މަސައްކަތުގެ ރަސްމީ ގަޑީގައި ނުވަތަ ރަސްމީ ގަޑީގެ ބޭރުންވެސް ރަސްމީ މަސައްކަތުގައި އުޅޭ އެއްވެސް ވަގުތެއްގައި އެއްވެސް ސިޔާސީ ހަރަކާތެއްގައި ސިވިލް ސަރވިސް މުވައްޒަފުން ބައިވެރިވާނަމަ ވަޒީފާއިން ވަކިކުރެވޭގޮތަށް ދިވެހި ސިވިލް ސަރވިސްގެ ގަވާއިދަށް އިސްލާހު ގެނެސް ގެޒެޓްކޮށްފިއެވެ.

2014 ވަނަ އަހަރު އެކުލަވާލާފައިވާ މިގަވާއިދަށް ގެނައި 8 ވަނަ އިސްލާހުގައި 272 ވަނަ މާއްދާގައި ވަޒީފާއިން ވަކިކުރެވޭފަދަ ކުށްތައް ވަނީ ބަޔާންކޮށްފައެވެ. އެގޮތުން 15 ކަމެއް ކުށެއްގެ ގޮތުގައި ފާހަގަކޮށްފައިވާއިރު މިއިން ކުށެއްކޮށްފިނަމަ މިގަވާއިދުގައިވާ ގޮތުގެ މަތިން އެމުވައްޒަފަކު ވަޒީފާއިން ވަކިކުރެވޭނެއެވެ.

މިމާއްދާގެ ށ ގައި ބުނެފައިވަނީ މުވައްޒަފުގެ މަގާމުގެ މަސްއޫލިއްޔަތު އަދާކުރުމުގައި ވަކި ފަރާތަކަށް ޖެހިފައިވާކަން ދޭހަވާ ފަދަ ގޮތަކަށް ނުވަތަ އޭނާގެ ވާޖިބުތަކާއި މަސްއޫލިއްޔަތުތަކަށް ހުރަސްއެޅޭ ފަދަ ގޮތަކަށް އެއްވެސް ސިޔާސީ ހަރަކާތެއްގައި ބައިވެރިވުމަކީ ވަޒީފާއިން ވަކިކުރެވިދާނެ ފަދަ ކުށެއްކަމަށެވެ. މީގެއިތުރުން މުވައްޒަފުގެ މަގާމުގެ މަސްއޫލިއްޔަތު އަދާކުރުމުގައި ނުވަތަ މަގާމުގެ ހައިސިއްޔަތުން ޚިދުމަތް ދިނުމުގައި ސިޔާސީ އެއްވެސް ތައައްސުބެއް ގެންގުޅޭކަމަށްވާނަމަވެސް އެމުވައްޒަފަކު ވަޒީފާއިން ވަކިކުރެވިދާނެއެވެ.

272 ވަނަ މާއްދާގެ ރ ގައި ބުނެފައިވަނީ އިދާރާގެ ތެރޭގައި ބަދުއަޚުލާގީ ޢަމަލު ހިންގުމާއި، އޮރިޔާންކާޑު ގެންގުޅުމާއި، އޮރިޔާންކާޑު ދެއްކުމާއި، ބެލުމާއި، ޖިންސީ ޝައުގުވެރިކަން ދޭހަކޮށްދޭ އެއްވެސް ހަރަކާތެއް ނުވަތަ އަމަލެއް ހިންގުމަކީވެސް ވަޒީފާއިން ވަކިކުރެވިދާނެ ކުށެއްކަމަށެވެ. އަދި ވަޒީފާ އަދާކުރާ މާހައުލުގައި ނުރައްކާތެރި އަމަލެއް ނުވަތަ ހަމަނުޖެހުމެއް ހިންގުން ނުވަތަ އެފަދަ ކަމެއް ކޮށްފާނެ ކަމުގެ އިންޒާރުދިނުމަކީވެސް ވަޒީފާއިން ވަކިކުރެވިދާނެފަދަ އަމަލެކެވެ.

