ފަތުރުވެރިކަމުގެ ސިނާއަތުގައި ހިއުމަން ރިސޯސްގެ ދާއިރާތަކަށް ދިވެހިން ތަމްރީންކުރުން މުހިއްމު - ނައިބު ރައީސް
ފަތުރުވެރިކަމުގެ ސިނާއަތަށް އަންނަ ބަދަލުތައް ދެނެގަނެ، އެކަންކަމާ ގުޅޭގޮތުން ކަމާބެހޭ ފަރާތްތަކާ މަޝްވަރާކުރަންޖެހޭ
ނައިބު ރައީސް ފައިސަލް ނަސީމް
ފަތުރުވެރިކަމުގެ ސިނާއަތުގައި ހިއުމަން ރިސޯސްގެ ދާއިރާތަކަށް ދިވެހިން ތަމްރީން ކުރުން މުހިއްމުކަމަށް، ރައީސުލްޖުމްހޫރިއްޔާގެ ނައިބު ފައިސަލް ނަސީމް ވިދާޅުވެއްޖެއެވެ.
އާދިއްތަ ދުވަހު ބޭއްވި އިންޓަނޭޝަނަލް މޯލްޑިވްސް ޓްރެވެލް މާކެޓް (އައިއެމްޓީއެމް) ފެއާގައި ނައިބު ރައީސް ވިދާޅުވީ، ރާއްޖޭގެ މައި ސިނާއަތަކީ ފަތުރުވެރިކަމުގެ ސިނާއަތް ކަމަށެވެ.
ކޮވިޑް 19އަށް އިޝާރަތްކުރައްވައި ނައިބު ރައީސް ފައިސަލް ވިދާޅުވީ، މި ބަލިމަޑުކަމުން އަރައިގަތުމަށް ހުރިހާ ފަރާތްތަކެއްގެ އެއްބާރުލުން ލިބުނުކަމަށެވެ. އަދި ހުރިހާ ފަރާތްތަކުންވެސް ސަރުކާރަށް ދޭންޖެހޭ އެއްބާރުލުން ދިންކަންވެސް ނައިބު ރައީސް ވަނީ ފާހަގަކުރައްވާފައެވެ. އެހެންކަމުން އެ މަސައްކަތް އެހާ ފުރިހަމަކަމާއެކު ކުރިއަށް ގެންދެވުމުގެ ނަތީޖާއެއްގެ ގޮތުން، ނިމިދިޔަ އަހަރު 1.7 މިލިއަން ފަތުރުވެރިން ރާއްޖެއަށް ޒިޔާރަތްކޮށްފައި ވާކަމަށް ނައިބު ރައީސް ވިދާޅުވިއެވެ.
މީގެއިތުރުން ނައިބު ރައީސް ވިދާޅުވީ، ފަތުރުވެރިކަމުގެ ސިނާއަތަށް އަންނަ ބަދަލުތައް ދެނެގަނެ، އެކަންކަމާ ގުޅޭގޮތުން ކަމާބެހޭ ފަރާތްތަކާ މަޝްވަރާކުރަން ޖެހޭކަމަށެވެ. އަދި އެ ފަރާތްތަކުން ދޭ އިރުޝާދުތައް ބަލައިގަނެ، އެއަށް އަމަލުކުރުން މުހިއްމުކަމަށް ނައިބު ރައީސް ވިދާޅުވިއެވެ.
މީގެއިތުރުން، ފަތުރުވެރިކަމުގެ ސިނާއަތުގައި ހިއުމަން ރިސޯސްގެ ދާއިރާތަކަށް ދިވެހިން ތަމްރީން ކުރުން މުހިއްމުކަމަށާއި، މިކަންކަމަށް ކުރިއަށް އޮތް ސަރުކާރުން ވީހާވެސް ބޮޑަށް ސަމާލުކަންދެއްވައި ކުރިއަށް ގެންދަވާނެކަމަށް އުއްމީދުކުރައްވާ ކަމަށްވެސް ނައިބު ރައީސް ވަނީ ވިދާޅުވެފައެވެ.
ކޮވިޑް 19އާ ގުޅިގެން ރާއްޖޭގެ ފަތުރުވެރިކަމުގެ ސިނާއަތަށް ނުހަނު ގިނަގުނަ ގޮންޖެހުންތަކާ ކުރިމަތިލާން ޖެހުނުނަމަވެސް، ސަރުކާރުން ވަނީ ރައްކާތެރިކަމުގެ ހަރުދަނާ ފިޔަވަޅުތަކެއް އަޅައި ކާމިޔާބުކަމާއެކު ބަލިން އަރައިގެންފައެވެ.
