ޔާމީން ޝަރީއަތް: ހައިކޯޓު މަރުޙަލާގައި ނުދައްކާ ވާހަކަތައް ސުޕްރީމް ކޯޓަށް ހުށައަޅާފައި

ކުރީގެ ރައީސް ޔާމީން އަބްދުލް ގައްޔޫމްގެ މައްޗަށް އިއްވާފައިވާ ހުކުމާ ގުޅިގެން ސުޕްރީމް ކޯޓުގައި އިސްތިއުނާފް ކޮށްފައިވާ މައްސަލައިގައި ހައިކޯޓު މަރުޙަލާގައި ވާހަކަ ދެކެވިފައިނުވާ ކަންކަން ރައީސް ޔާމީނު ސުޕްރީމް ކޯޓަށް އިސްތިއުނާފު ނުކުތާތަކުގެ ގޮތުގައި ހުށައަޅުއްވައިފިއެވެ.

މި މައްސަލައިގައި މީގެ ކުރިން 5 އަޑުއެހުމެއް ބާއްވައި ރައީސް ޔާމީނުގެ ފަރާތުން އިސްތިއުނާފު ނުކުތާތައް ވަނީ ހުށައަޅުއްވާފައެވެ. އެއާއެކު ބުރާސްފަތި ދުވަހުގެ އަޑުއެހުމުގައި ދައުލަތުން ވަނީ އިިސްތިއުނާފީ ނުކުތާތަކުގެ ޖަވާބު ދެއްވަވާފައެވެ.

ރައީސް ޔާމީނުގެ ފަރާތުން 22 އިސްތިއުނާފީ ނުކުތާއެއް ހުށައަޅާފައިވާއިރު، ދައުލަތުގެ ފަރާތުން އެ ނުކުތާތަކަށް ޖަވާބު ހުށައަޅުއްވަމުން ސީނިއަރ ޕަބްލިކް ޕްރޮސެކިއުޓަރ އާއިޝަތު މުޙައްމަދު ވިދާޅުވީ، ޔާމީނުގެ ފަރާތުން 3 ގޮތަކަށް އިސްތިއުނާފީ ނުކުތާތައް ހުށައަޅާފައިވާ ކަމަށެވެ. އެގޮތުން ވަރަށް އާންމު ބަހުސްތަކެއް ހިމެނޭ ނުކުތާތަކާއި، ހައިކޯޓުގެ މަރުޙަލާގައި ދައުލަތުން ވެސް އިއުތިރާޒު ކޮށްފައި ނުވާ ނުކުތާތަކަކާއި، ހައިކޯޓުގެ މަރުޙަލާގައި ފާހަގަވެސް ކޮށްފައިނުވާ ނުކުތާތަކެއް ހިމެނޭކަން ވަކީލާ ފާހަގަކުރެއްވިއެވެ.

ދައުލަތުގެ ވަކީލާ ވިދާޅުވީ، ހައިކޯޓުގެ ނިންމުން ޚިލާފުވަނީ ކޮން ޤާނޫނުތަކެއް ނުވަތަ ޤަވާއިދުތަކަކާތޯ ޔާމީނުގެ ފަރާތުން ސާފުކޮށްދީފައިނުވާ ކަމަށެވެ. އެގޮތުން ވަރަށް ގިނަ ނުކުތާތަކަށް ޤާނޫނީ ގޮތުން ދެވޭނެ ރައްދެއް ނެތްކަން ބަޔާން ކުރައްވާފައިވާނެކަމަށްވެސް ދައުލަތުގެ ވަކީލާ ވިދާޅުވިއެވެ.

ވަކީލާ ވިދާޅުވީ، ހައިކޯޓުގައި ނުދައްކާ ވާހަކަތަކެއް މައްޗަށް ބިނާކޮށް މި މަރުޙަލާގައި ސުޕްރީމް ކޯޓަށް އިސްތިއުނާފަށް ހުށަނޭޅޭނެކަން ސުޕްރީމް ކޯޓުން ކުރިން ނިންމާފައިވާ ނިންމުމެއްގައިވެސް ބަޔާން ކޮށްފައިވާކަމަށެވެ.

ޚުލާސާ ގޮތެއްގައި އެކަންކަން ފާހަގަ ކުރެއްވުމަށްފަހު ވަކީލާ ވަނީ ތަފްސީލީ ގޮތެއްގައި އިސްތިއުނާފީ ނުކުތާތަކަށް ޖަވާބުދެއްވާފައެވެ.

މި މައްސަލަ ބައްލަވާ ފަނޑިޔާރުންގެ މަޖިލީހުގައި ހިމެނިވަޑައިގަންނަވަނީ ފަނޑިޔާރު މަހާޒް ޢަލީ ޒާހިރާއި ފަނޑިޔާރު ޑރ. އަޒްމިރާލްދާ ޒާހިރާއި ފަނޑިޔާރު ޑރ. މުހައްމަދު އިބްރާހީމްއެވެ.