ރާއްޖޭގެ އާބާދީ އާއި މީހުން ދިރިއުޅޭ ތަންތަނުގެ ބޯހިމެނުން 2022 ވަނަ އަހަރުގެ ސެޕްޓެމްބަރ މަހުގެ 17ން 30ށް ބޭއްވުމަށް ހަމަޖެހިފައިވާކަމަށް މޯލްޑިވްސް ބިއުރޯ އޮފް ސްޓެޓިސްޓިކްސް އިން ހާމަކޮށްފިއެވެ.

އަންނަ އަހަރު ކުރިޔަށްގެންދާ ބޯހިމެނުމާއި ގުޅޭގޮތުން މައުލޫމާތު ދިނުމަށް މޯލްޑިވްސް ބިއުރޯ އޮފް ސްޓެޓިސްޓިކްސް އިން ބޭއްވި ނޫސްވެރިންގެ ބައްދަލުވުމުގައި މިނިސްޓަރ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރ މުހައްމަދު އަސްލަމް ވަނީ ވީޑިއޯ މެސެޖެއް ދެއްވާފައެވެ. އެމެސެޖުގައި މިނިސްޓަރ ވިދާޅުވީ ބޯހިމެނުމަކީ ގައުމީ ތަރައްގީގެ މަޝްރޫއުތައް ރާވާ ހިންގުމަށް ބޭނުންވާ އަސާސީ މައުލޫމާތުކަމަށެވެ. އަދި މިއީ ގައުމު ކުރިއަރާ ދިޔުމުގައި ރައްޔިތުންގެ ބައިވެރިވުން އެންމެ ބޮޑަށް އޮންނާނެ މަސައްކަތްކަމަށްވެސް މިނިސްޓަރ ވިދާޅުވިއެވެ. ރައްޔިތުން ދޭ މައުލޫމާތަށް ބިނާކޮށް ރަށްރަށުގަޔާއި އަތޮޅުތަކުގެ އަދި ސަރަހައްދުތަކުގެ ޕްލޭންތައް ރޭވިގެންދާނެ ކަމަށް މިނިސްޓަރ ވިދާޅުވިއެވެ.

މިނިސްޓަރ އިތުރަށް ވިދާޅުވީ މިފަހަރުގެ ބޯހިމެނުމުގެ ޝިއާރު ކަމުގައިވާ " އަހަރެންގެ ބޯހިމެނުން" މިޝިއާރާ އެއްގޮތަށް ހުރިހާ ރައްޔިތުންވެސް ބޯހިމެނުމުގައި ބައިވެރިވުމަށް އެދޭކަމަށެވެ.

މިފަހަރުގެ ބޯހިމެނުމުގައި އެހެން އަހަރުތަކާއި ޚިލާފަށް އިގްތިސާދީ މަސައްކަތްތަކާއި ގުޅޭގޮތުން މައުލޫމާތު އެއްކުރުމަށް ވަނީ ހަމަޖެހިފައެވެ. ނޫސްވެރިންގެ ބައްދަލުވުމުގައި މިކަމާއި ގުޅޭގޮތުން އިތުރު ތަފްސީލު ދެއްވަމުން މޯލްޑިވްސް ބިއުރޯ އޮފް ސްޓެޓިސްޓިކްސްގެ ޗީފް ސްޓެޓިސްޓިޝަން އައިޝަތު ހަސަން ވިދާޅުވީ އަދި މިހާތަނަށް އައިއިރު ރާއްޖޭގައި އިގްތިޞާދީ މަސައްކަތްތަކުގެ ބޯހިމެނުމެއް ހިމަނާފައިނުވާކަމަށެވެ. އިގްތިސާދީ މަސައްކަތްތަކުގެ ބޯހިމެނުގެ ޒަރީއާއިން ޖީޑީޕީއަށް ބޭނުންވާ މައުލޫމާތު އެއްކުރެވިގެންދާނެކަމަށް އައިޝަތު ހަސަން ވިދާޅުވިއެވެ. އަދި ރާއްޖޭގެ އެކި ހިސާބުތަކުގައި އިގްތިސާދީ ގޮތުން ކުރަމުންދަނީ ކޮންކޮން މަސައްކަތްތަކެއްތޯ އާއި އެމަސައްކަތްތަކުގެ ކުޑަބޮޑުމިން އަދި އެތަންތަނުގައި މަސައްކަތްކުރާ މީހުންގެ އަދަދު ފަދަ މައުލޫމާތު އެއްކުރެވިގެންދާނެ ކަމަށް ވިދާޅުވިއެވެ.

