ސިވިލް ސަރވިސް މުވައްޒަފުންގެ މަސައްކަތު ވަގުތު 8 ގަޑިއިރަށް ބަދަލުކުރަން މަޝްވަރާކުރަނީ
ސިވިލް ސަރވިސް މުވައްޒަފުންގެ މަސައްކަތު ވަގުތަކީ 6 ގަޑިއިރު
ވެލާނާގެ
ސިވިލް ސަރވިސް މުވައްޒަފުންގެ މަސައްކަތު ވަގުތު 8 ގަޑިއިރަށް ބަދަލުކުރުމުގެ މަޝްވަރާތައް ކުރިއަށްގެންދަވާނެކަން އިކޮނޮމިކް މިނިސްޓަރ ފައްޔާޒް އިސްމާއިލް ހާމަކުރައްވައިފިއެވެ.
މިނިސްޓަރ މިކަން ހާމަކުރެއްވީ މިނިމަމް ވޭޖް ކަނޑައެޅުމަށް ހޯމަ ދުވަހު ބޭއްވި ރަސްމިއްޔާތުގައި ވާހަކަދައްކަވަމުންނެވެ. މިނިސްޓަރ ވިދާޅުވީ ސިވިލް ސަރވިސް މުވައްޒަފުންގެ މަސައްކަތު ވަގުތު 8 ގަޑިއިރަށް އިތުރުކުރަން މިނިމަމް ވޭޖް ބޯޑުން ލަފާދީފައިވާކަމަށެވެ.
ސިވިލް ސަރވިސް މުވައްޒަފުން މަސައްކަތުގައި ހޭދަކުރަންޖެހޭ ވަގުތާއި، ޕްރައިވެޓް ސެކްޓަރގައި މަސައްކަތްކުރާ މުވައްޒަފުން މަސައްކަތުގައި ހޭދަކުރަންޖެހޭ ވަގުތުގައި ވަރަށް ބޮޑު ފަރަގެއް އެބަ އޮތް ކަމަށް މިނިސްޓަރ ވިދާޅުވިއެވެ. އެހެން ކަމަށްވެފައި ރައްޔިތުންނަށް ދޭ ޚިދުމަތުގެ ފެންވަރުވެސް އިތުރަށް ރަނގަޅުކުރުމަށް، މި ދެ ސެކްޓަރގައި އޮންނަ ފަރަގު ކުޑަކޮށް ސިވިލް ސަރވިސް މުވައްޒަފުން ވެސް 8 ގަޑިއިރު މަސައްކަތްކުރަންޖެހޭގޮތަށް ބަދަލު ގެނައުމަށް ބޯޑުން ލަފާ ދީފައިވާކަމަށް މިނިސްޓަރ ވިދާޅުވިއެވެ. އަދި މިކަމާ މެދު ވިސްނައި، މަޝްވަރާކުރަންޖެހޭ ފަރާތްތަކާ މަޝްވަރާކުރައްވާނެ ކަމަށް މިނިސްޓަރ ވިދާޅުވިއެވެ.
ޕްރައިވެޓް ކުންފުނިތަކާއި އަމިއްލަ ފަރާތްތަކުގައި މަސައްކަތްކުރާ މުވައްޒަފުން ކޮންމެ ދުވަހަކު މަދުވެގެން 8 ގަޑިއިރު މަސައްކަތްކުރަންޖެހެއެވެ. އެހެންނަމަވެސް ސިވިލް ސަރވިސް މުވައްޒަފުންގެ މަސައްކަތު ގަޑިއަކީ 6 ގަޑިއިރެވެ. މި ފަރަގު ނައްތާލުމުގެ މަސައްކަތް ކުރަން ނިންމަވާފައިވާއިރު މިހާރު ވަނީ މަސައްކަތްތެރިންނަށް ދެވޭ އެންމެ ކުޑަ އުޖޫރަ ކަނޑައަޅާފައެވެ.
އެގޮތުން ކުދި ވިޔަފާރިތަކަށް، އެންމެ ކުޑަ އުޖޫރައިގެ ގޮތުގައި ދުވާލަކަށް 21 ރުފިޔާ 63 ލާރި ދޭން ނިންމާފައިވައިރު، އެއީ މަހަކު 4،500 ރުފިޔާއެވެ. މެދު ފަންތީގެ ވިޔަފާރިތަކަށް، 33 ރުފިޔާ 65 ލާރި ދޭން ނިންމާފައިވައިރު، އެއީ މަހަކު 7،000 ރުފިޔާއެވެ. ބޮޑެތި ވިޔަފާރިތަކަށް، 38 ރުފިޔާ 46 ލާރި ދޭން ވަނީ ނިންމާފައެވެ. އެއީ މަހަކު 8،000 ރުފިޔާއެވެ. ސިވިލް ސަރވިސް މުވައްޒަފުންނަށް މަހަކު 7،000 ރުފިޔާ ދޭން ވަނީ ނިންމާފައެވެ.
