ޒުވާން ގައުމީ ވޮލީބޯޅަ ޓީމަށް ކޯޗުން ހޯދަނީ

ރާއްޖޭގެ ޒުވާން ގައުމީ ވޮލީބޯޅަ ޓީމުތަކަށް ކޯޗުން ހޯދަން ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް) އިން އިއުލާންކޮށްފިއެވެ.

މިދިޔަ އަންގާރަ ދުވަހު ވީއޭއެމުން ނެރުނު އިއުލާނެއްގައި ބުނެފައިވަނީ އެ އެސޯސިއޭޝަންގެ ފަރާތުން 2022 ވަނަ އަހަރުގެ ބައިނަލްއަގުވާމީ މުބާރަތްތަކުގައި ބައިވެރިކުރުމަށް ބޭނުންވާ ޒުވާން ގައުމީ ވޮލީބޯޅަ ޓީމަށް ކޯޗުން ހޯދަން ބޭނުންވާ ކަމަށެވެ.

އެގޮތުން އަންނަ އަހަރު ބާއްވާ މުބާރާތްތަކުގައި ވާދަކުރާ ޒުވާން ގައުމީ ވޮލީބޯޅަ ޓީމަށް ހެޑް ކޯޗެއް ހޯދުމުގެ އިތުރުން، އެސިސްޓަންޓް ދެ ކޯޗުން ހޯދުމަށްވެސް ވަނީ އިއުލާންކޮށްފައެވެ. ވީއޭއެމުން ބުނީ މި މަގާމުތަކަށް ކުރިމަތިލާ ކޯޗުންނަކީ އެ އެސޯސިއޭޝަނުގައި ރަޖިސްޓްރީވެފައިވާ ކޯޗެއްކަމުގައި ވާން ޖެހޭނެ ކަމަށާއި، އަދި އެއީ އެފްއައިވީބީ ކޯޗިން ލެވަލް އެކެއްގެ ސެޓްފިކެޓް ހާސިލުކޮށްފައިވާ ކޯޗަކަށްވެސް ވާން ޖެހޭނެ ކަމަށެވެ. އަދި ފާއިތުވި ފަސް އަހަރު ދުވަހުގެ ތެރޭގައި ވޮލީބޯޅަ ހަރަކާތްތަކުގައި ބައިވެރިވެފައިވާ ކޯޗެއް ކަމުގައި ވާން ޖެހޭނެ ކަމަށްވެސް މި އިއުލާންގައި ވަނީ ބުނެފައެވެ.

އެ މަގާމުތަކަށް ހަމަޖައްސާ ކޯޗުންގެ މުސާރަ ކަނޑައަޅާނީ ދެ ފަރާތް އެއްބަސްވާ ގޮތަކަށެވެ. އެހެންކަމުން އެ މަގާމުތަކަށް ޝައުގުވެރިވާ ކޯޗުން އެ ކަމަށް އެދި ސިޓީއަކުން ކުރިމަތިލާ މަގާމު އެނގޭނެހެން، އަދި ސީވީ އާއި ވޮލީބޯޅަ ހަރަކާތްތަކުގައި ބައިވެރިވެފައިވާ ކޯޗެއްކަން އަންގައިދޭ ލިޔެކިއުންތަކާއެކު މި މަހުގެ 23 ވާ ބުރާސްފަތި ދުވަހުގެ 14:00 ގެ ކުރިން އީމެއިލް (gs@maldivesvolleyball.mv) އަށް ފޮނުވުމަށް ވީއޭއެމުން ވަނީ އެދިފައެވެ.

އަންނަ އަހަރު ބާއްވާ މުބާރާތްތަކުގައި ވާދަކުރާ ޒުވާން ގައުމީ ވޮލީބޯޅަ ޓީމަށް ކޯޗުން ހޯދަން އިއުލާންކުރިއިރު، އަންނަ އަހަރު ގިނަ މުބާރާތްތަކެއްގައި ޒުވާން ގައުމީ ވޮލީބޯޅަ ޓީމު ވާދަކުރާނެއެވެ. އޭގެ ތެރޭގައި އަންނަ އަހަރު ޗައިނާގައި ބާއްވާ އޭޝިއަން ޔޫތު ގޭމްސް އާއި، އެ އަހަރުގެ އޮގަސްޓް މަހު ތުރުކީގައި ބާއްވާ އިސްލާމިކް ސޮލިޑާރިޓީ ގޭމްސް ހިމެނެއެވެ.