މަސައްކަތުގެ ރަސްމީ ގަޑީގައި ނުވަތަ ރަސްމީ ގަޑީގެ ބޭރުންވެސް ރަސްމީ މަސައްކަތުގައި އުޅޭ އެއްވެސް ވަގުތެއްގައި އެއްވެސް ސިޔާސީ ހަރަކާތެއްގައި ސިވިލް ސަރވިސް މުވައްޒަފުން ބައިވެރިވާނަމަ ވަޒީފާއިން ވަކިކުރެވޭގޮތަށް ދިވެހި ސިވިލް ސަރވިސްގެ ގަވާއިދަށް އިސްލާހު ގެނެސް ގެޒެޓު ކުރުމާއެކު، އެ މައުޟޫ މިވަނީ ބޮޑު ބަހުސަކަށް ވެފައެވެ.

ސިވިލް ސާވިސް ގަވާއިދަށް ގެނައި އިސްލާހުގައި ވަނީ މަސައްކަތުގެ ރަސްމީ ގަޑީގައާއި ރަސްމީ ގަޑިން ބޭރުން ވެސް އެއްވެސް ސިޔާސީ ހަރަކާތެއްގައި ބައިވެރިވުމަކީ މަނާ ކަމެއް ކަމަށް ކަނޑައަޅާފައެވެ. އަދި އެކަން ކޮށްފިނަމަ އެއްވެސް އިންޒާރަކާ ނުލައި ވަޒީފާއިން ވަކި ކުރެވޭނެ ކަމަށާއި، މަސައްކަތުގެ ރަސްމީ ގަޑީގައި ސިޔާސީ ވާހަކަ ދެއްކުމަކީ ފުރަތަމަ ދަރަޖައިގެ ކުށެއް ކަމަށްވެސް ވަނީ ކަނޑައަޅާފައެވެ.

އޭގެ އިތުރުން، ސިޔާސީ ބަހުސް ކުރުން ދެވަނަ ދަރަޖައިގެ ކުށެއް ކަމަށް ކަނޑައަޅާފައިވާއިރު، ވަޒީފާއިން ވަކިކުރެވޭފަދަ ކުށްތަކުގެ ގޮތުގައި 15 ކަމެއް ވަނީ ހިމަނާފައެވެ.

ސިޔާސީ ޙަރަކާތްތަކުގައި ބައިވެރިވުން މަނާކުރާ ގޮތަށް ގެނައި މި އިސްލާހަކީ ސިވިލް ސާވިސްގެ ގާނޫނަށް 2015 ވަނަ ގެނެވުނު އިސްލާހެއްކަމަށް ސިވިލް ސަރވިސް ކޮމިޝަނުން ފާހަގަ ކުރެއެވެ.

މި މައުޟޫއަށް ވާހަކަ ދައްކާ އަނެއް ބަޔަކު ބުނަމުންދަނީ، ސިވިލް ސަރވެންޓުންނަކީ ސަރުކާރުގެ ސިޔާސަތުތައް ތަންފީޒު ކުރުމާއި، ސަރުކާރުގެ އިދާރާތައް ހިންގުމުގެ މޫނުމަތި ކަމަށެވެ. އެއީ ކޮންމެ ސަރުކާރެއް ނަމަވެސް، ސަރުކާރުގެ ވައުދުތައް ފުއްދުމާއި، ދައުލަތުގެ އިދާރާތައް މެދުވެރިކޮށް ރައްޔިތުންނަށް ދޭންޖެހޭ ޚިދުމަތްތައް ދިނުމުގައި އެންމެ މުހިއްމު ރޯލެއް އަދާކުރާ ބައެއް ކަމަށެވެ.

އޭގެ އިތުރުން، ސަރުކާރުގެ ވުޒާރާތަކުގައި މަސައްކަތް ކުރާ މުވައްޒަފުންނަކީ އެތަނެއްގެ "ވަތުބަތާނަ" އެންމެ ރަނގަޅަށް އެނގޭ އެއް ބަޔަކަށްވާއިރު، ހެނދުނު ގަޑީގައި ސަރުކާރުގެ ސިޔާސަތުތައް ތަންފީޒުކޮށް ރައްޔިތުންނަށް ޚިދުމަތް ދިނުމަށް އިންނަ މުވައްޒަފު އެރޭ ރޭގަނޑު ސިޔާސީ ޕާޓީއެއްގެ ޖަލްސާގައި އޭރަކު އޮންނަ ސަރުކާރަކަށް "ކުރުދޮށިން" ދިނުމަކީވެސް އެންމެ ހަމަޖެހޭ އުސޫލެއް ނޫންކަމަށް ބައެއް ފަރާތްތަކުން ދަނީ ބުނަމުންނެވެ.

