އެމްއެމްޕީއާރުސީ ހިޔާނާތުގެ މައްސަލައިގައި އާތިފަށް ނަސޭހަތްދީ ޕީޖީން މައްސަލަ ފައިލްކޮށްފި
14 އޮކްޓޯބަރު 2025 | އަންގާރަ 03:17އެމްއެމްޕީއާރުސީ ޚިޔާނާތުގެ މައްސަލައިގައި އާތިފްއަށް 10 އަހަރުގެ ޖަލު ޙުކުމަކާއި އެއްލައްކަ ރުފިޔާގެ ޖޫރިމަނާ އެއް ކުރެވިދާނެ
އެފްއައިޔޫގެ ކުރީގެ ވެރިޔާ އިބްރާހީމް އާތިފް ޝަކޫރު
އެމްއެމްއޭގެ ފައިނޭންޝަލް އިންޓެލިޖެންސް ޔުނިޓު (އެފްއައިޔޫ) ގެ އިސް ވެރިޔަކަށް ކުރިން ހުންނެވި އިބްރާހިމް އާތިފު ޝަކޫރުގެ މައްޗަށް އުފުލާފައިވާ މަނީ ލައުންޑަރ ކުރުމުގެ ޤާނޫނާއި ޚިލާފުވުމުގެ މައްސަލައިގައި އޭނާއަށް ނަސޭހަތްދިނުމަށް ފަހު އެ މައްސަލަ ފައިލްކުރުމަށް ޕީޖީ އޮފީހުން ނިންމައިފިއެވެ.
މި މައުލޫމާތު ޕީޖީ އޮފީހުން ރަސްމީކޮށް ހާމަކޮށްފަ އެއް ނުވެއެވެ. އެހެންނަމަވެސް ބައެއް ނޫސްތަކުގައި ރިޕޯޓްކޮށްފައިވާ ގޮތުން މި މައްސަލައިގައި އާތިފް އާއި އެކު ނަސޭހަތުގެ އެއްބަސްވުމެއް ވަނީ އެކުލަވާލާފައެވެ. މިކަމާއި ގުޅޭ ގޮތުން ޕީޖީގެ ބަހެއް އަދި މި ނޫހަށް ލިބިފަ އެއް ނުވެއެވެ. އަދި އާތިފްގެ ބަހެއް ހޯދުމަށް ރާއްޖެއެމްވީ އިން ކުރި މަސައްކަތް ވެސް މިހާތަނަށް ކާމިޔާބުވެފައި ނުވެއެވެ.
އާތިފުގެ މައްސަލައިގައި މިދިޔަ ހަފްތާގައި ކްރިމިނަލް ކޯޓުން އަޑުއެހުމެއް ތާވަލް ކުރި ނަމަވެސް، އެ މައްސަލަ އަނބުރާ ފޮނުވުމަށް ޕީޖީން އެދިފައިވާތީ އެ އަޑު އެހުން ވަނީ ކެންސަލްކޮށްފައެވެ. އޭނާގެ މައްޗަށް މަނީލައުންޑަރކުރުމުގެ ޤާނޫނާއި ޚިލާފުވުމުގެ ދައުވާ ކޮށްފައި ވަނީ އެމްއެމްޕީއާރުސީ ހިޔާނާތުގެ މައްސަލައިގައެވެ.
އާތިފްގެ މައްޗަށް ދައުވާކޮށްފައި ވަނީ އެމްއެމްޕީއާރުސީގެ ޚިޔާނާތުގެ މުއާމަލާތްތައް ހިނގި ކަމަށް ޝައްކު ކުރެވޭ ދުވަސް ވަރު އެކަން އިދާރާތަކަށް ރިޕޯޓްކޮށްފައި ނުވާ ކަމަށް ބުނެއެވެ. އެ ކުށް ސާބިތުވެއްޖެ ނަމަ، އެ މައްސަލައިގެ ޙުކުމަކީ އޭނާގެ މައްޗަށް 10 އަހަރު ދުވަހަށް ޖަލަށް ލުމަށާއި އެއްލައްކަ ރުފިޔާ އިން ޖޫރިމަނާކުރުމެވެ.
މީގެ ކުރިން އާތިފް ވިފާޅުވެފައި ވަނީ އެމްއެމްޕީއާރުސީގެ ޚިޔާނާތުގެ މައްސަލައިގައި ޝައްކުކުރެވޭ ކަންތައްތަކެއް ހުރި ނަމަވެސް އެކަން ރިޕޯޓު ކޮށްފައި ނުވަނީ އޭރުގެ ގަވަރުނަރު އަޒީމާ އާދަމްގެ އިރުޝާދުގެ މަތިން ކަމަށެވެ. އާތިފް ވިދާޅުވީ ކަމާއި ގުޅުން ހުރި އިދާރާތަކަށް އެ މައްސަލަ ހުށަހެޅުމަށް ތަކުރާރުކޮށް މަސައްކަތް ކުރައްވާފައިވާ ކަމަށެވެ. އެހެންނަމަވެސް ރާއްޖެ އިން ބޭރުން އަންނަ ކަޅު ފައިސާ ހުއްޓުވުމަށް ފޯކަސްކުރުމަށް ގަވަރުނަރު އަންގަވާފައިވާ ކަމަށް އާތިފް ވަނީ މީގެ ކުރިން ވިދާޅުވެފައެވެ. އެހެންނަމަވެސް އާތިފްގެ އެ ތުހުމަތުތައް އަޒީމާ ވަނީ އެކަން ދޮގުކުރައްވާފައެވެ.
