މުޒާހަރާ ކުރީ ފިޔަވަތީގެ މައްސަލަތަކާ ގުޅިގެން، ގޮވާލީ ރައީސް ޔާމީން މިނިވަން ކުރުމަށް
19 ސެޕްޓެމްބަރު 2021 | އާދީއްތަ 20:04މުޒާހަރާ ރޫޅާލާފައިވަނީ ބާރުގެ ބޭނުންކޮށްގެން
އިދިކޮޅު ކޯލިޝަނުން ކުރިއަށްގެންދިޔަ މުޒާހަރާ
އާދިއްތަ ދުވަހުގެރޭ އިދިކޮޅު ކޯލިޝަނުން ކުރިއަށްގެންދިޔަ މުޒާހަރާ ފުލުހުން ރޫޅާލައިފިއެވެ.
އިދިކޮޅު ކޯލިޝަނުން ކުރިއަށްގެންދިޔަ މުޒާހަރާއަކީ ދައުލަތުގެ ބެލުމުގެ ދަށުގައި ތިބި ކުދިން ބަލަހައްޓާ ހުޅުމާލެ ފިޔަވަތީގައި ހުރި މައްސަލަތަކާއި ގުޅިގެން އެކަންކަން ހައްލުކުރުން އަވަސްކުރުމަށް ގޮވާލައި ކުރިއަށް ގެންދިޔަ މުޒާހަރާއެއް ކަމަށް ބުނެފައިވެއެވެ.
މުޒާހަރާ ފެށީ ޕީޕީއެމް އޮފީސް ކުރިމަތިންނެވެ. މުޒާހަރާ ފެށި ހިސާބުން އެސްއޯ ފުލުހުން ވަނީ މުޒާހަރާ ހުއްޓުވަން މަސައްކަތް ކޮށްފައެވެ. އަދި މުޒާހަރާ ކުރިއަށް ގެންދިއުމަށް ފުރުސަތު ނުދޭނެ ކަމަށް ބުނެ މުޒާހަރާ ވަނީ ރޫޅާލާފައެވެ.
އިދިކޮޅު ކޯލިޝަނުން އާދިއްތަ ދުވަހުގެރޭ ކުރިއަށްގެންދިޔަ މުޒާހަރާއަކީ ފިޔަވަތީގެ ހާލަތު ގޯހުން ގޯހަށް ދާތީ އެކަމާ ގުޅިގެން ކަމަށް ބުނެ ކުރިއަށްގެންދިޔަ މުޒާހަރާއެކެވެ. އެހެންނަމަވެސް މުޒާހަރާގެ ބައިވެރިން މައިގަނޑު ގޮތެއްގައި ގޮވާލާފައިވަނީ ރައީސް ޔާމީން މިނިވަންކުރުމަށާއި، ރައީސް ޔާމީނަށް އިންސާފު ހޯދައިދިނުމަށެވެ. އަދި ރާއްޖޭގެ ޝަރުއީ ނިޒާމު އިސްލާހުކުރުމަށް ވެސް ގޮވާލާފައިވެއެވެ.
ފުލުހުން މުޒާހަރާ ރޫޅާލުމަށް ބާރުގެ ބޭނުން ކޮށް ޕެޕަރ ސްޕްރޭ ވެސް ޖަހާފައިވެއެވެ. މުޒާހަރާ ކަވަރު ކުރަން އުޅުނު ނޫސްވެރިއެއްގެ ބޯ ފެޅިފައިވާކަމަށް ވެސް މައުލޫމާތު ލިބެއެވެ.
