ޔާމީނަށް ލުއި ޙުކުމަކާއެކު ބަރު ޖޫރިމަނާއެއް އައީ ކީއްވެތޯ ޝަރީއަތުން ކުރި ސުވާލާއެކު އަޑުއެހުން ނިންމާލައިފި
23 ސެޕްޓެމްބަރު 2021 | ބުރާސްފަތި 08:04ޔާމީނުގެ ފަރާތުން 22 އިސްތިއުނާފީ ނުކުތާއެއް ހުށައަޅާފައިވޭ
ރައީސް ޔާމީނުގެ ޖަލު ހުކުމުގެ އިސްތިއުނާފު އަޑުއެހުން ސުޕްރީމް ކޯޓުގައި ކުރިއަށްދަނީ
މަނީ ލޯންޑަރިންގެ ގެ ކުށް ސާބިތުވެ ކުރީގެ ރައީސް އަބްދުﷲ ޔާމީނަށް ޖަލު ޙުކުމް އިއްވާފައިވާއިރު، ޖަލު ޙުކުމް ލުއިކޮށް އޮވެފައި، ޖޫރިމަނާ އަދަދު އެންމެ މަތީ އަދަދުން އޮތީ ކީއްވެތޯ ޝަރީއަތުން ދައުލަތަށް ސުވާލުކޮށްފިއެވެ.
ރައީސް ޔާމީނުގެ ޖަލު ޙުކުމުގެ އިސްތިއުނާފު އަޑުއެހުންތައް ސުޕްރީމް ކޯޓުގައި ކުރިއަށްދާއިރު، ޔާމީނުގެ ފަރާތުން 22 އިސްތިއުނާފީ ނުކުތާއެއް ހުށައަޅާފައިވެއެވެ. އޭގެ ތެރެއިން އެއް ނުކުތާގައި މީހެއްގެ މައްޗަށް ފުރަތަމަ ކުށް ސާބިތުވާއިރު ލުއި ޙުކުމެއް އިސް ކުރުން އޮންނައިރު، ޖޫރިމަނާ އޮތީ އެންމެ ބޮޑު މިންގަނޑުންކަމަށް ބަޔާންކޮށް ހުށައަޅާފައިވާ ނުކުތާއެއް ހިމެނެއެވެ. މި ނުކުތާއާ ގުޅޭގޮތުން ބުރާސްފަތި ދުވަހުގެ އަޑުއެހުމުގައި ޝަރީއަތުން ވެސް ވަނީ ދައުލަތަށް ސުވާލުކޮށްފައެވެ.
"އިސްތިއުނާފުކުރާ ފަރާތުން ފާހަގަކުރާ އެއްކަމެއް، ޖަލު އަދަބުގެ އެންމެ ދަށް މިންގަނޑު އިހުތިޔާރު ކުރުމަށްފަހު، މި މައްސަލައިގެ އުޅެނީ 1 މިލިއަން ޑޮލަރު، އެ 5 ގުނަ ވެގެން ދިޔައީމާ އެ ދަނީ ޖޫރިމަނާގެ އެންމެ މައްޗަށޭ، ކީއްވެގެންތޯ ޖަލު ޙުކުމުގެ އެންމެ ދަށް، ޖޫރިމަނާގެ އެންމެ މަތި، މީތި ޖަސްޓިފައި ކުރައްވަނީ ކިހިނެއްތޯ"- ފަނޑިޔާރު މަޙާޒް
އެކަމާ ގުޅޭގޮތުން ވާހަކަ ދައްކަވަމުން ދައުލަތުގެ ވަކީލާ ވިދާޅުވީ، މަނީ ލޯންޑަރިންގ އަދި ޓެރަރިޒަމަށް ފައިނޭންސް ކުރުން ހުއްޓުވުމުގެ ޤާނޫނުގެ 53 ވަނަ މާއްދާގެ (ށ) ގައި އޮންނަނީ ފަނޑިޔާރަށް ލިބިގެންވާ އިހުތިޔާރެއް ކަމަށެވެ. އެގޮތުން ޖަލު އަދަބު 5 އަހަރާއި 15 އަހަރާއި ދެމެދުގައި ކަނޑައެޅުން ނުވަތަ ލޯންޑަރ ކުރި ފައިސާގެ އަދަދު 5 ގުނައަށްވުރެ އިތުރުނުވާނެ ގޮތަކަށް ޖޫރިމަނާގެ އަދަބު ކަނޑައެޅުން އޮންނަކަމަށް ވަކީލާ ވިދާޅުވިއެވެ.
