ނައިޖީރިއާގައި ކޮލެރާ ފެތުރި ނުރައްކާތެރި ހާލަތަކަށް

އެފްރިކާގެ އެންމެ ބައިބޯ ގައުމުކަމަށްވާ ނައިޖީރިއާގައި ކޮލެރާ ފެތުރި އެ ބަލީގައި 2000 ށް ވުރެ ގިނަ މީހުން މަރުވެފައިވާ ކަމަށް އެގައުމުން ބުނެފިއެވެ.

ނައިޖީރިއާގެ ސިއްހަތާއި ބެހޭ ވުޒާރާއިން ބުނީ ކޮލެރާ ޖެހިގެން އެގައުމުން 2،300 މީހުން މިހާތަނަށް މަރުވެފައިވާ ކަމަށެވެ. އަދި އޭގެ ތެރޭގައި ގިނަ އަދަދެއްގެ ކުޑަ ކުދިންވެސް ހިމެނޭ ކަމަށް ބުނެއެވެ.

ނައިޖީރިއާގައި ފެނުގެ ޒަރިއްޔާއިން ފެތުރޭ ބަލިތައް ގިނައެވެ. އޭގެ ސަބަބަކީ އެގައުމުގައި އެކަށޭނެ އިންފްރާސްޓްރަކްޗާއެއް ނެތުން ކަމަށް ކަމާ ބެހޭ ފަރާތްތަކުން ބުނެއެވެ.

ނައިޖީރިއާގެ ސިއްހަތާއި ބެހޭ ވުޒާރާއިން ބުނީ އެގައުމުގައި މިފަހަރު ކޮލެރާ ފެތުރެނީ އެހެން ފަހަރުތަކަށްވުރެ ހަލުވިކޮށް ކަމަށެވެ. އަދި އެއީ ކޮވިޑްގެ ބަލިމަޑުކަމަށް ސަރުކާރުން ދޭ ސަމާލުކަމުގެ ސަބަބުން ވާގޮތެއް ކަމަށް ބެލެވެއެވެ.

ސިއްހަތާއި ބެހޭ ވުޒާރާއިން ބުނީ ކޮލެރާގެ ކޭސްތައް މިހާތަނަށް 25 ސްޓޭޓަކުން ފެނިފައިވާ ކަމަށެވެ. އަދި ވެރިރަށް އަބޫޖާއިންވެސް ކޮލެރާ ފެނިފައިވާ ކަމަށް ބުނެއެވެ.

ރިޕޯޓްތައް ބުނާ ގޮތުން މިއަހަރު ނައިޖީރިއާގައި ކޮލެރާ ފެތުރެންފެށީ މޫސުމީ ބަދަލުތަކުގެ ސަބަބުން އެގައުމަށް އާދަޔާ ޚިލާފަށް ބޯކޮށް ވާރޭވެހި ފެންބޮޑުވުމުގެ ސަބަބުންނެވެ.

ބަލި އެންމެ ބޮޑަށް ފެތުރިފައިވާ ހިސާބުތަކަށް ސިއްހީ އޮފިޝަލުންނާއި ބޭސް ފޮނުވާފައި ވާއިރު، ސަރުކާރުން ވަނީ ސާފުތާހިރުކަމާއި ރައްކާތެރިކަމާއެކު ފެން ބޭނުން ކުރާނެ ގޮތާމެދު އާއްމުން ހޭލުންތެރި ކުރުވަން ފަށާފައެވެ.