ޝަރުތު ހަމަވާ އެންމެންނަށް ފްލެޓު އެޅުމުގެ މަސައްކަތް މި ދައުރު ތެރޭގައި ފެށިގެންދާނެ: މިނިސްޓްރީ
މިހިނގާ ދައުރު ނިމުމުގެ ކުރިން ބާކީ ހުރި ހުރިހާ ފްލެޓެއްގެވެސް މަސައްކަތް ފެށޭނެ
ޕްލޭނިންގ މިނިސްޓްރީން ބޭއްވި ނޫސްވެރިންގެ ބައްދަލުވުމެއްގެ ތެރެއިން
ގެދޮރުވެރިޔާ ސްކީމަށް ޝަރުތުހަމަވާ ހުރިހާ ފަރާތްތަކަށް ފުލެޓް ދިނުމަށް ސަރުކާރުން ނިންމާފައިވާއިރު، ޝަރުތު ހަމަވާ އެންމެންނަށް ފްލެޓު އެޅުމުގެ މަސައްކަތް މި ދައުރު ތެރޭގައި ފެށިގެންދާނެކަމަށް ޕްލޭނިންގ މިނިސްޓްރީގެ ސްޓޭޓް މިނިސްޓަރ އަކްރަމް ކަމާލުއްދީން ވިދާޅުވެއްޖެއެވެ.
ޕްލޭނިންގ މިނިސްޓްރީގެ ސްޓޭޓް މިނިސްޓަރ އަކްރަމް ކަމާލުއްދީން ރާއްޖެއެމްވީއަށް ވިދާޅުވީ، 10000 ފްލެޓު އިމާރަތް ކުރުމުގެ މަސައްކަތުގައި ސޮއިކުރެވި، އޭގެ ތެރެއިން 4000 ފްލެޓު އެޅުމުގެ އަމަލީ މަސައްކަތްވެސް މިހާރު ފެށިފައިވާ ކަމަށެވެ. އެ 4،000 ހައުސިން ޔުނިޓަކީ އިންޑިއާގެ ދެ ކުންފުންޏަކާ ހަވާލުކޮށްގެން އިމާރާތްކުރަމުންދާ ތަންތަނެވެ.
އޭގެތެރޭގައި ދެ ކޮޓަރީގެ 1،200 އެޕާޓުމަންޓާއި ތިން ކޮޓަރީގެ 2،800 އެޕާޓުމަންޓު ހިމެނެއެވެ.
ބާކީ ހުރި ފްލެޓުތައް އަޅާނީ ހުޅުމާލެއާއި، ގިރާވަރު ފަޅުގައިކަމަށް އަކްރަމް ވިދާޅުވިއެވެ.
މިހާރު ހާމަކޮށްފައިވާ ލިސްޓުގައި ޝަރުތުހަމަވާ މީހުންގެ ތެރެއިން މަދުވަނީ ގާތްގަނޑަކަށް 3500 އާއި 4000 އާ ގާތްކުރާ އަދަދެއްގެ ފްލެޓުކަން ފާހަގަ ކުރައްވައި އަކްރަމް ވިދާޅުވީ، އެ ފްލެޓުތައްވެސް އެޅުމުގެ މަޝްވަރާ މިހާރު ކުރިއަށްދާކަމަށެވެ.
އަކްރަމް އިތުރަށް ވިދާޅުވީ، މިހިނގާ ދައުރު ނިމުމުގެ ކުރިން އެ ހުރިހާ ފްލެޓެއްގެވެސް މަސައްކަތް ފެށޭނެ ކަމަށާއި، އަދި ބައެއް ފްލެޓުތަކުގެ މަސައްކަތް މި ދައުރުތެރޭގައި ނިމޭނެ ކަމަށެވެ.
ހައުސިން މިނިސްޓްރީން ގެޒެޓް ކުރި އިއުލާނެއްގައި މާލެ ސަރަޙައްދުން ފުލެޓް ދޫކުރުމަށްޓަކައި ހިންގާ ގެދޮރުވެރިޔާ ސްކީމުގެ ދަށުން ފުލެޓަށް އެދި ހުށަހަޅާފައިވާ ފަރާތްތަކުގެ ވަގުތީ ލިސްޓް ވަނީ އާއްމުކޮށްފައެވެ.އަދި ސަރުކާރުން ނިންމާފައިވަނީ މި ސްކީމަށް ޝަރުތުހަމަވާ ހުރިހާފަރާތްތަކަށް ފުލެޓް ދިނުމަށް ކަން އެ ލިޔުމުގައި ވަނީ ހާމަކޮށްފައެވެ.
ދާއިމީ ލިސްޓް އިޢުލާނުކުރުމުގެ ކުރިން ވަގުތީ ލިސްޓްގައި ޝަރުތުހަމަވާކަމަށް ކަނޑައަޅާފައިވާ ފަރާތްތަކުން ހުށަހަޅާފައިވާ ފޯމުގައި ދީފައިފައިވާ ދިރިއުޅުމުގެ ޙާލަތާއިގުޅޭ މަޢުލޫމާތުގެ ސައްޙަކަން ކަށަވަރުކުރުމުގެ މަސައްކަތް މި މިނިސްޓްރީގެ ފަރާތުން ކުރާނެ ކަމަށް ވެސް އެ މިނިސްޓްރީން ވަނީ ބުނެފައެވެ.
