މީހުންގެ ބަރަހަނާ ފޮޓޯތައް އަޅައިގެން ޓެލެގްރާމްގެ ގްރޫޕްތައް ހިންގި ކަމުގެ ތުހުމަތު ކޮށްފައިވާ މީހާގެ މައްޗަށް ގިނަ ދައުވާތަކެއް އުފުލައިފިއެވެ.

އެ މީހާގެ މައްޗަށް ދައުވާ އުފުލައި ފީޖީ އޮފީހުން މިހާރުވަނީ މައްސަލަ ކުރިމިނަލް ކޯޓަށް ފޮނުވާފައެވެ. މި މައްސަލާގައި ދައުވާ އުފުލާފައިވަނީ މިހާރު ފުލުހުންގެ ބަންދުގައި ހުރި, މއ. އިސްޕަންޖުގެ، މުހައްމަދު މަސާއިދު ބިން ސަމީއުގެ މައްޗަށެވެ.

ޕްރޮސިކިއުޓާ ޖެނަރަލްގެ އޮފީހުން ބުނި ގޮތުގައި އެކިދުވަސްމަތިން އެކި މީހުންގެ ސޯޝަލް މީޑިއާ އެކައުންޓްތަކާއި، ޒާތީ މުއާމަލާތް ހިމެނޭ އެހެނިހެން އެކައުންޓްތައް މަސާއިދު ވަނީ ހެކް ކޮށްފައެވެ. އަދި, އެކި މީހުންގެ ޒާތީ މައުލޫމާތާއި އެމީހުންގެ ބަރަހަނާ މަންޒަރު ދައްކުވައިދޭ ފޮޓޯ އަދި ވީޑިއޯ ނެގުމަށްފަހު ޓެލެގްރާމް އާއި އެހެނިހެން ސޯޝަލް މީޑިއާގެ ޕްލެޓްފޯމްތަކުގައިވެސް ވަނީ ހާމަ ކޮށްފައެވެ.

މަސާއިދުގެ ބަންދުގެ މަޖިލީހުގައި ފުލުހުން ބުނެފައިވަނީ އޭނާ ގެންގުޅުނު ހާޑްޑްރައިވަކުން މިލިއަނެއްހާ ފޮޓޯ ފެނިފައިވާ ކަމަށެވެ. މި މައްސަލައިގައި ގިނައަދަދެއްގެ ބަޔަކު ވިކްޓިމުންގެ ގޮތުގައި ފާހަގަވެފައިވާއިރު، މަސާއިދުގެ އަތުން ޖުމްލަ 10 ހާޑްޑްރައިވް ހޯދިއެވެ.