މަރާމާތަށް ބަންދުކުރި ރެއާލް މެޑްރިޑުގެ ރަސްމީ ދަނޑު ކަމަށްވާ ސަންޓިއާގޯ ބާނަބެއުގައި ގިނަ ދުވަސްތަކެއް ފަހުން އެ ޓީމުން ކުޅުނު ފުރަތަމަ މެޗުން ސެލްޓަ ވީގޯ އަތުން ފަސޭހަކަމާއެކު މޮޅުވެއްޖެއެވެ.

ބާނަބެއުގައި މެޗުތައް ނުކުޅެން ނިންމީ އެ ދަނޑުގެ މަރާމާތުގެ މަސައްކަތްތައް ހުއްޓާނުލާ ކުރިއަށް ގެންދިޔުމަށް މިދިޔަ އަހަރުގެ ޖޫން މަހުގެ ތެރޭގައެވެ. އޭރު ކޮވިޑް-19 އާ ގުޅިގެން ސްޕެނިޝް ލީގު އޮތީ މެދުކަނޑާލާފައެވެ. އެހެންކަމުން އާދީއްތަ ދުވަހުގެރޭ ކުޅުނު މެޗުގެ ކުރިން ރެއާލުން ބާނަބެއުގައި އެންމެ ފަހުން ކުޅުނު މެޗަކީ މިދިޔަ އަހަރުގެ މާޗު މަހުގެ އެއްވަނަ ދުވަހު ވާދަވެރި ބާސެލޯނާއާ ދެކޮޅަށް ކުޅުނު އެލް ކްލަސިކޯ މެޗެވެ.

އޭގެ ފަހުން ބާނަބެއުގެ ބަދަލުގައި ރެއާލުގެ މެޗުތައް ކުޅެފައިވަނީ އެ ޓީމު ތަމްރީނުކުރަން ބޭނުންކުރާ އަލްފްރެޑޯ ޑި ސްޓެފާނޯ ސްޓޭޑިއަމްގައެވެ. އެކަމަކު 560 ދުވަހަށްފަހު ބާނަބެއުގައި އަލުން މެޗެއް ކުޅުނުއިރު، އެ ދަނޑުގެ މަރާމާތުގެ މަސައްކަތް އަދިވެސް އެއްކޮށް ނިންމާލާފައެއް ނުވެއެވެ. ނަމަވެސް ސްޕެނިޝް ލީގުގައި އާދީއްތަ ދުވަހުގެރޭ ކުޅުނު މެޗު ބަލަން ރެއާލުން ވަނީ 30،000 ސަޕޯޓަރުން ދަނޑަށް ވައްދާފައެވެ.

އަމިއްލަ ދަނޑުގައި ކުޅުނު މެޗުން ސެލްޓަ އަތުން ރެއާލް މޮޅުވީ ފަހަތުން އަރައި 5-2 ގެ ނަތީޖާއަކުންނެވެ.

ފޯރިގަދަ ކުޅުމެއް ފެނިގެންދިޔަ މި މެޗުގެ ވަރަށް ކުރީކޮޅު ސެލްޓައިން ވަނީ ލީޑު ނަގާފައެވެ. މެޗު ފަށައިގެން ހަތަރުވަނަ މިނެޓުގައި މި ލަނޑު އެ ޓީމަށް ކާމިޔާބުކޮށްދިނީ ސަންޓި މީނާއެވެ. އެކަމަކު އޭގެ 20 މިނެޓު ފަހުން ކަރީމް ބެންޒެމާ ވަނީ ރެއާލަށް ނަތީޖާ އެއްވަރުކޮށްދީފައެވެ.

މި މެޗުގައި ސެލްޓައިން ދެވަނަ ފަހަރަށް ލީޑު ނަގާފައިވަނީ މެޗުގެ 31 ވަނަ މިނެޓުގައި ފްރާންކޯ ސާވީ ކާމިޔާބުކޮށްދިން ލަނޑުންނެވެ. އެކަަމަކު ދެވަނަ ހާފުގައި ޖެހި ލަނޑުތަކާއެކު ރެއާލުން ވަނީ އެ ޓީމު ކޮޅަށް ނަތީޖާ އަނބުރާލާފައެވެ. އެގޮތުން ދެވަނަ ހާފުގައި ބެންޒެމާ ވަނީ އިތުރު ދެ ލަނޑު ޖަހައި މި މެޗުގައި ހެޓްރިކް ހަދާފައެވެ.

ދެން މި މެޗުގައި ރެއާލުން ކާމިޔާބުކުރި އަނެއް ދެ ލަނޑު ޖަހައިދިނީ ވިނީޝިއުސް ޖޫނިއާ އާއި އެޑޮއާޑޯ ކަމަވިންގާއެވެ. މި މެޗުގައި ކަމަވިންގާ ލަނޑު ޖެހިއިރު، މި މެޗަކީ މި ފަހަރުގެ ޓްރާންސްފާ ބާޒާރުގައި ރެނެސް ދޫކޮށް ރެއާލަށް ބަދަލުވި ފްރާންސްގެ ޒުވާން މިޑްފީލްޑަރު އެ ޓީމަށް ކުޅެދިން ފުރަތަމަ މެޗެވެ.

ލީގުގައި އާދީއްތަ ދުވަހުގެރޭ ހޯދި މޮޅާއެކު ރެއާލް އޮތީ ތާވަލުގެ އެއްވަނައިގައި ކުޅުނު ހަތަރު މެޗުން ލިބުނު 10 ޕޮއިންޓާއެކުއެވެ. ދެވަނައިގައި އޮތް ވެލެންސިއާ އާއި ތިންވަނައިގައި އޮތް އެންމެ ފަހުގެ ޗެމްޕިއަން އެތުލެޓިކޯ މެޑްރިޑަށްވެސް ހަތަރު މެޗުން ވަނީ 10 ޕޮއިންޓް ލިބިފައެވެ.