ރޮނާލްޑޯގެ ލަނޑުން ޔުނައިޓެޑް މޮޅުވިއިރު، ޗެލްސީއަށް ނާކާމިޔާބު

ޔުއެފާ ޗެމްޕިއަންސް ލީގުގައި ބުދަ ދުވަހުގެރޭ ކްރިސްޓިއާނޯ ރޮނާލްޑޯ ފަހު ވަގުތު ޖެހި ލަނޑާއެކު ވިޔަރެއާލް އަތުން މެންޗެސްޓާ ޔުނައިޓެޑް މޮޅުވިއިރު، ޔުވެންޓަސް އަތުން އެންމެ ފަހުގެ ޗެމްޕިއަން ޗެލްސީ ބަލިވެއްޖެއެވެ.

ގްރޫޕް އެފްގައި ހިމެނޭ ޔުނައިޓެޑް މޮޅުވީ އަމިއްލަ ދަނޑުގައި ކުޅެ ވިޔަރެއާލް އަތުން ފަހަތުން އަރައި 2-1 ގެ ނަތީޖާއަކުންނެވެ.

މި މެޗުގެ ފުރަތަމަ ހާފުގައި ލަނޑެއް ފެނިފައި ނުވާއިރު، ދެވަނަ ހާފުގައި އެންމެ ފުރަތަމަ ލަނޑު ޖަހައި ލީޑު ނަގާފައިވަނީ ވިޔަރެއާލުންނެވެ. މި ހާފު ފަށައިގެން އަށްވަނަ މިނެޓުގައި މި ލަނޑު އެ ޓީމަށް ކާމިޔާބުކޮށްދިނީ ޕަކޯ އަލްކަސޭރެވެ. އެކަމަކު އޭގެ ހަތް މިނެޓު ފަހުން އަލެކްސް ޓެލޭސް ޖެހި މޮޅު ލަނޑުން ޔުނައިޓެޑުން ވަނީ ނަތީޖާ އެއްވަރުކޮށްފައެވެ.

މި މެޗުން ޔުނައިޓެޑް މޮޅުވީ މެޗުގެ އިތުރު ވަގުތުގެ ފަސްވަނަ މިނެޓުގައި އޭރިއާ ތެރެއިން ފޮނުވާލި ހަމަލާއަކުން ރޮނާލްޑޯ ކާމިޔާބުކުރި ލަނޑުންނެވެ. އޭނާ މި ލަނޑު ކާމިޔާބުކޮށްފައިވަނީ ޖެސޭ ލިންގާޑް ދިން ބޯޅައަކުންނެވެ.

މި މެޗުގައި ރޮނާލްޑޯ ލަނޑު ޖެހިއިރު، މިއީ ރޮނާލްޑޯ ޗެމްޕިއަންސް ލީގުގައި ކުޅުނު 178 ވަނަ މެޗެވެ. އެއާއެކު ރޮނާލްޑޯ ވަނީ މި މުބާރާތުގައި އެންމެ ގިނަ މެޗު ކުޅެގެން ރެއާލް މެޑްރިޑުގެ ލެޖެންޑަރީ ގޯލްކީޕަރު އިކާ ކަސިއަސް މީގެ ކުރިން ހަދާފައިވާ ރިކޯޑު މުގުރާލާފައެވެ. އަދި މި މުބާރާތުގެ އެންމެ ގިނަ ލަނޑު ޖެހުމުގެ ރިކޯޑު އޮތީވެސް ރޮނާލްޑޯގެ އަތުގައެވެ.

މި މެޗުން ޔުނައިޓެޑް މޮޅުވިއިރު، މި ގްރޫޕުގެ އަނެއް މެޗުގައި ބުދަ ދުވަހުގެރޭ އެޓަލާންޓާއިން ވަނީ 1-0 ގެ ނަތީޖާއަކުން ޔަންގް ބޯއީސް ބަލިކޮށްފައެވެ. މި ނަތީޖާތަކާއެކު ގްރޫޕް އެފްގެ އެއްވަނައިގައި ކުޅުނު ދެ މެޗުން ހަތަރު ޕޮއިންޓް ހޯދާފައިވާ އެޓަލާންޓާއެވެ. ދެވަނައިގައި އޮތް ޔަންގް ބޯއީސް އާއި ތިންވަނައިގައި އޮތް ޔުނައިޓެޑަށް ދެ މެޗުން ތިން ޕޮއިންޓް ލިބިފައިވާއިރު، ފުލުގައި އޮތް ވިޔަރެއާލަށް ލިބިފައިވަނީ އެންމެ ޕޮއިންޓެކެވެ.

މީގެ އިތުރުން ޗެމްޕިއަންސް ލީގުގެ ގްރޫޕް އެޗްގައި ހިމެނޭ އެންމެ ފަހުގެ ޗެމްޕިއަން ޗެލްސީ ބަލިވީ ބުދަ ދުވަހުގެރޭ ކުޅުނު މެޗުން ޔުވެންޓަސް އަތުން 1-0 ގެ ނަތީޖާއަކުންނެވެ.

ޔުވެންޓަސްގެ ދަނޑުގައި ކުޅުނު މި މެޗުގައި ކޮވިޑް-19 އަށް ޕޮޒިޓިވްވުމާ ގުޅިގެން ޗެލްސީގެ މިޑްފީލްޑަރު އެންގޯލޯ ކާންޓޭ ކުޅެފައެއް ނުވެއެވެ. އަދި އަނިޔާގެ ސަބަބުން އެ ޓީމުގެ ކްރިސްޓިއަން ޕުލިސިޗާއި، މޭސަން މައުންޓް އަދި ރީސް ޖޭމްސްވެސް މި މެޗުގައި ކުޅެފައެއް ނުވެއެވެ.

ވާދަވެރި ކުޅުމެއް ފެނިގެންދިޔަ މި މެޗުގައި ޔުވެންޓަސްއިން ޖެހި ހަމައެކަނި ލަނޑު ފެނިގެންގޮސްފައިވަނީ މެޗުގެ ދެވަނަ ހާފުގެ ކުޅުން ފަށައިގެން 10 ސިކުންތުގެ ތެރޭގައެވެ. ފެޑެރީކޯ ބެނާޑޭޝީ ދިން ބޯޅައަކުން މި ލަނޑު އެ ޓީމަށް ކާމިޔާބުކޮށްދިނީ ފެޑެރީކޯ ކިއޭސާއެވެ.

މި މެޗުން ޔުވެންޓަސް މޮޅުވިއިރު، މި ގްރޫޕުގެ އަނެއް މެޗުގައި ބުދަ ދުވަހުގެރޭ ކުލަބު ޒެނިތުން ވަނީ ފަސޭހަކަމާއެކު 4-0 ގެ ނަތީޖާއަކުން މަލްމޯ ބަލިކޮށްފައެވެ. މި ނަތީޖާތަކާއެކު ގްރޫޕް އެޗްގެ އެއްވަނައިގައި ޔުވެންޓަސް އޮތީ ކުޅުނު ދެ މެޗުންވެސް މޮޅުވެ ހަ ޕޮއިންޓާއެކުއެވެ. ދެވަނައިގައި އޮތް ޗެލްސީ އާއި ތިންވަނައިގައި އޮތް ޒެނިތަށް ދެ މެޗުން ތިން ޕޮއިންޓް ލިބިފައިވާއިރު، ފުލުގައި އޮތް މަލްމޯއަށް އަދި މިހާތަނަށް ޕޮއިންޓެއް ލިބިފައެއް ނުވެއެވެ.