މުޒާހަރާ ރޫޅާލުމުގައި ފުލުހުން އަމަލުކުރި ގޮތް ބަލައިދީ: އިދިކޮޅު ކޯލިޝަން
20 ސެޕްޓެމްބަރު 2021 | ހޯމަ 02:01އިދިކޮޅު ކޯލިޝަންގެ މުޒާހަރާއަކީ ފިޔަވަތީގައި ހުރި މައްސަލަތަކާ ގުޅިގެން ހިންގި މުޒާހަރާއެއް
އިދިކޮޅު ކޯލިޝަނުން ކުރިއަށްގެންދިޔަ މުޒާހަރާ
އިދިކޮޅުން ކުރިއަށްގެންދިޔަ މުޒާހަރާ ރޫޅާލުމަށް ފުލުހުން ހާލަތާ ނުބައްދަލު ބާރުގެ ބޭނުންކޮށް، މީޑިއާގެ މަސައްކަތަށް ހުރަސް އަޅައި ހިންގި އަމަލު އިދިކޮޅު ޕީޕީއެމް ޕީއެންސީ ކޯލިޝަނުން ކުށްވެރިކޮށްފިއެވެ.
ދައުލަތުގެ ބެލުމުގެ ދަށުގައި ތިބި ކުދިން ބަލަހައްޓާ ހުޅުމާލެ ފިޔަވަތީގައި ހުރި މައްސަލަތަކާ ގުޅިގެން އިދިކޮޅު ކޯލިޝަންގެ ފަރާތުން ވަނީ އާދިއްތަ ދުވަހުގެރޭ މުޒާހަރާ ކޮށްފައެވެ. ފުލުހުން ވަނީ ބާރުގެ ބޭނުންކޮށް މި މުޒާހަރާ ރޫޅާލާފައެވެ. މިކަމާ ގުޅިގެން އިދިކޮޅު ކޯލިޝަނުން ނެރުނު ބަޔާނުގައި ވަނީ އެ ކޯލިޝަނުން ކުރިއަށްގެންދިޔަ މުޒާހަރާއަކީ ގާނޫނު އަސާސީގެ 32 ވަނަ މާއްދާއިން ބާރު ލިބިގެން ސުލްހަވެރިކަމާއެކު ކުރިއަށްގެންދިޔަ މުޒާހަރާއެއް ކަމަށެވެ.
މުޒާހަރާ ރޫޅާލުމުގައި ފުލުހުން ބާރުގެ ބޭނުން ކުރުމާ ގުޅިގެން މުޒާހަރާގެ ބައިވެރިންނަށް އެކި ވަރުގެ އަނިޔާ ވެފައިވާކަމަށާއި، މުޒާހަރާގެ ދެ ބައިވެރިއެއްގެ ފައި މަތީ ޝީލްޑުން ޖެހުމުގެ ސަބަބުން ފައި ފަޅައިގެން ގޮސްފައިވާކަމަށް އިދިކޮޅު ކޯލިޝަނުން ބުނެފައިވެއެވެ. އަދި މުޒާހަރާ ކަވަރު ކުރުމުގައި ހަރަކާތްތެރިވި ނުސްވެރިއެއްގެ ބޯ ފަޅައިގެން ގޮސްފައިވާ ކަމަށް ވެސް ބުނެފައިވެއެވެ. އިދިކޮޅުން ބުނީ ފުލުހުން އެއްވެސް ވަރަކަށް ބަލާލުމެއްނެތި މުޒާހަރާގެ ބައިވެރިންނަށް އަމާޒުކޮށް ޕެޕަރ ސްޕްރޭ ޖަހައި، އެތައް ބަޔަކު ހައްޔަރުކޮށްފައިވާކަމަށެވެ. އަދި އެމީހުން އެއްވެސް ޝަރުތަކާ ނުލާ ދޫކޮށްލުމަށް އިދިކޮޅު ކޯލިޝަނުން ވަނީ ގޮވާލާފައެވެ.
މުޒާހަރާ ރޫޅާލުމުގައި ފުލުހުން އަމަލުކުރި ގޮތް އިދިކޮޅު ކޯލިޝަނުން ވަނީ ކުށްވެރިކޮށްފައެވެ. އަދި އިދިކޮޅުން ވަނީ މިކަން ބަލައި، އަޅަންޖެހޭ ފިޔަވަޅުތައް އެޅުމަށް ހިއުމަންރައިޓްސް ކޮމިޝަނާއި، ނޭޝަނަލް އިންޓެގްރިޓީ ކޮމިޝަން ފަދަ ދައުލަތުގެ މުއައްސަސާތަކަށް ގޮވާލާފައެވެ.
މީޑިއާގެ ޙައްޤުތަކަށް އަރައިގަނެ، މީޑިއާތަކަށް ހުރަސް އަޅައި، ނޫސްވެރިނަށް ދެމުން ގެންދާ އަނިޔާތައް ބަލައި ފިޔަވަޅު އެޅުމަށް މީޑިއާ ކައުންސިލާއި ބްރޯޑްކާސްޓިންގ ކޮމިޝަން ފަދަ ކަމާ ބެހޭ މުއައްސަސާތަކަށް އިދިކޮޅުން ވަނީ ގޮވާލާފައެވެ.