ދެން މިކަމާ ވާހަކަ ދައްކާ ފަރާތްތަކުން ބުނަމުންދާ އަނެއް ވާހަކައަކީ ސިފައިންނާ ފުލުހުންގެ ވާހަކައެވެ. ސިޔާސީ ޙަރަކާތްތަކުގައި ބައިވެރިވުމާއި، ސިޔާސީ ޕާޓީގެ ހަރަކާތްތައް ހިންގުމާއި، ޚިޔާލު ފާޅު ކުރުމުގެ މިނިވަންކަން ގާނޫނުގައި ބަޔާން ކޮށްފައި އޮތް ނަމަވެސް، ފުލުހުންނާއި ސިފައިންނަށްވެސް އިސްތިސްނާތަކެއް އަންނަ ކަމެވެ. އެކަމުގެ ފަހަތުގައިވެސް ގަބޫލު ކުރެވޭ މުހިއްމު ސަބަބުތައް ހުރި ކަމަށެވެ.

ހަމަ އެގޮތަށް ފަނޑިޔާރުން ހުކުމް ކުރައްވާ، ޝަރީއަތްތައް ހިންގަމުންދާއިރު، އަނެއް ދުވަހު ރާއްޖޭގެ ޝަރުއީ ދާއިރާއަށް ފާޑު ވިދާޅުވެ މުޒާހަރާއަށް ނުކުންނެވުމަކީ އެންމެ ރަނގަޅު މަންޒަރުބާއޭ ސުވާލު އުފައްދާ މީހުންވެސް މަދެއް ނޫނެވެ. އެ ހާލަތްތަކުގައި އެ ހައްގު ހަނިކުރާ ކުރުން ގަބޫލު ކުރެވިފައި، ސިވިލް ސަރވެންޓުންގެ މައްސަލައިގައި އެކަން ގަބޫލު ނުކުރެވެނީ ކީއްވެތޯ ސުވާލު އުފައްދާ މީހުންވެސް މަދެއް ނޫނެވެ.

އެކަމަށް ރައްދުދޭ ފަރާތްތަކުން ފާހަގަކުރަމުންދަނީ ގާނޫނުއަސާސީން ކަށަވަރު ކޮށްދޭ ހައްގެއް ގަވާއިދަކުން ހަނި ނުކުރެވޭނެ ވާހަކައެވެ. އެ ހައްގު ހަނިކުރެވޭނީ ރައްޔިތުންގެ މަޖިލީހުން ފާސްކުރާ ގާނޫނަކުން ކަމަށެވެ. މި ގަވާއިދާ ބެހޭ ގޮތުން އެއް ބަޔަކު ބުނަމުންދަނީ ޚިޔާލުފާޅު ކުރުމުގެ މިނިވަންކަމަކީ ކޮންމެ ފަރުދަކަށްވެސް ލިބެންޖެހޭ ހައްގެއް ކަމަށެވެ. ސިވިލް ސަރވިސްގެ ގާނޫނަށް ގެނައި އިސްލާހުގެ ސަބަބުން މި ހައްގު ހަނިވެ، ސިޔާސީ ޕާޓީގެ ހަރަކާތްތަކުގައި ބައިވެރިވުމުގެ ހައްގުވެސް ގެއްލިގެންދާ ކަމަށެވެ. މިއިން ކޮންމެ ކަމަކީވެސް ގާނޫނުން ލިބިދީފައިވާ ހައްގުތަކެއް ކަމަށާއި، ގަވާއިދަކުން އެ ހައްގުތައް ހަނި ނުކުރެވޭނެ ކަމަށެވެ.

ސިވިލް ސަރވެންޓުންގެ ގަވާއިދަށް ގެނައި އިސްލާހާއި ގުޅިގެން ކުރެވޭ ބަހުސްގެ އަޑު ގަދަވެފައިވާއިރު، ކޮންމެ ސަރުކާރެއްގައި ނަމަވެސް، އެ އިރެއްގައި އޮންނަ ސަރުކާރަކާމެދު ރައްޔިތުންގެ އިތުބާރު ގެއްލުވާލުމަށް އެންމެ ފަސޭހައިން ބޭނުން ކުރެވޭނެ ހަތިޔާރަކީ ސިވިލް ސަރވެންޓުން ކަން މިއީ ފެންނަން އޮތް ހަގީގަތެކެވެ.