ޗައިނާގެ ސިޓީއެއްގައި ކޮވިޑް ފެތުރެމުންދާތީ ދަތުރުފަތުރުކުރުން ހުއްޓާލައި ފިޔަވަޅުތައް ވަރުގަދަކޮށްފި

ޗައިނާގެ ދެކުނު އިރުމަތީ ޕްރޮވިންސެއް ކަމުގައިވާ ފޫޖިއާން ގައި ކޮވިޑް-19 ފެތުރެމުންދާތީ ވައިރަސް ފެތުރުން ކޮންޓްރޯލްކުރުމުގެ ގޮތުން ސިނަމާތަކާއި ޖިމްތައް ބަންދުކޮށް ހައިވޭއިން ދަތުރުކުރުމުގައި ފިޔަވަޅުތައް ވަރުގަދަކޮށްފިއެވެ.

މީގެއިތުރުން އެޕްރޮވިންސްގައި ދިރިއުޅެމުންދާ ރައްޔިތުން ޕްރޮވިންސް ދޫކޮށް ނުދިޔުމަށްވެސް ވަނީ އަންގާފައެވެ. ކޮވިޑްގެ ހާލަތު އެޕްރޮވިންސްގެ ސިޓީއެއް ކަމުގައިވާ ޕުޓިއަންގައި ވަނީ ސީރިޔަސް ހާލަތުގައި ކަމަށް ޗައިނާގެ ދައުލަތުގެ މީޑިޔާ ސީސީޓީވީން ވަނީ ރިޕޯޓްކޮށްފައެވެ. އަދިވެސް އިތުރު ކޭސްތައް ފެނުމުގެ ފުރުސަތު އޮތުމާއެކު ސްކޫލްތަކާއި ފެކްޓްރީތައް ބަންދުކުރުމަކީވެސް އެކަށީގެންވާ ކަމެއްކަމަށް ސީސީޓީވީން ވަނީ ރިޕޯޓްކޮށްފައެވެ.

ސްކޫލްތަކުގެ ބައެއް ސެޝަންތައް މިހާރުވެސް ކުރިޔަށް ގެންދިޔުން ހުއްޓާލާފައިވާއިރު ޗައިނާގެ ނޭޝަނަލް ހެލްތުން ވަނީ ޚާއްސަ ޓީމެއް މިހާރު އެސިޓީއަށް ފޮނުވާފައެވެ. ޕުޓިއަންގައި 3.2 މިލިއަން މީހުން ދިރިއުޅެމުންދެއެވެ.

ފޫޖިއާނުން ސެޕްޓެމްބަރ 10 ވަނަ ދުވަހުން ފެށިގެން 12 ވަނަ ދުވަހާ ހަމައަށް ޖުމްލަ 43 ކޭހެއް ވަނީ ފެނިފައެވެ. މީގެތެރެއިން 35 ކޭސް ފެނިފައިވަނީ ޕުޓިއަން އިންނެވެ.

މީގެއިތުރުން ވައިރަސް ހަށިގަނޑުގައި ހުރިކަމުގެ އަލާމާތެއް ނުފެނި ޕުޓިއަން އިން ސެޕްޓެމްބަރ މަހުގެ 10 ވަނަ ދުވަހުގެ ފަހުން މިހާތަނަށް 12 މީހަކު ކޮވިޑަށް ޕޮޒިޓިވްވެފައިވާ ކަމަށް އެގައުމުގެ ނޭޝަނަލް ހެލްތު ކޮމިޝަނުން ވަނީ ބުނެފައެވެ.

މިހާތަނަށް ނަގާފައިވާ ސާމްޕަލްތަކުގެ ޓެސްޓްތަކުގެ ނަތީޖާދައްކާ ގޮތުން ޕުޓިއަން އިން ކޮވިޑް ޖެހުނު ބައެއް މީހުންނަށް ޖެހިފައިވަނީ އެންމެ ހަލުވިކަމާއެކު ފެތުރެމުން އަންނަ ޑެލްޓާ ވޭރިއަންޓެވެ. ކޮންމެ ދުވަހަކުވެސް ހަދަމުން އަންނަ ޓެސްޓްތަކުގެ ތެރެއިން އެންމެ ފުރަތަމަ ކޭސްތައް ދެނެގަނެވިފައިވަނީ ޕުޓިއަން ސިޓީގައި އޮންނަ ޒިއަންޔޫ ކިހާ ސަރަހައްދުގައި ހުންނަ ސްކޫލެއްގައި ކިޔަވަމުންދާ ދަރިވަރުންތަކެއްގެ ތެރެއިންނެވެ.

ކަމާބެހޭ މާހިރުން ލަފާކުރާ ގޮތުގައި އެސަރަހައްދުން ފެނުނު ކޭސްތަކުގެ އަސްލަކީ ޒިއަންމެން ސިޓީން ސިންގަޕޫރަށް ދަތުރުކޮށްފައިވާ ދަރިވަރުންތަކެއްގެ ބެލެނިވެރިންނެވެ.

ޒިއަންޔޫން ކޭސްތައް ފެނުމާއެކު ނުވަލައްކަ މީހުން ދިރިއުޅެމުން އަންނަ އެސަރަހައްދުގައިވެސް ވަނީ ކޮވިޑް ފެތުރުން ކޮންޓްރޯލްކުރުމަށް ފިޔަވަޅުތައް އަޅާފައެވެ. އެގޮތުން ސަރަހައްދު ބަންދުކޮށްފައިވާއިރު އާބާދީ އެއްކޮށް ޓެސްޓްކުރުމުގެ މަސައްކަތްވެސް ވަނީ ފަށާފައެވެ. މީގެއިތުރުން އެސަރަހައްދުގައި ބަހާއި ޓެކްސީގެ ދަތުރުތައްވެސް ވަނީ ހުއްޓާލާފައެވެ.

ޗައިނާގައި އެންމެ ފަހުން މިގޮތަށް ކޭސްތަކެއް ފެނިގެން ރިޕޯޓްކޮށްފައިވަނީ އެގައުމުގެ އިރުމަތީގައި އޮންނަ ޕްރޮވިންސެއްކަމުގައިވާ ޖިއަންގްސޫންނެވެ. އެސަރަހައްދުން ކޮވިޑް ކޮންޓްރޯލްކުރެވިފައިވަނީ މީގެ ދެހަފްތާ ކުރިންނެވެ. އެސަރަހައްދުގައި މަސްދުވަސްވަންދެން ކޮވިޑް ފެތުރެމުންދިޔައެވެ.

ޗައިނާއިން މިހާތަނަށް 95،248 މީހުންނަށް ކޮވިޑް ޖެހިފައިވާއިރު 4،636 މީހުން ވަނީ މިބަލީގައި މަރުވެފައެވެ. ޗައިނާއަކީ އެންމެ ފުރަތަމަ ކޮވިޑް-19 ފެނުނު ގައުމެވެ.