އަތޮޅުތަކުން ފެނުނު 106 ކޭހާއެކު ފާއިތުވި 24 ގަޑިއިރު ރާއްޖެއިން ފެނުނު ކޮވިޑް ކޭސްތަކުގެ އަދަދު 162ށް
މާލެއިން ޕޮޒިޓިވްވެފައިވަނީ 49 މީހުން
ރެންޑަމް ސާމްޕަލް ނަގަނީ
އަތޮޅުތަކުން ފެނުނު 106 ކޭހާއެކު ފާއިތުވި 24 ގަޑިއިރު ރާއްޖެއިން ކޮވިޑަށް ޕޮޒިޓިވްވި މީހުންގެ އަދަދު 162ށް އަރައިފިއެވެ.
ފާއިތުވި ތިން ދުވަހުވެސް ރާއްޖެއިން ފެނުނު ކޮވިޑް ކޭސްތަކުގެ އަދަދު ހުރީ 100ން ދަށުގައެވެ. އެއަށްފަހު ހޮނިހިރު ދުވަހު ފެނުނު ކޮވިޑް ކޭސްތަކުގެ އަދަދު އިތުރުވެފައި މިވަނީ އަތޮޅުތަކުގެ ބައެއް ރަށްރަށުން ގިނަ އަދަދަކަށް ކޮވިޑް ކޭސްތައް ފެންނަމުންދިއުމުންނެވެ. އެގޮތުން މިސެޕްޓެމްބަރ މަހުގެ 15 ވަނަ ދުވަހު މޮނިޓަރިންގއަށް ގެނެސްފައިވާ ތ ދިޔަމިގިލިން ކޮވިޑަށް ޕޮޒިޓިވްވި މީހުންގެ އަދަދު ވަނީ 30ށް އަރާފައެވެ.
ފާއިތުވި 24 ގަޑިއިރު 5195 ސާމްޕަލް ނަގައި ޓެސްޓްކޮށްފައިވެއެވެ. އޭގެތެރެއިން މާލެއިން ޕޮޒިޓިވްވެފައިވަނީ 49 މީހުންނެވެ. މީގެއިތުރުން ހިންގަމުންދާ ރިސޯޓްތަކުން 6 މީހުން ޕޮޒިޓިވްވެފައިވާއިރު ލިވްއެބޯރޑްތަކުން އެކަކު ވަނީ ޕޮޒިޓިވްވެފައެވެ.
މިއާއެކު މުޅި ރާއްޖެއިން ކޮވިޑަށް ޕޮޒިޓިވްވި މީހުންގެ ޖުމްލަ އަދަދު ވަނީ 83،494ށް އަރާފައެވެ. އަދި މިވަގުތު އެކްޓިވް ކޭހުގެ ގޮތުގައި 1708 ކޭހެއް ގުނަމުންދާއިރު އޭގެތެރެއިން 23 މީހަކަށް އަންނަނީ ހޮސްޕިޓަލްތަކުގައި އެޑްމިޓްކޮށްގެން ފަރުވާދެމުންނެވެ.
ރާއްޖެއިން މިހާތަނަށް 229 މީހަކު ވަނީ މިބަލީގައި ނިޔާވެފައެވެ.
