އުމުރުން 5 އަހަރުން މަތީގެ ކުދިންނަށް ފައިޒަރ ވެކްސިން ދިނުމުގެ ހުއްދައަށް އެދެނީ
މޮޑާނާ އިން ވެސް ދަނީ އުމުރުން ހަ އަހަރާއި 11 އަހަރާ ދެމެދުގެ ކުދިންނަށް ވެކްސިން ޓެސްޓް ކުރަމުން
އާބާދީގެ 2 މިލިއަން މީހުންނަށް ތިންވަނަ ޑޯޒެއް ދީފައި
އުމުރުން ފަސް އަހަރުން މަތީގެ ކުދިންނަށް ފައިޒަރ ވެކްސިން ދިނުމުގެ ހުއްދައަށް އެދޭނެ ކަމަށް ބަޔޯއެންޓެކުން ބުނެފިއެވެ.
އެ ކުންފުނިން ބުނީ، އުމުރުން ފަސް އަހަރާއި 11 އަހަރާ ދެމެދުގެ ކުދިންނަށް ފައިޒަރ ވެކްސިން ރައްކާތެރި ކަމަަށެވެ. އެހެން ނަމަވެސް 11 އަހަރުން ދަށުގެ ކުދިންނަށް ދޭނީ އެ އުމުރުން މަތީގެ ކުދިންނާއި މީހުންނަށް ދޭ ޑޯޒަށް ވުރެ ކުޑަ ޑޯޒެއް ކަމަށް އެކުންފުނިން ބުނެއެވެ.
އެ ކުންފުނިން ބުނީ، އެ އުމުރުގެ ކުދިންނަށް ވެކްސިން ދޭން ފެށުމުގެ ގޮތުން އެމެރިކާ އާއި ޔޫރަޕިއަން ޔޫނިއަން (އީޔޫ) ގެ ރެގިއުލޭޓަރީ އިދާރާތަކުގެ ހުއްދައަށް އެދި ވަރަށް އަވަހަށް ހުށަހަޅާނެއެވެ.
މިއީ 5 އަހަރުން މަތީގެ ކުދިންގެ މެދުގައި ކޮވިޑް ވެކްސިނެއް ޓެސްޓު ކުރުމަށް ފަހު ލިބުނު ފުރަތަމަ ނަތީޖާއެވެ. މޮޑާނާ އިން ވެސް ދަނީ އުމުރުން ހަ އަހަރާއި 11 އަހަރާ ދެމެދުގެ ކުދިންނަށް ވެކްސިން ޓެސްޓް ކުރަމުންނެވެ. މިހާރު ވެސް ފައިޒަރ އާއި މޮޑާނާގެ ވެކްސިން 12 އަހަރުން މަތީގެ ކުދިންނަށް ވަރަށް ގިނަ ގައުމުތަކުގައި ދަނީ ދެމުންނެވެ.
ކޮވިޑުގެ ނުރައްކާ ކުޑަކުދިންނަށް އޮންނަނީ ކުޑަ މިންވަރަކަށް ނަމަވެސް ހަލުވިކަމާއެކު ފެތުރޭ ޑެލްޓާ ވޭރިއެންޓު ޖެހިއްޖެ ނަމަ ކުޑަކުދިންގެ މެދުގައި ވެސް ސީރިއަސް ގިނަ ކޭސްތައް ފެނިދާނެކަމާ މެދު ތަޖުރިބާކާރުން ކަންބޮޑުވެ އެވެ.
އުމުރުން ފަސް އަހަރާއި 11 އަހަރާ ދެމެދުގެ ކުދިންނަށް ފައިޒަރ އިން ދިނީ 10 މައިކްރޯގްރާމްގެ ދެ ޑޯޒެވެ. ދެ ޑޯޒް ދެމެދުގައި 21 ދުވަސް ހޭދަކުރިއެވެ. އުމުރުން 12 އަހަރުން މަތީގެ އުމުރުފުރާއަށް ފައިޒަރ ވެކްސިންގެ ދެ ޑޯޒް ދެނީ 30 މައިކްރޯގްރާމުންނެވެ. ސައިޑްއިފެކްޓުތައް ފެނުނީ އެހެން އުމުރުތަކާ ވެސް އެއް ވަރަށް ކަމަށް އެ ކުންފުނިން ވަނީ ބުނެފައެވެ.
