ކ. މާލެ
|
21 މެއި 2017 | އާދީއްތަ 21:29
ރައީސް ޓްރަމްޕް ސައުދީއަށް ވަޑައިގަތީ ހޮނިހިރު ދުވަހު މިއީ އެމަނިކުފާނުގެ ފުރަތަމަ ރަސްމީ ދަތުރުފުޅު
ރައީސް ޓްރަމްޕް ސައުދީއަށް ވަޑައިގަތީ ހޮނިހިރު ދުވަހު މިއީ އެމަނިކުފާނުގެ ފުރަތަމަ ރަސްމީ ދަތުރުފުޅު
ގެޓީ އިމޭޖަސް
ރައީސް ޓްރަމްޕް ސައުދީގައި
ޓްރަމްޕްގެ ސައުދީ ދަތުރުފުޅާ ގުޅޭ އާދަޔާ ޚިލާފު ކަންކަން
 
މުސްލިމުންނަށް އިސްލާމް ދީނާ ބެހޭ ތަގުރީރު ކުރެއްވުން
 
ސައުދީގެ ސަގާފީ ކެއުން ފަރީއްނުކުޅުއްވާ
 
ރަން އެސްކަލޭޓަރ ބޭނުން ކުރެއްވި

ރައީސް ކަމުގެ މަގާމާ ހަވާލުވެ ވަޑައިގަތުމަށްފަހު ކުރައްވާ ފުރަތަމަ ރަސްމީ ދަތުރުފުޅުގައި ރައީސް ޓްރަމްޕްގެ ފުރަތަމަ މަންޒިލަކަށްވީ ސައުދީ އަރަބިއްޔާއެވެ. ސައުދީ އަރަބިއްޔާއަށް އެމަނިކުފާނު ވަޑައިގަތީ ހޮނިހިރު ދުވަހުއެވެ. ސައުދީއަށް ވަޑައިގަތުމުން ރައީސް ޓްރަމްޕަށް ސައުދީ ރަސްގެފާނުވަނީ ހޫނު މަރުހަބާއެއް ދަންނަވާފައެވެ.

މި ތާރީޚީ ދަތުރުފުޅު ފެއްޓެވުމާއެކު ދުނިޔޭގެ މީޑިއަގެ ސަމާލުކަން ވަރަށް ބޮޑަށް ދަތުރުފުޅުގެ ކަންކަމަށް އަމާޒުވެގެން ގޮސްފައިވާކަން ފާހަގަ ވެއެވެ. ސޯޝަލް މީޑިއާގެ ހަރަކާތްތެރިންވެސް ހަމަ އެފަދައެވެ.

ރަސްމީ އެޖެންޑާގެ އިތުރުން ރައީސް ޓްރަމްޕްގެ ދަތުރުފުޅުގެ އަރިމަތީ ސުރުޚީގައި ލިޔެވެމުންދާ އަދި ދުނިޔޭގެ މީޑިއާގެ ސަމާލުކަން ހޯދަމުންދާ ބައެއް ކަންކަމަށް ބަލާލާނަމެވެ.

ރަން އެސްކަލޭޓަރ ބޭނުން ކުރެއްވުން

ބްލޫމްބާރގް ގެ ވައިޓްހައުސް ރިޕޯޓަރ ޖެނިފަރ ޖޭކޮބްސް އަށް ރައީސް ޓްރަމްޕް ރަން އެސްކަލޭޓަރ އަކުން ވަޑައިގަންނަވަނިކޮށް ފެނިފައިވެއެވެ. ޖެނިފަރ ކޮށްފައިވާ ޓްވީޓެއްގައި ބުނެފައިވަނީ، ރައީސް ޓްރަމްޕް އެސްކަލޭޓަރ އިން ވަޑައިގަންނަވަނިކޮށް ތިމަންނާ ފެނިވަޑައިގަތުމުން އަތްޕުޅުގެ އިޝާރާތުން "ތަމްބްސް އަޕް" ދެއްވި ކަމަށެވެ.