އިގްތިސާދީ މަސައްކަތްތަކުގެ ބޯހިމެނުން އެންމެ ފުރަތަމަ ކުރިޔަށްގެންދާނީ އޮންލައިންކޮށެވެ. އެއްމަސް ދުވަހުގެ މުއްދަތެއް މަސައްކަތްތައްކުރާ ތަންތަނަށް މައުލޫމާތު ދިނުމަށް ދޭނެއެވެ. އެމުއްދަތުގައި މައުލޫމާތު ނުދޭ ތަންތަނުގައި މައުލޫމާތު ސާފުކުރާނީ ސެޕްޓެމްބަރ 17ން 30ށް ކުރިޔަށްގެންދާ ބޯހިމެނުމުގައެވެ.

މީގެއިތުރުން މިފަހަރުގެ ބޯހިމެނުގައި އެހެން ފަހަރުތަކާއި ޚިލާފަށް ކަރުދާހުގެ ބަދަލުގައި ބޭނުންކުރާނީ ޓެބްލެޓެވެ. ބޯހިމެނުމުގެ މަސައްކަތްތައް ކުރިޔަށްގެންދިޔުމަށް މިހާރުވަމުންދާ ތައްޔާރީތަކުގެ އެންމެފަހުގެ މައުލޫމާތު ދެއްވަމުން ޑެޕިޔުޓީ ޗީފް ސްޓެޓިސްޓިޝަން އައިޝަތު ޝަހުދާ ވިދާޅުވީ މިހާރު ކުރަމުންދާ މަސައްކަތްތަކީ ބޯހިމެނުމުގައި ބޭނުންކުރާނެ ސުވާލު ކަރުދާސްތައް އެކުލަވާލުމުގެ މަސައްކަތް ކަމަށެވެ. ބޯހިމެނުމުގައި ހުރިހާ އެންމެންގެ ބޭނުންތަކަށް ބޭނުންވާ މައުލޫމާތު ހޯދުމަށް ސުވާލުތައް ބައްޓަންކުރަންވީ ގޮތާއި ގުޅޭގޮތުން އެކި ފަރާތްތަކާއި މަޝްވަރާކޮށްގެން މިހާރު ސުވާލުތަކުގެ ޑްރާފްޓެއް އެކުލަވާލާފައިވާކަމަށް ޝަހުދާ ވިދާޅުވިއެވެ. އަދި އަންނަ އޮކްޓޯބަރ މަހު ސުވާލުތަކަށް އާންމުންގެ ޚިޔާލަށް ހުޅުވާލާނެކަމަށް ވިދާޅުވިއެވެ.

ނޫސްވެރިންގެ މި ބައްދަލުވުމުގައި ވަނީ މަސައްކަތްކުރިޔަށް ގެންދާނެ ގޮތުގެ ޓައިމްލައިންވެސް ހާމަކޮށްފައެވެ.

މިފަހަރުގެ ބޯހިމެނުމުގެ މަސައްކަތަށް 4300 އެނިއުމަރޭޓަރުން ބޭނުންވެއެވެ. އެއީ އަތޮޅުތަކުގައި މަސައްކަތްކުރުމަށް 2200 އަދި މާލޭގައި މަސައްކަތްކުރުމަށް 2100 އެވެ. އެނިއުމަރޭޓަރުން ހޯދުމަށް އަންނަ މަހު އިއުލާންކުރުމަށް ވަނީ ހަމަޖެހިފައެވެ.

ރާއްޖޭގައި ކޮންމެ 10 އަހަރަކުން އެއް އަހަރު ބޯހިމަނައެވެ. އެންމެފަހުން ބޯހިމަނާފައިވަނީ 2014 ވަނަ އަހަރުއެވެ. އެފަހަރުގެ ބޯހިމެނުމުގެ ނަތީޖާ ދައްކާގޮތުން ރާއްޖޭގައި 402،071 މީހުން ދިރިއުޅެއެވެ.

މިފަހަރުގެ ބޯހިމެނުމުގެ ޝިއާރަކީ "މީ އަހަރުމެންގެ ބޯހިމެނުން- އަހަރެންވެސް ބައިވެރިވާނަން" އެވެ.