އިސްކުރު ފެން ބޭނުން ކުރުން އިތުރުކުރުމަށް ޕްރޮގްރާމްތަކެއް ހިންގަނީ
އިސްކުރު ފެނަކީ ޑަބްލިއުއެޗްއޯ ސްޓޭންޑަޑަށްވުރެ ކޮލިޓީ ރަނގަޅު ފެނެއް
މިނިސްޓްރީ އޮފް އެންވަޔަރަމަންޓް، ކްލައިމެޓް ޗޭންޖް އެންޑް ޓެކްނޯލޮޖީގެ ސްޓޭޓް މިނިސްޓަރ އަހުމަދު މުޖުތަބާ
އިސްކުރު ފެން ބޭނުން ކުރުން އިތުރު ކުރުމަށް ޕްރޮގްރާމްތަކެއް ހިންގުމަށް ނިންމާފައިވާ ކަމަށް އެންވަޔަރަމަންޓް މިނިސްޓްރީގެ ސްޓޭޓް މިނިސްޓަރ އަހުމަދު މުޖުތަބާ ވިދާޅުވެއްޖެއެވެ.
ރާއްޖެ ޓީވީގެ "ފަލަ ސުރުޚީ" ޕްރޮގްރާމްގައި ވާހަކަ ދައްކަވަމުން ސްޓޭޓް މިނިސްޓަރ މުޖުތަބާ ވިދާޅުވީ ސަރުކާރުން އިސްކުރު ފެން ބޭނުން ކުރަން މީހުން އަހުލުވެރިކުރުމަށް ޕްރޮގްރާމްތަކެއް ހިންގުމަށް ނިންމާފައިވާ ކަމަށެވެ.
މުޖުތަބާ ވިދާޅުވީ ރާއްޖޭގައި މިހާރު ބޭނުންކުރާ އިސްކުރު ފެނަކީ ވޯލްޑް ހެލްތު އޯގަނައިޒޭޝަން (ޑަބްލިއުއެޗްއޯ) ސްޓޭންޑަޑަށްވުރެ ފެންވަރު ރަނގަޅު ފެނެއް ކަމަށެވެ. އަދި ފެނުގެ ކޮލިޓީ ޓެސްޓުކުރުން ކޮންމެ ދުވަހަކުވެސް ކުރިޔަށް ގެންދާކަމަށް މުޖުތަބާ ވިދާޅުވިއެވެ.
މުޖުތަބާ ވިދާޅުވީ، އިސްކުރު ފެން ހުއްޓައި ފެންފުޅި ގަނެގެން ފެން ބޯން ނުޖެހޭނެ ކަމަށާއި، މިހާރު ފެންފުޅި ގަނެގެން ބުއިން އާންމުވެފައިވާ ކަމަށެވެ.
މުޖުތަބާ ވިދާޅުވީ ފެންފުޅި ގަތުމުގެ އިތުރުން ބައެއް ފަރާތްތަކުން ފިލްޓަރު ގަނެގެން ބޭނުންކުރާކަން ފާހަގަ ކުރެވިފައިވާ ކަމަށާއި، އަދި އެއީ މައްސަލައެއް ނޫން ކަމަށެވެ. އެކަމަކު ފިލްޓަރާއި ނުލާވެސް އިސްކުރު ފެން ބޭނުން ކުރެވޭނެ ކަމަށް މުޖުތަބާ ވިދާޅުވިއެވެ.