 

 

ސައުދީ ރަސްގެފާނު ސަލްމާން ބިން އަބްދުލް އަޒީޒް އާއި ރައީސް ޓްރަމްޕްއަކީ އަގުބޮޑު ދިރިއުޅުއްވުމަށް ލޯބި ކުރައްވާ ދެބޭފުޅުންނެވެ. ކޮންމެ ބޭފުޅަކުވެސް ރަން އެސްކަލޭޓަރ ބައްލަވައިގަނެ ބޭނުންފުޅު ކުރައްވައެވެ. މިއަހަރުގެ މާޗު މަހު ސައުދީ ރަސްގެފާނު ދެ ރަން އެސްކަލޭޓަރ ބައްލަވައިގަތެވެ. ޓަރަމްޕް ޓަވަރ ގައި ޓްރަމްޕްވެސް ރަން އެސްކަލޭޓަރ ބޭނުން ކުރައްވައެވެ.

 

ސައުދީއަށް ވަޑައިގަތް އިރު އަނބިކަނބަލުން ހުންނެވީ ބުރުގާ ތުރުނުކުރައްވާ

ސައުދީ އަރަބިއްޔާއަކީ ޚާއްސަކޮށް އަންހެނުން ހެދުން އެޅުމުގައި ހަރުކަށި އުސޫލުތަކެއް ތަންފީޒް ކުރާ ގައުމެކެވެ. މިކަން މިހެން އޮއްވާ ރައީސް ޓްރަމްޕްގެ އަނބިކަނބަލުން ފެނިގެން ދިޔައީ ބުރުގާ ތުރުނުކުރައްވާ ހުންނަވަނި ކޮށްނެވެ. މިވާހަކަ ދުނިޔޭގެ މީޑިއާގައިވެސް ފުދޭވަރަކަށް ދެކެވުނެވެ. ސައުދީ ފޮރިން މިނިސްޓަރ ވިދާޅުވެފައިވަނީ ކޮންމެ ފެޝަނެއްގައި އެކަމަނާ ވަޑައިގަތަސް ސައުދީން މަރުހަބާ ކިޔާނެ ކަމަށެވެ. ހަގީގަތުގައި ޓްރަމްޕްގެ އަނބިކަނބަލުން ބުރުގާ ތުރުނުކުރައްވާ މައްސަލަ މައްސަލައަކަށް ވަނީ ޚުދު ޓްރަމްޕްގެ ސަބަބުންނެވެ. އެއީ ކުރިން އެމެރިކާގެ ރައީސް ކަމުގައި ހުންނެވި އޮބާމާ 2015 ގައި ސައުދީއަށް ކުރެއްވި ދަތުރުފުޅުގައި އެމަނިކުފާނުގެ އަނބިކަނބަލުން މިޝޭލް ބުރުގާ ތުރުނުކުރައްވާ ހުންނެވުމުން އެކަމަށް ޓްރަމްޕް ފާޑު ވިދާޅުވެފައި ވުމެވެ. އެއީ ސައުދީ އަރަބިއްޔާއަށް ކުރި އިހާނެތި ކަމެއްގެ ގޮތުގައި އެމަނިކުފާނު ސިފަ ކުރައްވާފައި ވުމެވެ. އެވާހަކަ ފުޅު ހަނދުމަފުޅު ނެތި ޓްރަމްޕަށް ވަޑައިގެންނެވުނީ އަނބިކަނބުލުން އިސްތަށިފުޅުގައި ބުރުގާ ތުރުނުކުރައްވައެވެ.

 

 

ރައީސް ޓްރަމްޕްގެ ފޮޓޯފުޅު ހުރިހާ ތަނެއްގައި

ރައީސް ޓްރަމްޕްގެ ފޮޓޯފުޅު ނެތް ތަނެއް ސައުދީ އަރަބިއްޔާ އިން ނުފެންނަ ކަމަށް ބައެއް ރިޕޯޓަރުން ފާހަގަ ކޮށްފައިވެއެވެ. ބޮޑެތި މަގުތަކާއި ހައިވޭ ތަކުގައި ރައީސް ޓްރަމްޕްއާއި ސައުދީ ރަސްގެފާނުގެ ބޮޑެތި ބިލްބޯޑުތައް ހުރީ ބަހައްޓާފައެވެ. އެއް ރިޕޯޓަރަކު ބުނެފައިވަނީ މި މަންޒަރުތައް ފެނުމުން ބޯ ގޮވައިފި ކަމަށެވެ.

