މިނިވަންކަންމަތީ ޑިމޮކްރަސީ ނެގެހެއްޓުމަށް މުއައްސަސާތަކުގެ ދައުރު ބޮޑު: ނާއިބުރައީސް
15 ސެޕްޓެމްބަރު 2021 | ބުދަ 20:11ހަމައެކަނި ދެފުށް ފެންނަ އިންތިޚާބުތަކެއް ބާއްވައިގެން މިކަން ނިމުނީކަމަށް ގަބޫލުކޮށްގެން ނުވާނެ
ނާއިބުރައީސް ފައިސަލް ނަސީމް
މިނިވަންކަމާއި، ހަމަހަމަކަންމަތީ ޑިމޮކްރަސީ ނެގެހެއްޓުމަށްޓަކައި، ހުރިހާ މުއައްސަސާތަކުން ރަނގަޅަށް ފުރިހަމަ މަސައްކަތްތަކެއް ކުރަންޖެހޭކަމަށް ރައީސުލްޖުމްހޫރިއްޔާގެ ނާއިބު ފައިސަލް ނަސީމް ވިދާޅުވެއްޖެއެވެ.
ނާއިބުރައީސް ފައިސަލް ނަސީމް މިފަދައިން ވިދާޅުވީ އިލެކްޝަންސް ކޮމިޝަންގެ ކުރިއަށް އޮތް 5 އަހަރުގެ ސްޓްރެޓީޖިކް އެކްޝަން ޕްލޭން އިފްތިތާހުކުރުމުގެ ރަސްމިއްޔާތުގައި، ދުނިޔޭގެ ޑިމޮކްރަސީ ދުވަހާ ގުޅޭގޮތުން ވާހަކަދައްކަވަމުންނެވެ. މި ރަސްމިއްޔާތުގައި ނާއިބުރައީސް ވިދާޅުވީ 2008 ވަނަ އަހަރު ވުޖޫދަށް އައި ފެހި ގާނޫނުއަސާސީން ޒަމާނީ ޑިމޮކްރަސީއަކަށް މަގުފަހިކޮށްދީފައިވާކަމަށެވެ. ވަކިން ޚާއްސަކޮށް ވޯޓު ދިނުމުގެ ހައްގު ކަށަވަރުކޮށްދީފައިވާކަން ނާއިބުރައީސް ފާހަގަކުރެއްވިއެވެ.
ނާއިބުރައީސް ވިދާޅުވީ މިކަންކަން ގާނޫނު އަސާސީން ކަށަވަރުކޮށްދީފައިވާއިރު، ހަމައެކަނި ދެފުށް ފެންނަ އިންތިޚާބުތަކެއް ބާއްވައިގެން މިކަން ނިމުނީކަމަށް ގަބޫލުކޮށްގެން ނުވާނެ ކަމަށެވެ. ޑިމޮކްރަސީ އާއި އެންމެންގެ މެދުގައި މިނިވަންކަމާއި ހަމަހަމަކަން ދެމެހެއްޓުމަށްޓަކައި، ހުރިހާ މުއައްސަސާއަކުންވެސް އެމީހުންގެ މަސައްކަތްތައް ރަނގަޅަށް ކުރަންޖެހޭ ކަމަށް ނާއިބުރައީސް ވިދާޅުވިއެވެ. ކަންކަން ތަރުތީބުކުރަންޖެހޭނީ އެއްވެސް މީހެއްގެ ހައްގު ގެއްލިގެން ނުދާނެ ގޮތަށް ކަމަށް ވިދާޅުވިއެވެ.
ނައިބުރައީސް ވިދާޅުވީ ކޮންމެ ގައުމަކަށްވެސް ތަރައްގީއާ ހަމައަށް ދެވެނީ ހަމަހަމަކަން އޮވެގެން ކަމަށެވެ. މިއަދު އޮތް ވެރިކަމުގެ ނިޒާމުގެ ތެރެއިން އެކަން ކަށަވަރުކުރުމަށް ގިނަ މަސައްކަތްތަކެއް ކުރާކަން ފާހަގަކުރައްވައި، ވަކިން ޚާއްސަކޮށް އަންހެނުންނަށް ގިނަ މަގާމުތަކެއް ދެވިފައިވާކަމަށް ނާއިބުރައީސް ވަނީ ވިދާޅުވެފައެވެ. އަދި ސިޔާސީ މައިދާނުގައި އަންހެނުންގެ ދައުުރު ދުވަހެއް ދުވަހަކަށް އިތުރުކުރަން ޖެހޭކަމަށް ނާއިބުރައީސް ވިދާޅުވިއެވެ. މިއީ އެންމެ ފަސޭހައިން ގައުމެއް ކުރިއަރައިގެންދާނެ ކަންތައް ކަމަށް ވެސް ވިދާޅުވިއެވެ.
މީގެ އިތުރަށް ނާއިބުރައީސް ވަނީ މި ޕެންޑަމިކުގެ ސަބަބުން ދިމާވި ގޮންޖެހުންތަކުގެ މައްޗަށް އަލިއަޅުވާލާފައެވެ. އަދި މިވަގުތުގެ ހާލަތު އޮތް ގޮތުން އެންމެން އަތުގުޅާލައިގެން މަސައްކަތް ކުރަންޖެހިފައިވާ މިންވަރު އެމަނިކުފާނު ފާހަގަކުރެއްވިއެވެ. މި ބަލިމަޑުކަމުގެ ތެރޭގައި ގެއްލިގެންދިޔަ ވަގުތު އަނބުރާ ހޯދަންޖެހިފައިވާކަމަށާއި، ކުރިއަށް އޮތް ތަނުގައިވެސް ގައުމުގެ ހަމަޖެހުން ގާއިމްކުރަން އެންމެން އަތުގުޅާލައިގެން މަސައްކަތްކުރުން މުހިންމު ކަމަށް ނާއިބުރައީސް ވިދާޅުވިއެވެ.
