ޓްރާންސްޕޯޓް އޮތޯރިޓީން ކަރަންޓް ގޮސް ޚިދުމަތަށް ބުރޫއަރާފައި!

މޯލްޑިވްސް ޓްރާންސްޕޯޓް އޮތޯރިޓީއިން ކަރަންޓުގެ ޚިދުމަތް ކެނޑި، އެތަނުން ދެމުންދާ ހިދްމަތްތަކަށް ބުރޫއަރައިފިއެވެ.

ޓްރާންސްޕޯޓް އޮތޯރިޓީއަށް ޚިދްމަތް ހޯދުމަށް ގޮސްހުރި މީހަކު "ރާއްޖެއެމްވީ"އަށް މައުލޫމާތުދެމުން ބުނީ ޓްރާންސްޕޯޓް އޮތޯރިޓީ ހޯމަ ދުވަހު އޮފީސް ހުޅުވިއިރުވެސް ކަރަންޓު ނެތް ކަމަށެވެ. ނަމަވެސް 09:00 އެހާކަންހާއިރު އެ އޮފީހުގެ ބަޔަކަށް ކަރަންޓް ލިބުނު ނަމަވެސް ހިދްމަތް ދެވޭވަރު ނުވާކަމަށް އޭނާ ބުންޏެވެ.

އާދިއްތަ ދުވަހު ވެސް ޓްރާންސްޕޯޓް އޮތޯރިޓީ ހުޅުވިއިރުވެސް ކަރަންޓް ނެތެވެ. އާދިއްތަ ދުވަހު ކަރަންޓް ލިބިފައިވަނީ 10:00 ހާކަންހާއިރެވެ. އޭނާ ބުނީ ކޮންމެ ދުވަހަކުވެސް ޓްރާންޕޯޓް އޮތޯރިޓީއަށް ޚިދްމަތް ހޯދުމަށް ގިނަ އަދަދެއްގެ ބަޔަކު ދާ ކަމަށާއި އެތަނުން ޚިދްމަތް ނުލިބޭތީ ޚިދްމަތް ހޯދަންދާ ފަރާތްތަކުގެ ހިތްހަމަ ނުޖެހުން އެބަހުރި ކަމަށެވެ.

މިކަމާ ގުޅިގެން އާދިއްތަ ދުވަހު ޓްރާންސްޕޯޓް އޮތޯރިޓީއަށް އެތައްފަހަރަކު ގުޅުމުންވެސް ވަނީ ޖަވާބު ލިބޭގޮތް ނުވެފައެވެ. އަދި ޓްރާންސްޕޯޓް އޮތޯރިޓީގެ ޗެއާރމަން މަހުދީ އިމާދު އަށާއި އެ އޮފީހުގެ އެހެން ދެ އިސްވެރިޔަކަށް ގުޅުމުންވެސް ފޯނަށް ޖަވާބު ދެއްވާފައެއް ނުވެއެވެ. ނަމަވެސް ހޯމަ ދުވަހު ހެނދުނު ޓްރާންސްޕޯޓް އޮތޯރިޓީގެ ޗެއާރމަނަށް ގުޅާލުމުން ވިދާޅުވީ ފަހުން ގުޅުއްވާނެ ކަމަށެވެ. ހާތަނަށް މަހުދީގެ ބަހެއް ލިބޭގޮތް ވަނީ ނުވެފައެވެ.

އެހެންކަމުން ޓްރާންސްޕޯޓް އޮތޯރިޓީއިން ކަރަންޓް ކަނޑައިގެންދިޔަ ސަބުބު ވަނީ އޮޅުންފިލާ ގޮތް ނުވެފައެވެ.ޓްރާންސްޕޯޓް އޮތޯރިޓީގެ ބައެއް މުވައްޒަފުންގެ ފަރާތުންނާއި އެތަނަށް ހިދްމަތް ހޯދުމަށްދާ ބައެއް ފަރާތްތަކުގެ ފަރާތުން މައުލޫމާތު ލިބިފައިވާގޮތުގައި ޓްރާންސްޕޯޓް އޮތޯރިޓީން ކަރަންޓްދަނީ އެ އޮފީސް ހުންނަ ހުރަވީ ބިލްޑިންގް ފާރުތަކުން އިމާރާތުގެ އެތެރެއަށް ފެން ލީކްވެ، ކަރަންޓް ވާތަކަށް ފެނުގެ އަސަރު ކުރާތީ އެވެ. ސްޓެލްކޯގެ މުއައްޒަފުންގެ ޓީމަކުން ދަނީ އެ ބިލްޑިންގގެ ކަރަންޓުގެ މައްސަލައަށް ދާއިމީ ހައްލެއް ހޯދުމަށް މަސައްކަތް ކުރަމުންނެވެ