އަތޮޅުތަކުން ޕޮޒިޓިވްވި 72 މީހުންނާއެކު އިތުރު 138 މީހުން ކޮވިޑަށް ޕޮޒިޓިވްވެއްޖެ

ފާއިތުވި 24 ގަޑިއިރު ރާއްޖެއިން އިތުރު 138 މީހުން ކޮވިޑަށް ޕޮޒިޓިވްވެއްޖެއެވެ.

ހެލްތު ޕްރޮޓެކްޝަން އެޖެންސީ (އެޗްޕީއޭ)ން އެންމެފަހުން އާންމުކޮށްފައިވާ ތަފާސްހިސާބުތަކަށް ބަލާއިރު ފާއިތުވި 24 ގަޑިއިރު ތެރޭގައި 5602 ސާމްޕަލް ވަނީ ޓެސްޓްކޮށްފައެވެ. މީގެތެރެއިން މާލެ ސަރަހައްދުން 51 ސާމްޕަލް ޕޮޒިޓިވްވެފައިވާއިރު އަތޮޅުތަކުން ޕޮޒިޓިވްވެފައިވަނީ 72 ސާމްޕަލެވެ. އަދި ހިނގަމުންދާ ރިސޯޓްތަކުން 15 ސާމްޕަލް ވަނީ ޕޮޒިޓިވްވެފައެވެ.

މިއާއެކު ރާއްޖެއިން މުޅި ޖުމްލަ 82،822 މީހުން ވަނީ ކޮވިޑަށް ޕޮޒިޓިވްވެފައެވެ. މީގެތެރެއިން 80،545 މީހުން ވަނީ ބަލިން ރަނގަޅުވެފައެވެ. މިވަގުތު އެކްޓިވް ކޭހުގެ ގޮތުގައި 2037 ކޭހެއް ވަނީ ރިޕޯޓްކޮށްފައެވެ. އޭގެތެރެއިން 17 މީހުންނަށް އަންނަނީ ހޮސްޕިޓަލްތަކުގައި އެޑްމިޓްކޮށްގެން ފަރުވާދެމުންނެވެ.

ރާއްޖޭގައި މިހާތަނަށް މިބަލީގައި 227 މީހުން ވަނީ ނިޔާވެފައެވެ.

ރާއްޖޭގައި އަތޮޅުތަކުން ޕޮޒިޓިވްވާ އަދަދު މިދޭތެރެއިން ދަށުގައި ހުރުމަށް އަނެއްކާވެސް އަންނަނީ މަތިވަމުންނެވެ. އެގޮތުން ސެޕްޓެމްބަރ މަހުގެ 7 ވަނަ ދުވަހު އަތޮޅުތަކުން 103 މީހުން ޕޮޒިޓިވްވެފައިވާއިރު ސެޕްޓެމްބަރ މަހުގެ 8 ވަނަ ދުވަހު އެއަދަދު ވަނީ 50ށް ތިރިވެފައެވެ. ސެޕްޓެމްބަރ މަހުގެ 9 ވަނަ ދުވަހު އަތޮޅުތަކުން 52 މީހުން ޕޮޒިޓިވްވިއިރު ސެޕްޓެމްބަރ މަހުގެ 10 ވަނަ ދުވަހު އަތޮޅުތަކުން ޕޮޒިޓިވްވެފައިވަނީ 56 މީހުންނެވެ. ސެޕްޓެމްބަރ މަހުގެ 11 ވަނަ ދުވަހު އަތޮޅުތަކުން 60 މީހުން ޕޮޒިޓިވްވެފައިވާއިރު ސެޕްޓެމްބަރ މަހުގެ 12 ވަނަ ދުވަހު މިއަދަދު ވަނީ 72ށް އަރާފައެވެ.

ރާއްޖޭގައި މިހާރު ކޮވިޑްގެ ނަންބަރުތައް ވަނީ ވަކި މިންވަރެއްގައި ހިފެހެއްޓިފައެވެ. ނަމަވެސް ކޮވިޑުން ރައްކާތެރިވުމަށް އަޅަންޖެހޭ ފިޔަވަޅުތަކަށް ސަމާލުކަން ދިނުމަށް އެޗްޕީއޭއިން އަންނަނީ އިލްތިމާސްކުރަމުންނެވެ.