ޔާމީނުގެ ސަޕޯޓަރުން ސުޕްރީމް ކޯޓު ކައިރީ މުޒާހަރާކޮށްފި
12 ސެޕްޓެމްބަރު 2021 | އާދީއްތަ 07:16ފުލުހުންގެ ބެރިކޭޑް ފޫއަޅުވާލާއި، ނުކިޔަމަންތެރިކަން ދައްކާފައިވޭ
އިދިކޮޅު ކޯލިޝަނުން ސުޕްރީމް ކޯޓު ސަރަޙައްދުގައި ކުރިއަށް ގެންދިޔަ މުޒާހަރާގެ ތެރެއިން
ކުރީގެ ރައީސް އަބްދުﷲ ޔާމީނުގެ ފަރާތުން ހުށަހަޅާފައިވާ އިސްތިއުނާފު މައްސަލަ ސުޕްރީމް ކޯޓުގައި ކުރިއަށްދާއިރު، އެމަނިކުފާނުގެ ސަޕޯޓަރުން ސުޕްރީމް ކޯޓު ސަރަޙައްދުގައި މުޒާހަރާކޮށްފިއެވެ.
ގާތްގަނޑަކަށް 150 މީހުން އެއްވެ ކުރިއަށްގެންދިޔަ މި މުޒާހަރާގައި ފުލުހުންގެ ބެރިކޭޑް ފޫއަޅުވާލާއި، ނުކިޔަމަންތެރިކަން ދައްކާފައިވެއެވެ. އެގޮތުން ނުކިޔަމަންތެރިކަން ދެއްކުމުގެ ސަބަބުން ދާންދޫ ދާއިރާގެ ކުރީގެ މެމްބަރު އަހުމަދު އަސްއަދު ފުލުހުންގެ ބެލުމުގެ ދަށަށް ގެންގޮސްފައިވެއެވެ. މި މުޒާހަރާގައި ޕީޕީއެމް/ޕީއެންސީގެ ލީޑަރޝިޕްގެ އިސް ބައެއް ބޭފުޅުން ވެސް ޙަރަކާތްތެރިވެފައިވެއެވެ.
މި މުޒާހަރާގެ ބައިވެރިން ވަނީ ސުޕްރީމް ކޯޓު ސަރަޙައްދަށް އެއްވެ، ރައީސް ޔާމީނު މިނިވަން ކުރުމަށް ގޮވާލާފައެވެ. އަދި ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙުގެ އިސްތިއުފާއަށް ވެސް ގޮވާފައިވެއެވެ.
އާދިއްތަ ދުވަހު ސުޕްރީމް ކޯޓުގައި ކުރިއަށްދިޔަ އަޑުއެހުމަކީ ރައީސް ޔާމީނުގެ މައްޗަށް އިއްވާފައިވާ ޖަލު ޙުކުމަށް ހައިކޯޓުންވެސް ތާއީދު ކުރުމުން، ސުޕްރީމް ކޯޓަށް ހުށަހަޅާފައިވާ އިސްތިއުނާފީ މައްސަލައެކެވެ. އެގޮތުން ރައީސް ޔާމީނުގެ ފަރާތުން 22 އިސްތިއުނާފީ ނުކުތާއެއް ހުށަހަޅާފައިވާއިރު، އޭގެ ތެރެއިން 7 ނުކުތާ ވަނީ ތަފްސީލު ކޮށްދީފައެވެ. ބާކީ ހުރި ނުކުތާތަކަށް ވާހަކަ ދެއްކުމަށް ހޯމަ ދުވަހު ވެސް އަޑުއެހުމެއް ބޭއްވުމަށް ވަނީ ތާވަލުކޮށްފައެވެ.
