިނެޓަށް ވެފައި ވަނިކޮށް ޓޮމް ޑޭވީސް ދިން ބޯޅައަކުން ޔެރީ މީނާ ވަނީ އެވަޓަނަށް ލަނޑެއް ޖަހައިދީފައެވެ. އެކަމަކު އޭނާ އޮފްސައިޑުގައި ހުރުމުން، ވީޑިއޯ އެސިސްޓަންޓް ރެފުރީ (ވީއޭއާރް) އިން އެ ލަނޑު ބަލައިގެންފައެއް ނުވެއެވެ.

މި ނަތީޖާއާއެކު ތާވަލުގެ ދެވަނައިގައި އޮތް ޔުނައިޓެޑާއި ތިންވަނައިގައި އޮތް އެވަޓަނަށް ވަނީ ކުޅުނު ހަތް މެޗުން 14 ޕޮއިންޓް ލިބިފައެވެ. އަދި ތާވަލުގެ އެއްވަނައިގައި އޮތް ލިވަޕޫލަށްވެސް 14 ޕޮއިންޓް ލިބިފައިވާއިރު، ލީގުގައި އެ ޓީމުން މިހާތަނަށް ކުޅެފައިވަނީ ހަ މެޗެވެ.