ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް) އިން އިންތިޒާމުކޮށްގެން ބޭއްވުމަށް ހަމަޖެހިފައިވާ "ގައުމީ ބީޗް ވޮލީބޯޅަ މުބާރާތް 2021" ގައި ބައިވެރިވުމުގެ ފުރުސަތު ހުޅުވާލައިފިއެވެ.

މި އަހަރުގެ ގައުމީ ބީޗް ވޮލީބޯޅަ މުބާރާތް ބޭއްވުމަށް ހަމަޖެހިފައިވަނީ އަންނަ އޮކްޓޯބަރު މަހުގެ ހަތްވަނަ ދުވަހުން ފެށިގެން އެ މަހުގެ 30 ވަނަ ދުވަހުގެ ނިޔަލަށެވެ. މި މުބާރާތް ކުރިއަށްދާނީ މާލެ ދޮންގަނޑު ބީޗް ވޮލީބޯޅަ ކޯޓުގެ އިތުރުން ހުޅުމާލެ ރެޑްބުލް ބީޗް ވޮލީބޯޅަ ކޯޓުގައެވެ.

އަންގާރަ ދުވަހު ވީއޭއެމުން ނެރުނު ބަޔާނެއްގައި ބުނީ މި ފަހަރުގެ މުބާރާތް ކުރިއަށްދާނީ ތިން ޑިވިޝަނަކަށް ބަހާލައިގެން ކަމަށެވެ. އެއީ 19 އަހަރުން ދަށުގެ އަންހެން އަދި ފިރިހެން ޑިވިޝަނާއި، 23 އަހަރުން ދަށުގެ އަންހެން އަދި ފިރިހެން ޑިވިޝަނުގެ އިތުރުން އޯޕަންގެ އަންހެން އަދި ފިރިހެން ޑިވިޝަނެވެ.

އޭގެ ތެރެއިން 19 އަހަރުން ދަށުގެ އަންހެން އަދި ފިރިހެން ޑިވިޝަނުގައި ބައިވެރިވެވޭނީ މި އަހަރުގެ ޑިސެމްބަރު މަހުގެ 31 ވަނަ ދުވަހަށް 20 އަހަރު ނުފުރޭ ކުޅުންތެރިންނަށެވެ. އަދި 23 އަހަރުން ދަށުގެ އަންހެން އަދި ފިރިހެން ޑިވިޝަނުގައި މި އަހަރުގެ ޑިސެމްބަރު މަހުގެ 31 ވަނަ ދުވަހަށް 24 އަހަރު ނުފުރޭ ކުޅުންތެރިންނަށް ވާދަކުރެވޭއިރު، އޯޕަންގެ އަންހެން އަދި ފިރިހެން ޑިވިޝަނުގައި ކޮންމެ އުމުރެއްގެ ކުޅުންތެރިއަކަށްވެސް ބައިވެރިވެވޭނެ ކަމަށް ވީއޭއެމުން މައުލޫމާތުދެއެވެ.

ވީއޭއެމްއިން ނެރެފައިވާ ބަޔާނުގައިވާ ގޮތުން މުބާރާތުގައި ބައިވެރިވުމުގެ އެންމެ ފަހު ތާރީޚަކީ މި މަހުގެ 26 ވާ އާދީއްތަ ދުވަހުގެ 12:00 އެވެ. އަދި ހަމަ އެ ތާރީޚުގެ ކުރިން ޓީމު ލިސްޓުވެސް ހުށަހަޅަންޖެހޭނެ ކަމަށް ވީއޭއެމުން ވަނީ ބުނެފައެވެ. މި މުބާރާތުގައި ބައިވެރިވުމުގެފޯމާއި ޓީމު ލިސްޓްއޮންލައިންކޮށް ލިބެން ހުންނާނެ ކަމަށްވެސް ވީއޭއެމުން ނެރުނު ބަޔާނުގައި ވަނީ ބުނެފައެވެ.

މި އަހަރު ވީއޭއެމުން ގައުމީ ބީޗް ވޮލީބޯޅަ މުބާރާތް ބާއްވާއިރު، ކޮވިޑް-19 އާ ގުޅިގެން މިދިޔަ އަހަރު މި މުބާރާތް ބާއްވާފައެއް ނުވެއެވެ.