ޔާމީނުގެ ސަޕޯޓަރުން ސުޕްރީމް ކޯޓު ކައިރީ މުޒާހަރާކޮށްފި
ނުކިޔަމަންތެރިކަން ދެއްކުމުގެ ސަބަބުން ފުލުހުންގެ ބެލުމުގެ ދަށަށް އެކަަކު ވަނީ ގެންގޮސްފައި
އިދިކޮޅުން ކުރިއަށް ގެންދިޔަ މުޒާހަރާ
ކުރީގެ ރައީސް އަބްދުﷲ ޔާމީނުގެ ފަރާތުން ހުށަހަޅާފައިވާ އިސްތިއުނާފު މައްސަލަ ސުޕްރީމް ކޯޓުގައި ކުރިއަށްދިޔައިރު، އެމަނިކުފާނުގެ ސަޕޯޓަރުން ސުޕްރީމް ކޯޓު ސަރަޙައްދުގައި މުޒާހަރާކޮށްފިއެވެ.
ގާތްގަނޑަކަށް 100 މީހުން އެއްވެ ކުރިއަށްގެންދިޔަ މި މުޒާހަރާގައި ފުލުހުންގެ ބެރިކޭޑް ފޫއަޅުވާލަން މަސައްކަތްކޮށް، ނުކިޔަމަންތެރިކަން ދައްކާފައިވެއެވެ. އެގޮތުން ނުކިޔަމަންތެރިކަން ދެއްކުމުގެ ސަބަބުން ފުލުހުންގެ ބެލުމުގެ ދަށަށް އެކަަކު ވަނީ ގެންގޮސްފައެވެ. މި މުޒާހަރާގައި ޕީޕީއެމް/ޕީއެންސީގެ ލީޑަރޝިޕްގެ އިސް ބައެއް ބޭފުޅުން ވެސް ޙަރަކާތްތެރިވެފައިވެއެވެ.
މި މުޒާހަރާގެ ބައިވެރިން ވަނީ ސުޕްރީމް ކޯޓު ސަރަޙައްދަށް އެއްވެ، ރައީސް ޔާމީނު މިނިވަން ކުރުމަށް ގޮވާލާފައެވެ. އަދި ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙުގެ އިސްތިއުފާއަށް ވެސް ގޮވާފައިވެއެވެ.
ރައީސް ޔާމީނުގެ ފަރާތުން 22 އިސްތިއުނާފީ ނުކުތާއެއް ހުށަހަޅާފައިވާއިރު، އާދިއްތަ ދުވަހުގެ އަޑުއެހުމުގައި އޭގެ ތެރެއިން 7 ނުކުތާއަކަށް ތަފްސީލީ ގޮތެއްގައި ވަނީ ވާހަކަ ދައްކަވާފައެވެ. ހޯމަ ދުވަހުގެ އަޑުއެހުމުގައި ރައީސް ޔާމީނުގެ ޤާނޫނީ ވަކީލުންގެ ޓީމުން އަލީ ޝާހު ވަނީ ބާކީ ހުރި އިސްތިއުނާފީ ނުކުތާތަަކަށް ވާހަކަ ދައްކަވާފައެވެ.
އެމްއެމްޕީއާރުސީގެ ހިޔާނާތުގައި ހިމެނޭ، ރިސޯޓެއްގެ ގޮތުގައި ތަރައްގީކުރުމަށް ކުށްޔަށް ދޫކުރި ގއ. ވޮޑުމުލާގެ އިކުއިޒިޝަން ކޮސްޓްގެ ގޮތުގައި ދައުލަތަށް ލިބެންޖެހޭ ފައިސާގެ ތެރެއިން އެއް މިލިއަން ޑޮލަރު އަމިއްލަފުޅު އެކައުންޓަށް ޖަމާކޮށް، އެފައިސާއިން މަނީ ލޯންޑަރ ކުރުމުގެ ކުށް، ރައީސް ޔާމީންގެ މައްޗަށް ސާބިތުވެ، އެމަނިކުފާނު ފަސް އަހަރަށް ޖަލަށްލުމާއެކު ފަސް މިލިއަން ޑޮލަރުން ޖޫރިމަނާކޮށް، އެފައިސާ ހަ މަސްދުވަހުގެ ތެރޭގައި މީރާއަށް ދެއްކުމަށް ކްރިމިނަލް ކޯޓުން ހުކުމްކުރީ 28 ނޮވެމްބަރު، 2019ގައެވެ. ކްރިމިނަލް ކޯޓުން ކުރި ހުކުމް ރަނގަޅު ނޫންކަމަށް ބުނެ، ރައީސް ޔާމީންގެ ފަރާތުން ހައިކޯޓުގައި އެ މައްސަލަ އިސްތިއުނާފްކުރިއެވެ.
ހައިކޯޓުގައި އިސްތިއުނާފްކުރި އެ މައްސަލާގައި މިދިޔަ ޖެނުއަރީ މަހުގެ 21 ވަނަ ދުވަހު ހައިކޯޓުން ވަނީ ކްރިމިނަލް ކޯޓުން ރައީސް ޔާމީންގެ މައްޗަށް އިއްވާފައިވާ ހުކުމަށް ތާއީދުކޮށް، ދަމަހައްޓާފައެވެ.
