ޕޮގްބާ މި ވަގުތު ޔުނައިޓެޑުގައި ހުރީ ހިތްހަމަޖެހިގެން

ފްރާންސްގެ މިޑްފީލްޑަރު ޕައުލް ޕޮގްބާ މި ވަގުތު މެންޗެސްޓާ ޔުނައިޓެޑުގައި ހުރީ ހިތްހަމަޖެހިގެން ކަމަށް އޭނާގެ ބޭބެ މަތިއަސް ޕޮގްބާ ބުނެފިއެވެ.

އުމުރުން 28 އަހަރުގެ ޕޮގްބާ ޔުނައިޓެޑުގެ އެއްބަސްވުމުގައި ހުރީ މި ސީޒަނުގެ ނިޔަލަށެވެ. އަންނަ އަހަރުގެ ޖޫން މަހު ޕޮގްބާގެ އެއްބަސްވުން ހަމަވާއިރު، މިހާތަނަށް ޔުނައިޓެޑުން ހުށަހެޅި އައު އެއްބަސްވުމަށް ޕޮގްބާގެ ފަރާތުން އެކަށީގެންވާ އެއްބާރުލުމެއް ލިބިފައިނުވާ ކަމަށް ރިޕޯޓުތައް ބުނެއެވެ.

މީގެ ކުރިން ޕޮގްބާގެ އޭޖެންޓް މިނޯ ރައިއޯލާ ވަނީ ޔުނައިޓެޑުގައި ޕޮގްބާ ހުރީ ހިތްހަމަޖެހިގެން ނޫން ކަމަށާއި، އެހެންކަމުން ޔުނައިޓެޑް ދޫކޮށް އެހެން ކުލަބަކަށް ޕޮގްބާ ބަދަލުވާން ޖެހޭ ކަމަށް ބުނެފައެވެ. ނަމަވެސް ދާދި ފަހުން ދިން އިންޓަވިއުއެއްގައި ޕޮގްބާގެ ބޭބެ މަތިއަސް ޕޮގްބާ ބުނީ މި ސީޒަނުގައި ޕޮގްބާ ޔުނައިޓެޑުގައި ހުރީ ހިތްހަމަޖެހިގެން ކަމަށާއި، އެކަމަކު ޔުނައިޓެޑުގައި މަޑުކުރުމާމެދު އޭނާ އަދި ވަކި ގޮތެއް ނިންމާފައިނުވާ ކަމަށެވެ. އަދި އެއީ ޕޮގްބާގެ އަމިއްލަ ނިންމުމެއް ކަމަށްވެސް ވަނީ ބުނެފައެވެ.

މި ސީޒަން ނިމުމުން ޕޮގްބާގެ އެއްބަސްވުން ހަމަވާއިރު، ކުރިއަށް އޮތް ޖެނުއަރީ ޓްރާންސްފާގައި ޕޮގްބާ ވިއްކާލަން ޔުނައިޓެޑަށް މަޖުބޫރުވާނެއެވެ. އެއީ ޖެނުއަރީ މަހު އޭނާ ވިއްކާނުލެވިއްޖެނަމަ، އަންނަ އަހަރުގެ ހޫނު މޫސުމުގައި ހިލޭ ޓްރާންސްފާއެއްގެ ދަށުން ޕޮގްބާއަށް ކުލަބު ބަދަލުކުރެވޭނެތީއެވެ.

ރިޕޯޓްތައް ބުނާގޮތުން ރެއާލް މެޑްރިޑުން މިހާރު އަންނަނީ ޖެނުއަރީ މަހު ޕޮގްބާ ގަތުމަށް މަސައްކަތްކުރަމުންނެވެ. ރެއާލުން ބޭނުންނަމަ ޖެނުއަރީ މަހުގެ އެއްވަނަ ދުވަހުން ފެށިގެން ޕޮގްބާއާއެކު އެއްބަސްވުމެއްގައި ސޮއިކުރެވޭއިރު، ރެއާލުގެ ވިސްނުން ހުރީ ކުޑަ އަގެއް ދެއްކުމަށްފަހު ޕޮގްބާ ގަތުމަށް ކަމަށާއި، އެގޮތުން ރެއާލުން އޭނާއަށް 17 މިލިޔަން ޔޫރޯ ހުށަހަޅާނެ ކަމަށް ރިޕޯޓުތައް ބުނެއެވެ.

އެކަމަކު އިނގިރޭސި މީޑިއާ ރިޕޯޓުތައް ބުނާގޮތުން ޔުނައިޓެޑުން އަންނަނީ ޖެނުއަރީ މަހުގެ ކުރިން ޕޮގްބާގެ އެއްބަސްވުން އާކުރުމަށް މަސައްކަތްކުރަމުންނެވެ. އަދި މި ސީޒަނުގައި މޮޅު ކުޅުމެއް ދައްކަމުން އަންނަ ޕޮގްބާ ޔުނައިޓެޑުގައި މަޑުކުރުވަން އެ ޓީމުގެ ކޯޗު އޮލެ ގުނަ ސޯލްޝެއާ ވަނީ އެ ކުލަބުގެ ސަޕޯޓަރުންގެ ކިބައިން އެހީއަށްވެސް އެދިފައެވެ.

މީގެ ކުރިން އެތައް ފަހަރަކު ޔުނައިޓެޑް ދޫކޮށްލަން ޕޮގްބާ މަސައްކަތް ކޮށްފައިވާއިރު، ރެއާލުގެ އިތުރުން ޔުވެންޓަސް އާއި ޕީއެސްޖީންވެސް އަންނަނީ ޕޮގްބާ ހޯދުމަށް މަސައްކަތްކުރަމުންނެވެ. އަދި މީގެ ކުރިން ޕޮގްބާ ވަނީ ކޮންމެވެސް ދުވަހަކުން ރެއާލް މެޑްރިޑަށް ކުޅުމަކީ ދެކެމުން އަންނަ ހުވަފެނެއް ކަމަށްވެސް ބުނެފައެވެ.

ޔުނައިޓެޑުން 2010 ވަނަ އަހަރު ކެރިއަރު ފެށި ޕޮގްބާ މީގެ ކުރިން ވަނީ ހިލޭ ޓްރާންސްފާއެއްގެ ދަށުން ޔުވެންޓަސްއަށް ބަދަލުވެ އެ ޓީމުގައި ހަތަރު ސީޒަން ހޭދަކޮށްފައެވެ. އޭގެ ފަހުން އަނެއްކާވެސް ޕޮގްބާ އަނބުރާ ޔުނައިޓެޑަށް ބަދަލުވީ 2016 ވަނަ އަހަރު 105 މިލިޔަން ޔޫރޯއަށެވެ. ޕޮގްބާ ވަނީ މިހާތަނަށް ޔުނައިޓެޑާއެކު އިނގިރޭސި ލީގު ކަޕުގެ އިތުރަށް ޔުއެފާ ޔޫރޮޕާ ލީގު ކާމިޔާބުކޮށްފައެވެ.