 

ސައުދީ އަރަބިއްޔާގެ ސަގާފީ ކެއުންތައް ޓްރަމްޕް ފާރީއްނުކުޅުއްވާ

މި ދަތުރުފުޅުގައި ރައީސް ޓްރަމްޕް ބޭނުންފުޅުވަނީ ސައުދީ ސަގާފީ ކެއުންތަކުގެ ރަހަ ބެއްލެވުމުގެ ބަދަލުގައި އެމަނިކުފާނު އެންމެ ފަރީއްކުޅުއްވާ ހިތްޕުޅުވާ ކާނާއަށް އިންސާފު ކުރެއްވުމަށެވެ. ޓްރަމްޕް ފަރިއްކުޅުވާނީ ސްޓޭކް އާއި ކެޗްއަޕްއެވެ.

 

މުސްލިމުންނަށް އިސްލާމް ދީނާ ބެހޭ ތަގުރީރު ކުރެއްވުން

ޓަރަމްޕްގެ މި ދަތުރުފުޅުގެ އެންމެ މުހިންމު އައިޓަމަކީ، މުސްލިމުންނަށް އެމަނިކުފާނު ދެއްވާ ތަގުރީރެވެ. އެމެރިކާއަށް މުސްލިމުން އެތެރެވުން މަނާ ކުރާ ގަރާރުގައި ސޮއި ކުރެއްވި ރައީސް ޓްރަމްޕް އިސްލާމް ދީނާ ބެހޭ ގޮތުން މުސްލިމް ގައުމުތަކުގެ ވެރިންނަށް އަމާޒުކުރައްވާ ތަގުރީރެއް ދެއްވަން ހަމަޖެހުމަކީވެސް ގިނަ ބަޔަކު ނިތް އަރުވާލި ކަމެކެވެ. 2016 ވަނަ އަހަރުގެ މާޗްމަހު ސީއެންއެން ގައި ވާހަކަފުޅު ދައްކަވަމުން އިސްލާމް ދީނަކީ ތިމަންނާމެންނާ ނަފްރަތު ކުރާ ދީނެއް ކަމަށްވެސް ޓްރަމްޕް ވަނީ ވިދާޅުވެފައެވެ. އަދި މާ އާދަޔާ ޚިލާފު އެހެން ކަމެކެވެ. މުސްލިމް އުއްމަތައް އަމާޒު ކުރައްވާ އެމަނިކުފާނު ދެއްވާ ތަގުރީރު ލިޔުނީ ސްޓެފަން މިލަރ އެވެ. މިލަރ އަކީ މުސްލިމުން އެމެރިކާއަށް އެތެރެވުން މަނާ ކުރާ ސިޔާސަތުވެސް ލިޔުނު ފަރާތެވެ.

 

ދަތުރުފުޅު ކުރިއަށް

މިއީ ރައީސް ޓްރަމްޕް ބޭރު ގައުމުތަކަށް ކުރައްވާ ފުރަތަމަ ޒިޔާރަތުގެ ފުރަތަމަ މަންޒިލެވެ. މުސްލިމުންގެ އެންމެ މުގައްދަސް ބިމުގައި އެ ބިމުގެ ވެރިންގެ މެހުމާނެއްގެ ގޮތުގައި ހުންނެވުމަށްފަހު އެތަނުން ފުރާވަޑައިގެން ދެން ވަޑައިގަންނަވާނީ، ނަސާރާއިންގެ ބޮޑު ފާދިރީ ޕޯޕް ފްރޭންސިސް އާ ބައްދަލު ކުރައްވާށެވެ.

 

 

 

އެންމެ ފަހުން އަޕްޑޭޓް ކުރީ: 3 ހަފްތާ ކުރިން
ރިވިއު ކުރީ: ދެލިކޮޕީ
0%
0%
0%
0%
0%
0%
ކޮމެންޓް