މެސީގެ ލަނޑާއެކު ޕީއެސްޖީ މޮޅުވިއިރު، ރެއާލަށް ހިތްދަތި ބައްޔެއް

ޔުއެފާ ޗެމްޕިއަންސް ލީގުގައި އަންގާރަ ދުވަހުގެރޭ ކުޅުނު މެޗުން އިނގިރޭސި ޗެމްޕިއަން މެންޗެސްޓާ ސިޓީ އަތުން ޕީއެސްޖީ މޮޅުވިއިރު، ޗެމްޕިއަންސް ލީގުގައި މުޅިން އަލަށް ވާދަކުރަމުން އަންނަ މޮލްޑޯވާގެ ޝެރިފް އަތުން މި މުބާރާތުގެ އެންމެ ކާމިޔާބު ޓީމު ކަމަށްވާ ރެއާލް މެޑްރިޑް ބަލިވެއްޖެއެވެ.

ގްރޫޕް އޭގައި ހިމެނޭ ޕީއެސްޖީ މޮޅުވީ ސިޓީ އަތުން 2-0 ގެ ނަތީޖާއަކުންނެވެ.

ޕީއެސްޖީގެ ދަނޑުގައި ކުޅުނު މި މެޗުގެ ވަރަށް ކުރީކޮޅު އެ ޓީމުން ވަނީ ލީޑު ނަގާފައެވެ. މެޗު ފަށައިގެން އަށްވަނަ މިނެޓުގައި އޭރިއާ ތެރެއިން ލިބުނު ބޯޅައަކުން މި ލަނޑު އެ ޓީމަށް ކާމިޔާބުކޮށްދިނީ އިދުރީސާ ގާނާ ގޭއެވެ. އޭގެ ފަހުން ސިޓީން މި މެޗު ކޮންޓްރޯލްކޮށްގެން ކުޅުނު ނަމަވެސް، ޕީއެސްޖީން ވަނީ ރަނގަޅަށް ޑިފެންސްކޮށް ސިޓީ ހުއްޓުވާފައެވެ.

މި މެޗުގައި ޕީއެސްޖީން ލީޑު ފުޅާކޮށްފައިވަނީ މެޗުގެ 74 ވަނަ މިނެޓުގައެވެ. ކައުންޓަ އެޓޭކެއްގައި ކީލިއަން އެމްބާޕޭގެ އެހީއާއެކު މި ލަނޑު އެ ޓީމަށް ކާމިޔާބުކޮށްދިނީ ލިއޮނެލް މެސީއެވެ. މިއީ މި ފަހަރުގެ ޓްރާންސްފާ ބާޒާރުގައި ބާސެލޯނާ ދޫކޮށް ޕީއެސްޖީއަށް ބަދަލުވި ފަހުން މެސީ ކާމިޔާބުކުރި ފުރަތަމަ ލަނޑެވެ.

މި މެޗުން ޕީއެސްޖީ މޮޅުވިއިރު، މި ގްރޫޕުގެ އަނެއް މެޗުގައި އަންގާރަ ދުވަހުގެރޭ ކުލަބު ބްރޫޖުން ވަނީ ފަހަތުން އަރައި 2-1 ގެ ނަތީޖާއަކުން އާރްބީ ލައިޕްޒީގް ބަލިކޮށްފައެވެ. މި ނަތީޖާތަކާއެކު ގްރޫޕް އޭގެ އެއްވަނައިގައި އޮތް ޕީއެސްޖީއާއި، ދެވަނައިގައި އޮތް ބްރޫޖަށް ވަނީ ކުޅުނު ދެ މެޗުން ހަތަރު ޕޮއިންޓް ލިބިފައެވެ. އަދި ތިންވަނައިގައި އޮތް ސިޓީއަށް ތިން ޕޮއިންޓް ލިބިފައިވާއިރު، ތާވަލުގެ ފުލުގައި ލައިޕްޒީގް އޮތީ ދެ މެޗުން ޕޮއިންޓެއް ނުލިބިއެވެ.

