ކޮވިޑް ފެސިލިޓީއަށް ނަރުހުން ހޯދަނީ
ހޯދަނީ 22 ނަރުހުން
ހުޅުމާލެ މެޑިކަލް ފެސިލިޓީ
ހުޅުމާލޭ ކޮވިޑް ފެސިލިޓީއާއި ކޮވިޑް-19 އަށް ފަރުވާދޭ އެހެނިހެން ތަންތަނުގައި މަސައްކަތްކުރުމަށް 22 ނަރުހުން ހޯދަން އައިޖީއެމްއެޗުން އިއުލާނު ކޮއްފިއެވެ.
މިވަގުތު ބޭނުން ވަނީ، ވަގުތީ ގޮތުން 1 އަހަރު ދުވަހު މަސައްކަތް ކުރާނެ ނަރުހުން ކަމަށާއި، އެ މަގާމަށް ކުރިމަތިލާ މީހުންނަކީ ނަރސިންގގެ ރޮނގަކުން ރާއްޖޭގެ ގައުމީ ސަނަދުތަކުގެ އޮނިގަނޑުގެ ލެވެލް ފަހެއް ނުވަތަ ހައެއްގެ ސަނަދެއް ހާސިލްކޮށްފައިވާ މީހަކަށްވާން ޖެހޭ ކަމަށް އެ އިއުލާނުގައިވަނީ ބުނެފައެވެ. މަހު މުސާރައަކީ 9،060 ރުފިޔާ ކަމަށާއި ސަރވިސް އެލަވަންސްގެ ގޮތުގައި ދުވާލަކު 188 ރުފިޔާ ލިބޭނެ ކަމަށާއި، ހަފްތާއަކު 5 ދުވަހު މަދުވެގެން 8 ގަޑިއިރު މަސައްކަތް ކުރަންޖެހޭނެ ކަމަށްވެސް އެ ހޮސްޕިޓަލުގެ އިއުލާނުގައި ވަނީ ބުނެފައެވެ.
އަދި ނަރުހުން ކުރަން ޖެހޭނެ މަސައްކަތަކީ ބަލިމީހުންނަށް ބޭނުންވާ ނަރސިންގ ކެއަރ ރާވައި ޚިދުމަތްދީ އިވެލުއޭޓްކުރުމާއި, ބަލިމީހުންނަށް ބޭނުންވާ ޖިސްމާނީ, އިޖްތިމާޢީ އަދި ނަފްސާނީ ފަރުވާ ދިނުމުގައި ނަރސިން ކެއަރގެ ޕްލޭނާ އެއްގޮތަށް, އެހެން ސިއްހީ ޕްރޮފެޝަނަލުންނާ ގުޅިގެން ފަރުވާދިނުން ކަމަށާއި, އަދި ބަލިމީހުންނަށް ލިޔެދީފައި ހުންނަ ޑޮކްޓަރީ ބޭހާ އެއްގޮތަށް ފަރުވާދީ، އެ ފަރުވާއަށް ބަލިމީހާގެ ހާލަތު ބަދަލުވަމުން އަންނަ ގޮތް ބަލަމުން ގެންދިއުމާއި, އޭނާއަށް ބޭނުންވާ ޚާއްސަ އެހީތެރިކަމަށް އެހެން ސިއްހީ ޕްރޮފެޝަނަލުންގެ ޚިދުމަތް ބޭނުންވާ ހާލަތްތަކުގައި އެކަންތައްތައް ފެސިލޭޓްކޮށްދޭން ޖެހޭނެ ކަމަށް ވެސް ބުނެފައި ވެއެވެ. ބަލިމީހާގެ ސިއްހީ މައުލޫމާތާއި ދެވުނު ބޭސްފަރުވާގެ މައުލޫމާތު, ރެކޯޑްކުރާ ނިޒާމުގައި ލިޔެ އަޕްޑޭޓްކުރަން ވެސް ޖެހެއެވެ.
