ފަޓީގެ ލަނޑާއެކު ބާސާއަށް މުހިންމު މޮޅެއް

އަނިޔާއިން ރަނގަޅުވެ ކުޅުމުގެ ތެރެއަށް އައި ޒުވާން ތަރި އަންސޫ ފަޓީ ޖެހި ލަނޑާއެކު، ސްޕެނިޝް ލީގުގައި އާދީއްތަ ދުވަހުގެރޭ ލެވާންޓޭ އަތުން ބާސެލޯނާ މޮޅުވެއްޖެއެވެ.

އަމިއްލަ ދަނޑުގައި ކުޅުނު މެޗުން ބާސާ މޮޅުވީ 3-0 ގެ ނަތީޖާއަކުންނެވެ.

މި މެޗުން ބާސާ މޮޅުވިއިރު، މި މެޗުގެ ކުރިން ލީގުގައި އެންމެ ފަހުން ކުޅުނު ދެ މެޗުންވެސް ބާސާ މޮޅުވެފައެއް ނުވެއެވެ. އެއާއެކު ބާސާގެ ކޯޗު ރޮނާލްޑް ކޫމަނަށް ޕްރެޝަރު ބޮޑުވެފައިވާއިރު، ކަޑިޒް މެޗުގައި ދެއްކި ރަތް ކާޑާ ގުޅިގެން މި މެޗުގައި އޭނާއަށް ޓީމަށް އިރުޝާދުދިނުމުގެ ފުރުސަތުވެސް ގެއްލުނެވެ.

އެކަމަކު މި މެޗުގައި ބާސާއިން މޮޅު ކުޅުމެއް ދެއްކިއިރު، މެޗުގެ ފަށައިގެން ހަވަނަ މިނެޓުގައި އެ ޓީމުން ވަނީ ލީޑު ނަގާފައެވެ. ލިބުނު ޕެނަލްޓީއަކުން މި ލަނޑު އެ ޓީމަށް ކާމިޔާބުކޮށްދިނީ މެމްފިސް ޑިޕާއިއެވެ. މިއީ އޭރިއާ ތެރެއިން ޑިޕާއިއަށް ލެވާންޓޭގެ ނެމަންޔާ ރަޑޯޔާ ކުރި ފައުލަކަށް ރެފުރީ ދިން ޕެނަލްޓީއެކެވެ.

އަދި އޭގެ އަށް މިނެޓު ފަހުން ބާސާއިން ލީޑު ފުޅާކުރިއިރު، ސާޖީނިއޯ ޑެސްޓް ދިން ޕާހަކުން މި ލަނޑު އެ ޓީމަށް ކާމިޔާބުކޮށްދިނީ ލޫކް ޑި ޔޮންއެވެ. މިއީ މި ފަހަރުގެ ޓްރާންސްފާ ބާޒާރުގައި ސެވިއްޔާ ލޯނު އެއްބަސްވުމެއްގެ ދަށުން ބާސާއަށް ބަދަލުވެ، ޑި ޔޮން ކާމިޔާބުކުރި ފުރަތަމަ ލަނޑެވެ.

މި މެޗު ނިމެން ގާތްވެފައި ވަނިކޮށް ފަޓީ ކުޅެން އެރިއިރު، މެޗުގެ އިތުރު ވަގުތުގައި އޭރިއާ ބޭރުން ފޮނުވާލި ހަމަލާއަކުން އޭނާ ވަނީ ބާސާގެ ތިންވަނަ ލަނޑު ޖަހާފައެވެ. އަނިޔާއިން ރަނގަޅުވެ ކުޅުނު ފުރަތަމަ މެޗުގައި ފަޓީ ލަނޑު ޖެހިއިރު، މިދިޔަ އަހަރުގެ ނޮވެމްބަރު މަހު ކަކުލަށް ލިބުނު ސީރިއަސް އަނިޔާއިން ރަނގަޅުވުމަށް ޓީ ވަނީ މި ވޭތުވެދިޔަ މުއްދަތުގައި ދެ އޮޕަރޭޝަނެއް ކޮށްފައެވެ.

ލީގުގައި އާދީއްތަ ދުވަހުގެރޭ ލެވާންޓޭ އަތުން ހޯދި މޮޅާއެކު ބާސާ އޮތީ ތާވަލުގެ ހަވަނައިގައި ކުޅުނު ހަ މެޗުން ލިބުނު 12 ޕޮއިންޓާއެކުއެވެ. އެއްވަނައިގައި އޮތް ރެއާލް މެޑްރިޑަށް ހަތް މެޗުން 17 ޕޮއިންޓް ލިބިފައިވާއިރު، އެންމެ ފަހުގެ ޗެމްޕިއަން އެތުލެޓިކޯ މެޑްރިޑް އޮތީ ތާވަލުގެ ހަތަރުވަނައިގައި ހަތް މެޗުން 14 ޕޮއިންޓާއެކުއެވެ.