ޔުނައިޓެޑުގައި ލިންގާޑް މަޑުކުރާނެ: މޮއިސް

އިންގްލެންޑުގެ މިޑްފީލްޑަރު ޖެސޭ ލިންގާޑް މެންޗެސްޓާ ޔުނައިޓެޑުގައި މަޑުކުރާނެ ކަމަށް ވެސްޓް ހޭމް ޔުނައިޓެޑުގެ ކޯޗު ޑޭވިޑް މޮއިސް ބުނެފިއެވެ.

މިދިޔަ ފިނި މޫސުމުގެ ޓްރާންސްފާ ބާޒާރުގައި ލޯނު އެއްބަސްވުމެއްގެ ދަށުން ވެސްޓް ހޭމަށް ބަދަލުވެ، އެ ޓީމުގައި އުމުރުން 28 އަހަރުގެ ލިންގާޑް ވަނީ ތަފާތު މޮޅު ކުޅުމެއް ދައްކާފައެވެ. އެގޮތުން ވެސްޓް ހޭމަށް ކުޅެދިން 16 މެޗުގައި އޭނާ ވަނީ ނުވަ ލަނޑު ޖަހާފައެވެ. އެއާއެކު ލިންގާޑް އަލުން އަނބުރާ ގެންދަން ވެސްޓް ހޭމުންވެސް މަސައްކަތްކުރަމުން އަންނަ ކަމަށް ރިޕޯޓުތައް ބުނެއެވެ.

ލޯނު އުސޫލުން ވެސްޓް ހޭމަށް ކުޅުމަށްފަހު މި ސީޒަނުގައި ލިންގާޑް އަލުން ޔުނައިޓެޑާ ގުޅުނުއިރު، ޔުނައިޓެޑާއެކު ލިންގާޑް މިހާރު ހަދާފައި އޮތް އެއްބަސްވުން މި ސީޒަން ނިމުމުން ހަމަވާނެއެވެ. އެއާއެކު ލިންގާޑުގެ އެއްބަސްވުން އާކުރުމުގެ މަޝްވަރާތައް ޔުނައިޓެޑުން ފެށި ނަމަވެސް، އިނގިރޭސި މީޑިއާ ރިޕޯޓުތައް ބުނާ ގޮތުން ޔުނައިޓެޑުން ފުރުސަތު ލިބުން މަދުވުމާއެކު، ކުލަބު ބަދަލުކުރަން ލިންގާޑް ބޭނުންވެއެވެ. އެހެންކަމުން ޔުނައިޓެޑުގެ އެއްބަސްވުން އާކުރަން އޭނާ ދެކޮޅު ހަދާފައިވާ ކަމަށްވެސް ރިޕޯޓުތައް ބުނެއެވެ.

ނަމަވެސް އިނގިރޭސި ޕްރިމިއާ ލީގުގައި އާދީއްތަ ދުވަހުގެރޭ ޔުނައިޓެޑާ ދެކޮޅަށް ކުޅެން އޮތް މެޗުގެ ކުރިން ބޭއްވި ނޫސްވެރިންގެ ބައްދަލުވުމުގައި ވެސްޓް ހޭމުގެ ކޯޗު މޮއިސް ބުނީ މި ފަހަރުގެ ޓްރާންސްފާ ބާޒާރު ބަންދުވުމުގެ ކުރިން ޔުނައިޓެޑުގެ ކޯޗު އޮލެ ގުނަ ސޯލްޝެއާއާ މަޝްވަރާކުރި ކަމަށާއި، އެ މަޝްވަރާގައި ޔުނައިޓެޑުގައި ލިންގާޑް ބަހައްޓަން ބޭނުންވާ ކަމަށް ސޯލްޝެއާ އޭނާގެ ގާތުގައި ބުނެފައިވާ ކަމަށެވެ.

އެހެންކަމުން މި ސީޒަނަށްފަހު ލިންގާޑުގެ އެއްބަސްވުން ހަމަވި ނަމަވެސް، އޭނާ ޔުނައިޓެޑުގައި މަޑުކުރާނެ ކަމުގެ ޔަގީންކަން އެބައޮތް ކަމަށް މޮއިސް ބުންޏެވެ. އަދި ވެސްޓް ހޭމުން ލިންގާޑުގެ ސޮއި ހޯދުމާ ގާތަށްވެސް އަދި މިހާތަނަށް ދެވިފައި ނުވާ ކަމަށް މޮއިސް ވަނީ ބުނެފައެވެ.

ޔުނައިޓެޑުގައި ލިންގާޑް މަޑުކުރާނެ ކަމަށް މޮއިސް ބުނި ނަމަވެސް، އެ ޓީމުގެ ފުރަތަމ އެގާރައިން ލިންގާޑަށް ފުރުސަތު ލިބުން ވަނީ މަދުވެފައެވެ. އެގޮތުން މިހާތަނަށް ޕްރިމިއާ ލީގުގައި ލިންގާޑް އެންމެ ދެ މެޗުގައި ކުޅެފައިވާއިރު، އެ ދެ މެޗުގައިވެސް އޭނާ ކުޅެން އަރާފައިވަނީ ބަދަލު ކުޅުންތެރިއެއްގެ ގޮތުގައެވެ. އަދި ޔުއެފާ ޗެމްޕިއަންސް ލީގުގައި މިދިޔަ ހަފުތާގައި ކުޅުނު މެޗުން ޔަންގް ބޯއިސް އަތުން ޔުނައިޓެޑް ބަލިވީ އިތުބާރު ފޯވާޑް ކްރިސްޓިއާނޯ ރޮނާލްޑޯގެ ބަދަލުގައި ފަހު ވަގުތު ކުޅެން އެރި ލިންގާޑް ހެދި ގޯހަކުންނެވެ.

އެކަމަކު ލިންގާޑް ވވަނީ މިހާތަނަށް ޔުނައިޓެޑަށް ކުޅެދިން 213 މެޗުގައި 34 ލަނޑު ޖަހާފައެވެ. އަދި މީގެ ކުރިން އޭނާ ވަނީ ޔުނައިޓެޑާއެކު އެފްއޭ ކަޕާއި، އިނގިރޭސި ލީގު ކަޕާއި، އެފްއޭ ކޮމިއުނިޓީ ޝީލްޑުގެ އިތުރުން ޔުއެފާ ޔޫރޮޕާ ލީގު ކާމިޔާބުކޮށްފައެވެ.