އައްޑޫ ބިން ހިއްކުމުގެ މަސައްކަތުގެ ތައްޔާރީތައް ވަރަށް އަވަހަށް ފެށިގެންދާނެ ކަމަށް އެ މަސައްކަތް ހަވާލުކޮށްފައިވާ ނެދަރލޭންޑްސްގެ "ވެން އޫޑް" ކުންފުނިން ބުނެފިއެވެ.

މިނިސްޓްރީ އޮފް ނޭޝަނަލް ޕްލޭނިން ހައުސިން އެންޑް އިންފްރާސްޓްރަކްޗަރްގެ ފަރާތުން ވެން އޫޑް ކުންފުންޏާ މި މަސައްކަތް ހަވާލުކޮށް އެއްބަސްވުމުގައި ސޮއިކޮށްފައިވަނީ މިދިޔަ މާރޗް މަހުގެ 27 ވަނަ ދުވަހުއެވެ. މި އެއްބަސްވުމުގެ ދަށުން އައްޑޫ ސިޓީގެ 194 ހެކްޓަރުގެ ބިން ހިއްކުމުގެ މަސައްކަތް އެ ކުންފުންޏާ ވަނީ ހަވާލުކޮށްފައެވެ.

މި މަސައްކަތުގެ ދަށުން އައްޑޫގެ ގުޅިފައިވާ އަވަށްތައް ކަމުގައިވާ ހިތަދޫ، މަރަދޫ އަދި މަރަދޫ ފޭދޫގެ ސަރަހައްދުތައް ހިއްކިގެންދާނެއެވެ. މިގޮތުން ހިތަދޫއިން 90 ހެކްޓަރު ބިމާއި މަރަދޫ އަދި މަރަދޫފޭދޫއިން 16 ހެކްޓަރުގެބިމާއި ފަތުރުވެރިކަމަށް ޚާއްސަކުރެވިގެން އައްޑޫ ސިޓީ ފަޅުތެރޭއިން 8.3 ހެކްޓަރުގެ 3 ރަށަކާއި 4 ލޭން ޑިޓުއަރ ލިންކު ރޯޑުގެބްރިޖުގެ އެމްބޭންޓްމަންޓަށް 3.3 ހެކްޓަރު ބިން ހިއްކުމަށް ވަނީ ހަމަޖެހިފައެވެ.

މި މަސައްކަތުގެ އެންމެ ފަހުގެ މައުލޫމާތުދެމުން ވެން އޫޑް ކުންފުނިން ބުނީ ބިން ހިއްކުމުގެ މަސައްކަތަށް ބޭނުންކުރާނީ އެ ކުންފުނީގެ އަމިއްލަ ޑްރެޖަރެއް ކަމަށްވާ އެޗްއޭއެމް 318 ކަމަށެވެ. އަދި އެ ޑްރެޖަރު ވަރަށް އަވަހަށް މަސައްކަތްކުރާ ސަރަހައްދަށް ގެންދެވިގެންދާނެ ކަމަށް އެ ކުންފުނިން ބުނެއެވެ. ވެން އޫޑް ކުންފުނިން ބުނީ މި މަސައްކަތަށް ވެލި ނަގަން އައްޑޫގެ ފަޅު ތެރެއިން ދެ ސަރަހައްދެއް މިހާރު ވަނީ ކަނޑައަޅާފައި ކަމަށެވެ. އަދި މި ހުރިހާ ތައްޔާރީތަކެއް ވަރަށް އަވަހަށް ފެށިގެންދާނެ ކަމަށް ވެން އޫޑް ކުންފުނިން ބުނެއެވެ.

މި މަސައްކަތުގެ ތެރެއިން ބިން ހިއްކުމުގެ އިތުރުން ކޯސްޓަލް ޕްރޮޓެކްޝަންގެ މަސައްކަތްވެސް ކުރިއަށްދާނެ ކަމަށް އެ ކުންފުނިން ބުނެއެވެ. މިގޮތުން ގަލާއި ޖިއޯޓެކްސްޓައިލް ބޭނުންކޮށްގެން ގޮނޑުދޮަށް ހިމާޔަތްކުރެވިގެންދާނެއެވެ.

އައްޑޫ މަސައްކަތަކީ އައްޑޫ ތަރައްގީކުރުމަށް ދިވެހި ސަރުކާރުން ކުރިއަށްގެންދާ އައްޑޫ ޑިވެލޮޕްމެންޓް ޕްރޮޖެކްޓުގެ މުހިންމު ބައެކެވެ. މި މަސަައްކަތުގެ ތެރެއިން މޫސުމީ ބަދަލުތަކާއެކު ކުރާނެ އަސަރުތަކަށް މަސައްކަތްކުރެވި، އައްޑޫ ސިޓީއަކީ އިގްތިސާދީ ހަބަކަށް ހަދައި، ފަތުރުވެރިންގެ މެދުގައި މަގުބޫލު މަންޒިލަކަށް ހެދިގެންދާނެއެވެ.

18 މަސްދުވަސް ތެރޭގައި ނިންމުމަށް ހަވާލުކޮށްފައިވާ މި މަޝްރޫއުގެ ޖުމްލަ އަގަކީ 1.3 ބިލިއަން ރުފިޔާއެވެ.

މި މަސައްކަތުގެ ތެރެއިން އައްޑޫގެ ތިމާވެއްޓަށް ގެއްލުންވެދާނެ ކަމަށް ގިނަ ބަޔަކު ބުނަމުންދާއިރު މިކަމާއި ގުޅިގެން ވެން އޫޑް ކުންފުނިން ބުނީ މި މަސައްކަތުގެ ތެރެއިން އައްޑޫގެ ނާޒުކު ތިމާވެއްޓަށް ގެއްލުންނުވާނެ ގޮތަކަށް މަސައްކަތް ކުރިއަށްގެންދެވޭނެ ގޮތްތައް ބަލަމުންގެންދާ ކަމަށެވެ. މީގެ ތެރެއިން މި މަޝްރޫއު ކުރިއަށްގެންދަން ހަމަޖެހިފައިވާ ސަރަހައްދުތަކުގައި ހުރި މުރަކަތައް އެހެން ތަނެއްގައި އިންދުމުގެ މަސައްކަތް ކުރަންޖެހޭކަން ފާހަގަކޮށްފައިވެއެވެ. މި މަސައްކަތް ކަމާ ގުޅުންހުރި ފަރާތްތަކާ ގުޅިގެން ކުރިއަށްގެންދާނެ ކަމަށް އެ ކުންފުނިން ބުނެފައިވެއެވެ.

ވެން އޫޑް ކުންފުނިން ވަނީ މީގެ ކުރިންވެސް ރާއްޖޭގައި ބިން ހިއްކުމުގެ އެކި މަޝްރޫއުތައް ކުރިއަށްގެންގޮސްފައެވެ. މިގޮތުން ރާއްޖޭގެ ތަރައްގީއާއި އިގްތިސާދަށް ހެޔޮ އަސަރު ކުރާނެ އެތައް ޕްރޮޖެކްޓެއް އެކުންފުނިން ހިންގާފައިވެއެވެ.