ޕީޕީއެމްއިން ކޮރަޕްޝަންގެ ވާހަކަ ދެއްކުމަކީ "އައްޗި" ކަމެއް: އިލްހާމް
12 ސެޕްޓެމްބަރު 2021 | އާދީއްތަ 19:13ޕީޕީއެމްއިން ކޮރަޕްޝަންގެ ވާހަކަ ދައްކާނަމަ ރައްޔިތުން ގޮސް އެމީހުންގެ އަނގަމަތީގައި ޓޭޕު އަޅަން ޖެހޭ
ޕީޕީއެމްގެ އިސް ބައެއް ބޭފުޅުން
އިދިކޮޅު ޕީޕީއެމުން ކޮރަޕްޝަންގެ ވާހަކަތައް ދެއްކުމަކީ "އައްޗި" ކަމެއް ކަމަށް ޖުމްހޫރީ ޕާޓީގެ ލީޑަރު ޤާސިމް އިބްރާހީމްގެ ޕޮލިޓިކަލް އެޑްވައިޒަރު އިލްހާމް އަޙުމަދު ވިދާޅުވެއްޖެއެވެ.
ހޮނިހިރު ދުވަހު ރާއްޖެޓީވީގެ ފަލަ ސުރުޚީ ޕްރޮގްރާމުގައި ބައިވެރިވެވަޑައިގެން ވާހަކަދައްކަވަމުން އިލްހާމް ވިދާޅުވީ, ޕީޕީއެމްގެ ސަރުކާރުގައި ކަން ހިނގައި ގޮސްފައިވަނީ އެންމެ ރަނގަޅަކަށް ނޫންކަން އެ ޕާޓީގައި މިހާރު ތިއްބެވި ބޭބޭފުޅުންނަށްވެސް އެނގިވަޑައިގަންނަވާނެ ކަމަށެވެ. އެހެންކަމުން އެ ބޭފުޅުންނަށް މިއަދު ކޮރަޕްޝަންގެ ވާހަކަ ދެއްކުމުގެ ޖާގައެއް ނޯންނާނެ ކަމަށާއި، މާޒީގައި ކަން ހިނގައި ގޮސްފައިވަނީ އެއަށްވުރެ ހަޑިކޮށް ކަމަށް އިލްހާމް ވިދާޅުވިއެވެ. ޕީޕީއެމުން ކޮރަޕްޝަންގެ ވާހަކަ ދައްކާނަމަ ރައްޔިތުން ގޮސް އެމީހުންގެ އަނގަމަތީގައި ޓޭޕު އަޅަން ޖެހޭނެ ކަމަށް އިލްހާމް ވިދާޅުވިއެވެ.
އިލްހާމް ވިދާޅުވީ, ކޮރަޕްޝަންގެ ވާހަކައިގެ އިތުރުން ކޯޓުތަކަށް ބާރުފޯރުވުމުގެ ވާހަކައާއި، މީހުން ޖަލަށްލައި އަނިޔާކުރުމުގެ ވާހަކަވެސް ޕީޕީއެމްއަށް ނުދެއްކޭނެ ކަމަށެވެ. ޕީޕިއެމްގެ ސަރުކާރުގައި, މީހަކު އަނގައިން ބަހެއް ބުނާ އިރަށް ޖަލަށްލާ ކަމަށެވެ. އަދި އޭރު, ރައީސް ޔާމީންގެ ސަރުކާރާ ދެކޮޅަށް ތިއްބެވި ގިނަ ބޭފުޅުންނަށް ހުކުމް ކުރެވުނު ގޮތަށް ބަލައިލިއަސް ރައީސް ޔާމީންގެ ސަރުކާރުގައި ފަނޑިޔާރުގެއަށް ބާރުފޯރުވާފައިވާ މިންވަރު ހާމަވެގެން ގޮސްފައިވާ ކަމަށް އިލްހާމް ވަނީ ވިދާޅުވެފައެވެ.
ވަކި މީހަކަށް ހުކުމް ކުރަން އެންގުމަށް ދަނީ އެ ސަރުކާރުގައި އިސްކޮށް ތިއްބެވި ޔުނީފޯމް އެޅި ބޭބޭފުޅުން ކަމަށް އިލްހާމް ވިދާޅުވިއެވެ. ޖަލަށް ލުން ނޫން އިތުރު ކަމެއް އޭރުގެ ސަރުކާރުގައި ނުހިނގާ ކަމަށާއި، އެހެންވީމައި ޕީޕީއެމްގައި މިހާރު ތިއްބެވި މެމްބަރުން، ކޯޓުތަކަށް ބާރުފޯރުވާ ވާހަކަ ދެއްކުމަކީ ހުތުރު ކަމެއް ކަމަށް އިލްހާމް ވަނީ ވިދާޅުވެފައެވެ.
އެހެންނަމަވެސް ޕީޕީއެމްގައި މިހާރު ތިއްބެވި މެމްބަރުންނަށް ތަރައްގީގެ ވާހަކަ ދެއްކޭނެ ކަމަށް އިލްހާމް ވިދާޅުވިއެވެ. ރާއްޖެއަށް އެންމެ ބޮޑު ތަރައްގީއެއް ގެނައީ ރައީސް ޔާމީންގެ ސަރުކާރުން ކަމީ އެންމެންވެސް ގަބޫލުކުރާ ހަގީގަތެއް ކަމަށް އިލްހާމް ވިދާޅުވިއެވެ.
ރައީސް ޔާމީންގެ ސަރުކާރުގައި ސަރުކާރާ އިދިކޮޅު ގިނަ ބޭބޭފުޅުން ތިއްބެވީ ޖަލުގައެވެ. އޭގެތެރޭގައި އެމަނިކުފާނުގެ ބޭބޭފުޅު މައުމޫން ޢަބްދުލްޤައްޔޫމާއި ފާރިޝް މައުމޫން ވެސް ހުންނެވީ ޖަލުގައެވެ. މީގެ އިތުރުންވެސް މިއަދުގެ ސަރުކާރުގައި އިސްކޮށް ތިއްބެވި ގިނަ ބޭބޭފުޅުން ވެސް ތިއްބެވީ ރައީސް ޔާމީންގެ ސަރުކާރުގައި ޖަލުގައެވެ.
