އިދިކޮޅު ކޯލިޝަނުން ޕީޖީއާ ބައްދަލުކޮށްފި

މިހާރު ކޯޓުތަކުގައި ހިނގަމުންދާ، ކުރީގެ ރައީސް ޔާމީން އަބްދުލް ގައްޔޫމްގެ ޝަރީއަތާ ގުޅިގެން ހުރި ކަން ބޮޑުވުންތައް ހިއްސާކުރުމަށް އިދިކޮޅު ކޯލިޝަނުން ޕްރޮސެކިއުޓަރ ޖެނެރަލް ހުސައިން ޝަމީމާ ބައްދަލުކޮށްފިއެވެ.

މި ބައްދަލުވުމަށްފަހު ނޫސްވެރިންނަށް މައުލޫމާތު ދެއްވަމުން ކޯލިޝަންގެ އެކްޓިން ލީޑަރ އަބްދުއްރަހީމް އަބްދުﷲ ވިދާޅުވީ، ފަނޑިޔާރުންގެ އޯޑިއޯ ކަމަށްބުނެ ލީކުވެފައިވާ އޯޑިއޯތަކާ ގުޅިގެން ހުރި ކަން ބޮޑުވުންތައް ހިއްސާ ކުރެއްވި ކަމަށެވެ. އެ އޯޑިއޯތަކުގެ ރަނގަޅު ތަހުގީގެއް ހިންގުމަށް ޕީޖީ އަރިހުގައި އެދިފައިވާނެ ކަމަށެވެ. އޯޑިއޯތަކުގެ ފޮރެންސިކް ތަހުގީގެއް ހިންގުމަށް ވެސް ޕީޖީ އަރިހުގައި އެދުނު ކަމަށް އަދުރޭ ވިދާޅުވިއެވެ.

ރައިސް ޔާމީންގެ ހުކުމަށް ސަރުކާރުގެ ނުފޫޒު އޮތް ކަމަށް ކޯލިޝަނުން ބުނަމުން އަންނަ ވާހަކަ އަދުރޭ ތަކުރާރު ކުރެއްވިއެވެ. ސުޕްރީމް ކޯޓުގައި މިހާރު ހިނގަމުންދާ، ރައީސް ޔާމީންގެ ހުކުމުގެ އިސްތިއުނާފް މައްސަލައަށް އަލިއަޅުއްވައި އަދުރޭ ވިދާޅުވީ، ސުޕްރީމް ކޯޓާމެދު ޝައްކެއް ނެތް ކަމަށެވެ. އަދި ސުޕްރީމް ކޯޓުން އިންސާފުވެރި ހުކުމެއް އިއްވާނެ ކަމަށް އުއްމީދު ކުރެވޭ ކަމަށް ވިދާޅުވިއެވެ. އަދި ސުޕްރީ ކޯޓުން އިންސާފުވެރި ހުކުމެއް ލިބުމުގައި އޯޑިއޯތައް އިންސާފުވެރި ގޮތެއްގައި ތަހުގީގު ކުރުން ވަރަށް މުހިއްމު ކަމަށް ވިދާޅުވިއެވެ. ސަބަބެއް ކަމަށް ވިދަޅުވީ، ލީކުވެފައިވާ އޯޑިއޯ އަކީ، ދަށު ކޯޓުން ހުކުމް އިއްވި ފަނޑިޔާރުންގެ ބެންޗުގައި ހިމެނިވަޑައިގަންނަވާ ފަނޑިޔާރުންގެ އޯޑިއޯ ކަމުގެ ޔަގީންކަން އިދިކޮޅު ކޯލިޝަނަށް އޮތުމުން ކަމަށެވެ. އެހެންކަމުން އެކަން ކަށަވަރުކުރަންޖެހޭ ކަމަށެވެ.

އެކަން ވަރަށް ގާތުން ބައްލަވާނެ ކަމަށް ޕީޖީ ވިދާޅުވި ކަމަށާއި، އެހެންނަމަވެސް ސުޕްރީމް ކޯޓުގައި ހިނގަމުންދާ މައްސަލައެއް ހުއްޓުވަން ކޮށްދެވޭނެ އެއްވެސް ކަމެއް ނެތް ކަމަށެވެ. އަދި އޯޑިއޯތަކުގެ ތަހުގީގުދާގޮތް ބައްލަަވައި މައުލޫމާތު ހިއްސާ ކުރައްވާނެ ކަމަށް ޕީޖީ ވިދާޅުވިކަމަށެވެ.