އެގޮތަށް މައުލޫމާތުތައް ހާމަކުރާނަމަ މައުލޫމާތުތަކަށް ރައްޔިތުން އެދޭ މިންވަރު މަދުވާނެ
ރާއްޖެޓީވީގެ ފަލަސުރުޚީ ޕްރޮގްރާމްގައި އިންފޮމޭޝަން ކޮމިޝަނަރު އަޙުމަދު ޢާހިދު ރަޝީދު ވާހަކަދައްކަވަނީ
ތަސައްވުރަކީ ގާނޫނުގައި ބުނެފައިވާ މިންގަނޑަށް މައުލޫމާތަށް އެދުމުގެ ކުރިން ދައުލަތުގެ ހުރިހާ އިދާރާއަކުން މައުލޫމާތުތައް ގަވާއިދުން ހާމަކުރާ ހިސާބަށް ގެންދިއުން ކަމަށް އިންފޮމޭޝަން ކޮމިޝަނަރު އަޙުމަދު ޢާހިދު ރަޝީދު ވިދާޅުވެއްޖެއެވެ.
ރާއްޖެޓީވީގެ ފަލަސުރުޚީ ޕްރޮގްރާމްގައި ޢާހިދު ވިދާޅުވީ އެކޮމިޝަންގެ ތަސައްވުރަކީ ދައުލަތުގެ ހުރިހާ އިދާރާކުން ވެސް ހާމަކުރަންޖެހޭ މައުލޫމާތުތައް ގަވާއިދުން ހާމަކުރާ ހިސާބަށް ގެންދިއުން ކަމަށެވެ. އެގޮތަށް މައުލޫމާތުތައް ހާމަކުރާނަމަ އެފަދަ މައުލޫމާތުތަކަށް ރައްޔިތުން އެދޭ މިންވަރު މަދުވާނެ ކަމަށް އޭނާ ވިދާޅުވިއެވެ. ޢާހިދު ވިދާޅުވީ ގާނޫނުގައި ބުނެފައިވާ މިންގަނޑަށް ދައުލަތުގެ ހުރިހާ އިދާރާއަކުން ވެސް އެއްހަމައެއްގައި މަސައްކަތް ކުރާނަމަ މައްސަލަތައް ވެސް މަދުވާނެ ކަމަށެވެ.
އެހިސާބަށް ގެންދިއުމަށް ގިނަ މަސައްކަތްތައް ކުރާކަން ފާހަގަކުރައްވައި އާހިދު ވިދާޅުވީ އަބަދުވެސް މަސައްކަތް ކުރަނީ އެފަދަ މުއައްސަސާއަކާ މަޝްވަރާކޮށް ހައްލު ހޯދުމަށް ކަމަށެވެ. އެގޮތުން މުއައްޒަފުން ހޭލުންތެރި ކުރުވުމާއި، ދިމާވާ ގޮންޖެހުންތައް ދެނެގަނެ ހައްލު ހޯދައިދޭ ކަމަށް އޭނާ ވިދާޅުވިއެވެ. އަދި ވިދާޅުވީ ދައުލަތުގެ އިދާރާތަކުން ކޮންމެހެން އަޕްޑޭޓް ކޮށްފައި ހުންނަން ޖެހޭ މައުލޫމާތުތައް އަޕްޑޭޓް ކުރަންޖެހޭ ކަމަށާއި، އެކަމަށް ވެސް ވަރަށް ބާރު އަޅާ ކަމަށެވެ.
ރާއްޖޭގައި ކުރިންސުރެ އޮތީ ސިއްރުކުރުމުގެ ސަގާފަތެއްކަން ފާހަގަކުރައްވައި އޭނާ ވިދާޅުވީ, މައުލޫމާތަށް އެދިގެން މައުލޫމާތު ނުލިބޭކަމުގެ ޝަކުވާއެއް އަތުވެއްޖެނަމަ އެމައްސަލައެއް ބަލާ ކަމަށެވެ. އަދި ފޯރުކޮށްދޭން ޖެހޭ މައުލޫމާތެއް ނަމަ އެމައުލޫމާތެއް ފޯރުކޮށްދޭ ކަމަށެވެ. އަދި ދައުލަތުގެ އިދާރާތަކުން މައުލޫމާތު ހާމަކުރާ މިންވަރާއި ހާމަކޮށްފައި ހުރި ގޮތް މޮނިޓަރ ކުރަން ފަށާނެ ކަމަށެވެ.