މުވައްޒަފެއްގެ ފުރާނައަށް ނުވަތަ ހަށިގަނޑަށް ގެއްލުމެއް ދީފާނެކަމުގެ ބިރު ދެއްކުން ނުވަތަ އިންޒާރުދިނުމާއި މަސައްކަތަށް ހާޒިރުވިއިރު ގާނޫނުގައި ބަޔާންކޮށްފައިވާ ފަދަ ނުރައްކާތެރި ހަތިޔާރެއް ގެނައުމަކީވެސް ވަޒީފާއިން ވަކިކުރެވިދާނެ ކުށެކެވެ.

މަސައްކަތުގެ މާހައުލުގައި ޚިދުމަތް ލިބިގަންނަން އަންނަ ފަރާތަކަށް ނުވަތަ އެހެން މުވައްޒަފަކަށް ޖިންސީ ގޯނާ ކުރުމަކީވެސް އެފަދަ ކުށެކެވެ. އޮފީސް މާހައުލުގައި ރުހުމުގައިވިޔަސް އަދި ނުރުހުމުގައި ވިޔަސް ޖިންސީ އަމަލެއް ހިންގުމާއި، ޖިންސީ ގޯނާކުރުމަކީވެސް ވަޒީފާއިން ވަކިކުރެވޭނެ ކުށެކެވެ. މީގެއިތުރުން ދައުލަތުގެ މުދަލުން ވައްކަން ކުރުމާއި، ރިޝްވަތު ދިނުމާއި ރިޝްވަތު ހިފުމަކީވެސް ވަޒީފާއިން ވަކިކުރެވޭނެ ކުށްކުށެވެ.

ވިދި ވިދިގެން ހަތް ދުވަހަށް، ވަޒީފާއަށް ހާޒިރުނުވެ ހުރުން ނުވަތަ އަހަރު ދުވަހުގެ ތެރޭގައި 15 ދުވަހު ވަޒީފާއަށް ހާޒިރުނުވެ ހުރެއްޖެކަމަށްވާނަމަވެސް އެމުވައްޒަފަކު ވަޒީފާއިން ވަކިކުރެވިދާނެއެވެ.

ގާނޫނާއި ގަވާއިދާ ޚިލާފަށް ދައުލަތުގެ ސިއްރު މައުލޫމާތު ހާމަ ކުރުން، ދޫ ކުރުން، ބޭރު ކުރުން، ކޮޕީހެދުން، ރިކޯޑު ކުރުން ނުވަތަ މިއިން ކަމަކަށް މަގުފަހި ކުރުން، ނުވަތަ މިއިން ކަމަކަށް އެހީތެރިވެދިނުމާއި، މިއިން ކަމެއް ކުރުމުގައި ބައިވެރިވުމަކީވެސް ކުށެކެވެ. ރަސްމީ ހައިސިއްޔަތުން މުވައްޒަފަށް ލިބިފައިވާ މައުލޫމާތެއް، ނަހަމަގޮތުގައި ބޭނުންކުރުމަކީވެސް އެމުވައްޒަފެއްގެ ވަޒީފާ ގެއްލިގެން ހިނގައިދާނެ ކަމެކެވެ.

މިގަވާއިދުގައި ތިން ދަރަޖައަކަށް ކުށްތަކެއް ބަހާފައިވެއެވެ. އޭގެތެރޭގައި ވަޒީފާއަށް ހާޒިރުވުމުގެ ކަންކަމާއި ރަސްމީ ގަޑީގައި އަމިއްލަ މަސައްކަތްކުރުމާއި ރަސްމީ ގަޑީގައި ސިޔާސީ ވާހަކަދެއްކުން ފަދަ ކުށްތައް ވަނީ ހިމަނާފައެވެ.