ސިވިލް ސާވިސް މުވައްޒަފުންނަށް މަގާމުގެ ކުރިއެރުން ނުލިބުމާއި މުސާރައިގެ މައްސަލާގައި އާދިއްތަ ދުވަހު ކަޅު ހެދުމުގައި ވަޒީފާޔަށް ނުކުންނަން ނިންމައިފިއެވެ.

ސިވިލް ސާވަންޓްސް އެސޯސިއޭޝަނުން ބުނީ އާދިއްތަ ދުވަހު ސިވިލް ސާވިސް މުވައްޒަފުން އިހުތިޖާޖު ކުރަން ނިންމާފައިވާ ކަމަށާއި، މުޅި ރާއްޖޭގައި މި އިހުތިޖާޖު ކުރިއަށްދާނެ ކަމަށެވެ. އެގޮތުން މުވައްޒަފުން އާދިއްތަ ދުވަހު ޑިއުޓީއަށް ނުކުންނާނީ ކަޅު ހެދުމުގައި ކަމަށް އެސޯޝިއޭޝަނުން ބުނެއެވެ.

މި އިހުތިޖާޖު ރާވާ ހިންގުމުގައި އެންމެ އިސްކޮށް ހަރަކާތްތެރިވާ ސިވިލް ސާވަންޓްސް އެސޯސިއޭޝަން ބުނީ މުވައްޒަފުންގެ ގިނަ ކަންބޮޑުވުންތަކެއް އެބަހުރި ކަމަށާއި، ކަންބޮޑުވުންތަކެއް ހައްލު ނުލިބި ގިނަ ދުވަސްތަކެއް ވެފައިވާ ކަމަށެވެ. ސިވިލް މުވައްޒަފުންނަކީ ރައްޔިތުންނަށް ގިނަ ޚިދުމަތްތެކެއް ކޮށްދޭ ބަޔަކަށްވާއިރު، ލިބޭ އާމްދަނީ އަކީ އެކަށީގެންވާ އަދަދެއް ނޫންކަން އެ ސޯޝިއޭޝަނުން ފާހަގަކޮށްފައިވެއެވެ. އަދި ގިނަ މުވައްޒަފުން މި އިހުތިޖާޖުގައި ބައިވެރިވަނީ ވަނީ މުސާރައިގެ މައްސަލައާ ގުޅިގެން ކަމަށް ބުނެއެވެ.

މީގެ އިތުރުން ސިވިލް ސާވަންޓްސް އެސޯޝިއޭޝަން ބުނީ މުވައްޒަފުން މައިގަނޑު ޑިމާންޑަކީ ސެޓްފިކެޓަަށް ވަޒީފާގެ ކުރިއެރުން ދިނުން ކަމަށާއި، ސަރުކާރުގެ ސިޔާސީ މަގާމުތަކުގައި މަސައްކަތްކުރާ މީހުންނަށް ލިބޭ ލިވިން އެލަވަންސް ދިނުން ކަމަށެވެ. އަދި މިނިމަމް ވޭޖް އަވަސް ކޮށްދިނުމަކީ ވެސް ޑިމާންޑެއް ކަަމަށް އެސޯޝިއޭޝަނުން ބުނެއެވެ.

އާދިއްތަ ދުވަހު މި އިހުތިޖާޖު ފަށާއިރު، ސަރުކާރުގެ ޖަވާބެއް ނުލިބިއްޖެނަމަ ހޯމަ ދުވަހުން ފެށިގެން މަސައްކަތް ހުއްޓާލާނެ ކަމަށް ވެސް އެސޯޝިއޭޝަނުން ބުނެއެވެ.

ސިވިލް ސާވަންޓުންގެ ގޮތުގައި 25،000 އެއްހާ މީހުން މަސައްކަތް ކުރަމުން އަންނަ އިރު، ދައުލަތުގެ މުވައްޒަފުންގެ ތެރެއިން އެންމެ ކުޑަ އުޖޫރައެއް ލިބެނީ އެމީހުންނަށެވެ.

ދައުލަތުގެ މުސާރައިގެ އޮނިގަނޑު މުރާޖައާކޮށް ގެންނަން ޖެހޭ ބަދަލުތައް ގެނައުމަކީ ސަރުކާރުގެ 100 ދުވަހުގެ ވައުދުތަކުގެ ތެރޭގައި ހިމެނޭ ކަމެކެވެ.