ވަކީލާ ވިދާޅުވީ މިއީ ޔާމީނުގެ މައްޗަށް ސާބިތުވާ ފުރަތަމަ ކުށް ކަމަށްވުމާއެކު، މި މައްސަލައިގައި ދައުލަތުން އެދިފައިވަނީ ޖަލު އަދަބުގެ އެންމެ ލުއި މިންވަރު ކަމަށެވެ. ނަމަވެސް ޖޫރިމަނާއާ ގުޅޭގޮތުން އަދަބު މަތިކުރަންޖެހޭ ޙާލަތެއް އޮތްކަމަށް ދައުލަތަށް ޤަބޫލު ކުރެވޭކަމަށް ވަކީލާ ވިދާޅުވިއެވެ. ސަބަބެއްގެ ގޮތުގައި ފާހަގަ ކުރެއްވީ މި ފައިސާއަކީ ދައުލަތަށް ލިބެންޖެހޭ ގިނަ އަދަދެއްގެ ފައިސާއަށްވެފައި، ރައީސް ޔާމީނު އޭރު އަދާކުރަމުންދިޔަ މަޤާމަށް ބަލާފައި ކަމަށެވެ. އެހިސާބުން ފަނޑިޔާރު މަހާޒް ވަނީ ދައުލަތަށް އިތުރަށް ސުވާލު ކުރައްވާފައެވެ.
"ތި ވިދާޅުވާ ސަބަބު ޖަސްޓިފައި ކުރެވެނީ ކިހިނެއްތޯ، އަޅުގަނޑު އަދިވެސް މި އިންނަނީ ކޮންމެސް ވަރަކަށް ނަގައިގަންނަން އުނދަގޫވެފައި، ޖޫރިމަނާ މައްޗަށް މި ޖައްސާ ސަބަބު، ކުރިން އިޝާރަތް ކުރައްވައިފި ފަނޑިޔާރަށް ލިބިގެންވާ އިހުތިޔާރެކޭ އެގޮތަށް މައްޗަށް ޖެއްސުމަކީ، އެ ޑިސްކްރީޝަން ކޮންމެސް ވަރަކަށް ޖަސްޓިފައިކޮށްލަދެއްވާ، ކްރިމިނަލް ކޯޓުގެ ނިންމުން ރަނގަޅުކަމަށް ވަކާލާތު ކުރައްވާނަމަ ރަނގަޅުވަނީ މިހެން މިހެން ވެގެންނޭ" - ފަނޑިޔާރު މަޙާޒް
ބުރާސްފަތި ދުވަހުގެ އަޑުއެހުން ނިންމަވާލެއްވީ ދެން އޮންނަ އަޑުއެހުމެއްގައި އެ ސުވާލަށް ޖަވާބު ދެއްވުމަށް ދައުލަތަށް އެންގެވުމަށްފަހުއެވެ. އަދި އެ އަޑުއެހުމުގައި ދައުލަތުން ދެން ހުރި ނުކުތާތަކަށް ޖަވާބުދިނުމާއި، އެކަންކަމަށް ދެ ފަރާތުން ވާހަކަ ދެއްކުމަށް ފުރުސަތު ދެއްވާނެކަން ފަނޑިޔާރު ފާހަގަކުރެއްވިއެވެ.
އެމްއެމްޕީއާރުސީގެ ހިޔާނާތުގައި ހިމެނޭ، ރިސޯޓެއްގެ ގޮތުގައި ތަރައްގީކުރުމަށް ކުއްޔަށް ދޫކުރި ގއ. ވޮޑުމުލާގެ އިކުއިޒިޝަން ކޮސްޓްގެ ގޮތުގައި ދައުލަތަށް ލިބެންޖެހޭ ފައިސާގެ ތެރެއިން އެއް މިލިއަން ޑޮލަރު އަމިއްލަފުޅު އެކައުންޓަށް ޖަމާކޮށް، އެފައިސާއިން މަނީ ލޯންޑަރ ކުރުމުގެ ކުށް، ރައީސް ޔާމީންގެ މައްޗަށް ސާބިތުވެ، އެމަނިކުފާނު ފަސް އަހަރަށް ޖަލަށްލުމާއެކު ފަސް މިލިއަން ޑޮލަރުން ޖޫރިމަނާކޮށް، އެފައިސާ ހަ މަސްދުވަހުގެ ތެރޭގައި މީރާއަށް ދެއްކުމަށް ކްރިމިނަލް ކޯޓުން ހުކުމްކުރީ 28 ނޮވެމްބަރު، 2019ގައެވެ. ކްރިމިނަލް ކޯޓުން ކުރި ހުކުމް ރަނގަޅު ނޫންކަމަށް ބުނެ، ރައީސް ޔާމީންގެ ފަރާތުން ހައިކޯޓުގައި އެ މައްސަލަ އިސްތިއުނާފްކުރިއެވެ.
ހައިކޯޓުގައި އިސްތިއުނާފްކުރި އެ މައްސަލާގައި މިދިޔަ ޖެނުއަރީ މަހުގެ 21 ވަނަ ދުވަހު ހައިކޯޓުން ވަނީ ކްރިމިނަލް ކޯޓުން ރައީސް ޔާމީންގެ މައްޗަށް އިއްވާފައިވާ ހުކުމަށް ތާއީދުކޮށް، ދަމަހައްޓާފައެވެ.
އެހެންކަމުން، ރައީސް ޔާމީންގެ ފަރާތުން، އެމަނިކުފާނުގެ ގާނޫނީ ޓީމުން އެ މައްސަލަ ސުޕްރީމް ކޯޓުގައި އިސްތިއުނާފު ކުރީއެވެ.
