ސަޕޯޓަރުންގެ މައްސަލަ ބަލައި ފީފާއިން ހަންގޭރީއަށް އަދަބުދީފި

ފީފާ ވޯލްޑް ކަޕުގެ ޔޫރަޕް ކޮލިފައިންގައި އިންގްލެންޑާ ދެކޮޅަށް ކުޅުނު މެޗުގައި، ހަންގޭރީގެ ސަޕޯޓަރުން އިންގްލެންޑުގެ ބައެއް ކުޅުންތެރިންނާ ނަސްލީ ގޮތުން ދިމާކުރި މައްސަލަ ބަލައި، ފީފާއިން ހަންގޭރީއަށް އަދަބުދީފިއެވެ.

ހަންގޭރީގެ ބުޑަޕެސްޓުގައި ހުންނަ ޕުސްކާސް އެރީނާގައި މި މަހުގެ ދެވަނަ ކުޅުނު މެޗުން އިންގްލެންޑް މޮޅުވީ 4-0 ގެ ނަތީޖާއަކުންނެވެ. އެ މެޗުގައި ނަސްލީ ގޮތުން ދިމާކޮށްފައިވަނީ އިންގްލެންޑުގެ ފޯވާޑް ރަހީމް ސްޓާލިން އާއި ޖޫޑް ބެލިންހަމަށެވެ. އެގޮތުން ލަނޑު ޖެހުމަށްފަހު ސްޓާލިން އުފާފާޅުކުރުމުން ހަންގޭރީގެ ބައެއް ސަޕޯޓަރުން ވަނީ ސްޓާލިންއާ ދިމާލަށް ބޯން ބޭނުންކުރާ ބައެއް ތަށި ފަދަ ތަކެތި އުކާފައެވެ.

އެއާއެކު އިންގްލެންޑުގެ އެފްއޭއިން އެކަން ފީފާގެ ސަމާލުކަމަށް ގެނައިރު، އެ އިދާރާގެ ޑިސިޕްލިނަރީ ކޮމިޓީން ވަނީ މި މައްސަލަ ބަލާފައެވެ. އަދި މައްސަލަ ބެލުމަށްފަހު ވަނީ ފީފާއިން ވަނީ ހަންގޭރީން ދެން ކުޅޭ ދެ މެޗަށް ސަޕޯޓަރުން ވެއްދުން މަނާކޮށްފައެވެ. އަދި އެ މައްސަލައިގައި ފީފާއިން ވަނީ ހަންގޭރީ ފުޓްބޯޅަ ފެޑެރޭޝަން 158،400 (އެއްލައްކަ ފަންސާސް އަށްހާސް ހަތަރުސަތޭކަ) ޕައުންޑުން ޖޫރިމަނާކޮށްފައެވެ.

ފީފާއިން ހަންގޭރީއަށް އަދަބުދިންއިރު، ނިމިދިޔަ ޔޫރޯ ފުޓްބޯޅަ މުބާރާތުގައި ނަސްލީ ތަފާތުކުރުމުގެ މައްސަލައެއް ފެންމަތިވެ، ހަންގޭރީއަށް ޔުއެފާއިންވެސް ވަނީ އަދަބުދީފައެވެ.

އެ ފަހަރު ޔުއެފާއިން ނެރުނު ބަޔާނެއްގައި ބުނީ ޔޫރޯގެ ގްރޫޕް ސްޓޭޖުގައި ކުޅުނު މެޗުތައް ބަލަން އެ ދަނޑަށް ވަން ސަޕޯޓަރުންނާ މެދު ހަންގޭރީގެ ސަޕޯޓަރުން ތަފާތުކުރުން ގެންގުޅުނު ކަމަށާއި، އެގޮތުން ނަސްލީ ތަފާތުކުރުމުގެ އިބާރާތްތައްވެސް ބޭނުންކޮށްފައިވާ ކަމަށެވެ. އެހެންކަމުން އެ މައްސަލައިގައި ޕުސްކާސް އެރީނާގައި ހަންގޭރީން ދެން ކުޅުނު ތިން މެޗަށް ސަޕޯޓަރުން ވައްދަން ޔުއެފާއިން މަނާކުރިއެވެ.