މެންޗެސްޓާ ޔުނައިޓެޑަށް ކުޅެމުން އަންނަ އިންގްލެންޑުގެ މިޑްފީލްޑަރު ޖެސޭ ލިންގާޑް ހޯދަން ލެސްޓާ ސިޓީން ޝައުގުވެރިކަން ފާޅުކޮށްފައިވާ ކަމަށް ރިޕޯޓުތައް ބުނެފިއެވެ.

އުމުރުން 28 އަހަރުގެ ލިންގާޑް ޔުނައިޓެޑާއެކު މިހާރު ހަދާފައި އޮތް އެއްބަސްވުން މި ސީޒަން ނިމުމުން ހަމަވާނެއެވެ. އެއާއެކު ލިންގާޑުގެ އެއްބަސްވުން އާކުރުމުގެ މަޝްވަރާތައް ޔުނައިޓެޑުން ފެށި ނަމަވެސް، އިނގިރޭސި މީޑިއާ ރިޕޯޓުތައް ބުނާ ގޮތުން ޔުނައިޓެޑުން ފުރުސަތު ލިބުން މަދުވުމާއެކު، ކުލަބު ބަދަލުކުރަން ލިންގާޑް ބޭނުންވެއެވެ. އެހެންކަމުން ޔުނައިޓެޑުގެ އެއްބަސްވުން އާކުރަން އޭނާ ދެކޮޅު ހަދާފައިވާ ކަމަށްވެސް ރިޕޯޓުތައް ބުނެއެވެ.

އެއާއެކު ލިންގާޑް ހޯދަން އިނގިރޭސި ގިނަ ކުލަބުތަކުން މަސައްކަތްކުރަމުން އަންނައިރު، ރިޕޯޓުތައް ބުނާ ގޮތުން ލިންގާޑް ހޯދަން ލެސްޓާއިން މިހާރު ވަނީ ޝައުގުވެރިކަން ފާޅުކޮށްފައެވެ. އަދި ލެސްޓާއިން ލިންގާޑް ގެންނަން ބޭނުންވަނީ އެ ޓީމުގެ މެދުތެރެއަށް ކުޅެމުން އަންނަ ޖޭމްސް މެޑިސަންގެ ބަދަލެއްގެ ގޮތުގައި ކަމަށްވެސް ރިޕޯޓުތައް ބުނެއެވެ.

ޔުނައިޓެޑުގައި ލިންގާޑަށް ފުރުސަތު ލިބުން މަދުވި ނަމަވެސް، މިދިޔަ ފިނި މޫސުމުގެ ޓްރާންސްފާ ބާޒާރުގައި ލޯނު އެއްބަސްވުމެއްގެ ދަށުން ވެސްޓް ހޭމް ޔުނައިޓެޑަށް ބަދަލުވެ، އެ ޓީމުގައި ލިންގާޑް ވަނީ ތަފާތު މޮޅު ކުޅުމެއް ދައްކާފައެވެ. އެގޮތުން ވެސްޓް ހޭމަށް ކުޅެދިން 16 މެޗުގައި އޭނާ ވަނީ ނުވަ ލަނޑު ޖަހާފައެވެ. އެއާއެކު ލިންގާޑް އަލުން އަނބުރާ ގެންދަން ވެސްޓް ހޭމުންވެސް މަސައްކަތްކުރަމުން އަންނަ ކަމަށް ރިޕޯޓުތައް ބުނެއެވެ.

މި ފަހަކަށް އައިސް ޔުނައިޓެޑުގެ ފުރަތަމަ އެގާރައިން ލިންގާޑަށް ފުރުސަތު ލިބުން މަދުވި ނަމަވެސް، އޭނާ ވަނީ މިހާތަނަށް އެ ޓީމަށް ކުޅެދިން 212 މެޗުގައި 34 ލަނޑު ޖަހާފައެވެ. އަދި މީގެ ކުރިން އޭނާ ވަނީ ޔުނައިޓެޑާއެކު އެފްއޭ ކަޕާއި، އިނގިރޭސި ލީގު ކަޕާއި، އެފްއޭ ކޮމިއުނިޓީ ޝީލްޑުގެ އިތުރުން ޔުއެފާ ޔޫރޮޕާ ލީގު ކާމިޔާބުކޮށްފައެވެ.