މީގެ އިތުރުން އަންގާރަ ދުވަހުގެރޭ ކުޅުނު މެޗުން ޗެމްޕިއަންސް ލީގުގެ ތަށި 13 ފަހަރު ހޯދާފައިވާ އަދި މި ފަހަރުގެ ގްރޫޕް ޑީގައި ހިމެނޭ ރެއާލް ބަލިވީ އަމިއްލަ ދަނޑުގައި ކުޅެ ޝެރިފް އަތުން 2-1 ގެ ނަތީޖާއަކުންނެވެ.

މި މެޗުގައި އެންމެ ފުރަތަމަ ލަނޑު ޖަހައި ލީޑު ނަގާފައިވަނީވެސް ޝެރިފުންނެވެ. މެޗުގެ 25 ވަނަ މިނެޓުގައި މި ލަނޑު އެ ޓީމަށް ކާމިޔާބުކޮށްދިނީ ޖަސުރްބެކް ޔަކްޝިބޮއޭވެވެ.

އެކަމަކު މެޗުގެ 65 ވަނަ މިނެޓުގައި ލިބުނު ޕެނަލްޓީއަކުން ކަރީމް ބެންޒެމާ ވަނީ ރެއާލަށް ނަތީޖާ އެއްވަރުކޮށްދީފައެވެ. މިއީ އޭރިއާ ތެރެއިން ރެއާލުގެ ވިނީޝިއުސް ޖޫނިއާއަށް ޝެރިފުގެ އެޑްމަންޑް އަޑޯ ކުރި ފައުލަކަށް ރެފުރީ ދިން ޕެނަލްޓީއެކެވެ. މި މެޗުގައި ޖެހި ލަނޑާއެކު ބެންޒެމާ ވަނީ ޗެމްޕިއަންސް ލީގުގައި ޖުމްލަ 72 ލަނޑު ކާމިޔާބުކޮށްފައެވެ. އެއާއެކު އޭނާ ވެފައިވަނީ ޗެމްޕިއަންސް ލީގުގެ ތާރީޚުގައި ހަތަރުވަނައަށް އެންމެ ގިނަ ލަނޑު ޖެހި ކުޅުންތެރިޔާއަށެވެ.

ބެންޒެމާގެ ލަނޑުން ރެއާލުން ނަތީޖާ އެއްވަރުކުރި ނަމަވެސް، މެޗުގެ ފަހު މިނެޓުގައި ޝެރިފުން ވަނީ އަލުން މި މެޗުގައި ލީޑު ނަގާފައެވެ. އޭރިއާ ބޭރުން ފޮނުވާލި ބާރު ހަމަލާއަކުުން މި ލަނޑު އެ ޓީމަށް ކާމިޔާބުކޮށްދިނީ ސެބަސްޓިއަން ތިލްއެވެ.

މި މެޗުން ޝެރިފް މޮޅުވިއިރު، މި ގްރޫޕުގެ އަނެއް މެޗުގައި ޝަޚްތާރު ޑޮނިއެސްކާއި އިންޓަ މިލާން ބައްދަލުކުރިއިރު، އެ މެޗު ނިމުނީ ދެ ޓީމުން ކުރެ ޓީމަކަށް ލަނޑެއް ނުޖެހިއެވެ. މި ނަތީޖާއާއެކު ގްރޫޕް ޑީގެ އެއްވަނައަށް ޝެރިފް ޖެހިލިއިރު، އެ ޓީމު ވަނީ މިހާތަނަށް ކުޅުނު ދެ މެޗުންވެސް މޮޅުވެފައެވެ. އެއާއެކު ޝެރިފަށް ހަ ޕޮއިންޓް ލިބިފައިވާއިރު، ދެވަނައިގައި އޮތް ރެއާލަށް ދެ މެޗުން ލިބިފައިވަނީ ތިން ޕޮއިންޓެވެ. އަދި ފުލުގައި އޮތް އިންޓަ އާއި ޝަޚްތާރަށް ދެ މެޗުން ލިބިފައިވަނީ އެންމެ ޕޮއިންޓެކެވެ.