ސިޔާސީ ކަމަކާ ގުޅިގެން، ކުރިން ވަޒީފާއިން ވަކިކުރި ގޮތަށް މިހާރު ނުކުރެވޭނެ – ސީއެސްސީ
ރަސްމީ ގަޑިއާއި، ރަސްމީ މަސައްކަތް ނޫން ގަޑިތަކުގައި މުވައްޒަފުންނަށް ސިޔާސީ ކަންކަމުގައި އުޅެވޭނެ
ވެލާނާގެ - ސިވިލް ސަރވިސް ގަވާއިދަށް ބަދަލު ގެނެސް، މުވައްޒަފުން ވަޒީފާއިން ވަކިކުރެވޭނެ ގޮތްތައް ވަނީ ތަފްސީލުކޮށްދީފައި
ސިޔާސީ ކަންކަމުގައި ބައިވެރިވެގެން ވަޒީފާއިން ވަކިކުރާ ގޮތަށް ނިންމާފައިވަނީ ކުރިން ހަދާފައި އޮތް ގަވާއިދުގައި ކަމަށާއި، ނަމަވެސް ގާނޫނުގައިވާ ގޮތަށް އެއަށް ބަދަލު ގެނެސް މުވައްޒަފުންނަށް ވަޒީފާގެ ބިރުވެރިކަމެއް ނެތި އުޅެވޭނެ ގޮތަށް ގަވާއިދަށް ބަދަލު ގެނެސްފައިވާ ކަމަށް ސިވިލް ސަރވިސް ކޮމިޝަނުން ބުނެފިއެވެ.
2014 ވަނަ އަހަރު, އޭރުގެ ރައީސް ޢަބްދުﷲ ޔާމީންގެ ވެރިކަމުގައި ސިވިލްސަރވިސްގެ ގާނޫނަށް ބަދަލު ގެނެސް, އޭރު ސަރުކާރާ ދެކޮޅު ސިޔާސީ ހަރަކާތްތަކުގައި ބައިވެރިވި މުވައްޒަފުން ވަޒީފާއިން ވަކިކުރަމުން ގެންދިޔައެވެ. އަދި ގަވާއިދުގައި ބުނެފައިވަނީ، އެ ގަވާއިދާ ޚިލާފަށް ސިޔާސީ ހަރަކާތެއް ހިންގުން ނުވަތަ ބައިވެރިވުން ކަމުގައި ބުނެފައިވެއެވެ.
އަދި މި ގަވާއިދުގެ ދަށުން, ސަރުކާރާ ދެކޮޅު ނުވަތަ ސަރުކާރުގެ ވެރިކަން ކުރި ޕާޓީގެ ޚިޔާލާ ތަފާތު ޚިޔާލު ގެންގުޅުނު މުވައްޒަފުން ވަޒީފާއިން ވަކިކުރަމުން ގެންދިޔައެވެ. މިއީ 1 ވަނަ ދަރަޖައިގެ ކުށެއްގެ ގޮތުގައި ވަނީ ހިމަނާފައެވެ.
ސިވިލް ސަރވިސް ކޮމިޝަންގެ މެމްބަރު ފާޠިމަތު ޢާމިރާ ރާއްޖެ އެމްވީއަށް ވިދާޅުވީ, ސިޔާސީ ކަންކަމުގައި މުވައްޒަފުން ބައިވެރިވާނަމަ މީގެ ކުރިން މުވައްޒަފުން ވަޒީފާއިން ވަކިކޮށްފައިވާ ކަމަށާއި، ނަމަވެސް އަލުން ގަވާއިދަށް އިސްލާހު ގެނެސް ގާނޫނުގައި ބުނާ ގޮތަށް އެބައި ތަފްސީލުކޮށްދީފައިވާ ކަމަށެވެ.
ޢާމިރާ ވިދާޅުވީ, އަލުން ގެޒެޓް ކުރި ގަވާއިދުގައި ބުނެފައިވަނީ ސިވިލް ސަރވިސް މުވައްޒަފަކު އޭނާ ރަސްމީ މަސައްކަތުގެ ގަޑީގައި, އަދި ރަސްމީ މަސައްކަތާ ގުޅުންހުރި އެހެންކަމެއްގައި އުޅެނިކޮށް ސިޔާސީ މަސައްކަތް ނުކުރެވޭނެ ކަމަށެވެ. ނަމަވެސް ރަސްމީ މަސައްކަތާއި ރަސްމީ މަސައްކަތާ ގުޅުންހުރި ގަޑިތައް ނޫން އެހެން ގަޑިތަކުގައި އެ މުވައްޒަފަކަށް ސިޔާސީ ޚިޔާލު ފާޅުކުރުމާއި ސިޔާސީ ކަންކަމުގައި ބައިވެރިވެވޭނެ ކަމަށެވެ. އަދި ރަސްމީކަންކަމުގައި ފިޔަވައި އެހެން ވަގުތަކު މުވައްޒަފަކު ސިޔާސީ ހަރަކާތެއްގައި އުޅެގެން ވަޒީފާއިން ވަކި ނުކުރާނެ ކަމަށެވެ.
ޢާމިރާ ވިދާޅުވީ, މިހާރު ގެނެވިފައިވާ ބަދަލުތަކަކީ މުވައްޒަފުން ކުރާ ކުށްތަކަށް އިސްލާހީ ފިޔަވަޅު އެޅުމުގައި ހަރުދަނާ ކަމާއެކު، ވަކި ނިޒާމެއްގެ ތެރެއިން ފިޔަވަޅު އެޅުމާއި، މުވައްޒަފުންނަށް ވާނުވާ ނޭނގޭ ގޮތަށް ކުދި ކުދި ކުށްތަކަށްވެސް އާދައިގެ ފިޔަވަޅު ނޭޅޭނެކަން ކަށަވަރުކޮށްދީ، އިދާރާތައް އަދި އިދާރާތަކުގެ ސިވިލް ސަރވިސްގެ ވެރިން ޒިންމާދާރު ކުރުވުމުގެ ގޮތުން ގެނެވިފައިވާ މުހިންމު ބަދަލުތަކެއް ކަމަށެވެ. އަދި މުވައްޒަފުންގެ ހައްގުތައް ކަށަވަރުކޮށްދީ، އިންސާފުން މުވައްޒަފުންނާ މެދު ޢަމަލުކުރެވޭކަން މި ގަވާއިދުން ކަށަވަރުކޮށްދޭނެ ކަމަށެވެ.
ޢާމިރާ ވިދާޅުވީ, ގަވާއިދަށް ގެނެވުނު ބަދަލާއި ގުޅިގެން ސިޔާސީ ފަރާތްތަކުން އޭގެ މާނަ އޮޅުވާލާފައިވާ ކަމަށެވެ.
މިގަވާއިދަށް ގެނައި 8 ވަނަ އިސްލާހުގައި 272 ވަނަ މާއްދާގައި ވަޒީފާއިން ވަކިކުރެވޭފަދަ ކުށްތައް ވަނީ ބަޔާންކޮށްފައެވެ. އެގޮތުން 15 ކަމެއް ކުށެއްގެ ގޮތުގައި ފާހަގަކޮށްފައިވާއިރު މިއިން ކުށެއްކޮށްފިނަމަ މިގަވާއިދުގައިވާ ގޮތުގެ މަތިން އެމުވައްޒަފަކު ވަޒީފާއިން ވަކިކުރެވޭނެއެވެ.
