އިދިކޮޅު ކޯލިޝަންގެ މުޒާހަރާގައި ފުރަތަމަ ފަހަރަށް ކުރީގެ ނައިބު ރައީސް ޖިހާދު

އިދިކޮޅު ކޯލިޝަންގެ މުޒާހަރާގައި ފުރަތަމަ ފަހަރަށް ކުރީގެ ނައިބު ރައީސް ޢަބްދުﷲ ޖިހާދު ބައިވެރިވެވަޑައިގެންފިއެވެ.

"އިންސާފު ހޯދަން" މިނަމުގައި ހުކުރު ދުވަހު އިދިކޮޅު ކޯލިޝަނުން ކުރިއަށްގެންދާ މުޒާހަރާގެ ކުރީ ސަފުގައި ޖިހާދު ގެންދަވަނީ ބައިވެރިވެވަޑައިގަންނަވަމުންނެވެ. މިއީ ޖިހާދު މުޒާހަރާއެއްގައި ބައިވެރިވެވަޑައިގަންނަވާ ފުރަތަމަ ފަހަރެވެ.

މި މުޒާހަރާގައި ވާހަކަފުޅުދައްކަވަމުން ޖިހާދު ވިދާޅުވީ، އެމަނިކުފާނު ސިޔާސީ މުޒާހަރާއަކަށް ނުކުމެވަޑައިގަތީ މި ސަރުކާރުގައި އެމަނިކުފާނަށް އަނިޔާ ދެއްވާތީ ކަމަށެވެ. އަދި އިހުސާސްފުޅު ވަނީ ކަރުގައި ހަންޖަރު ޖައްސާފައި ހުރިހެން ކަމަށެވެ.

ޖިހާދު ވިދާޅުވީ، އެމަނިކުފާނު ދައުލަތަށް ހިދުމަތް ކުރައްވާތާ 35 އަހަރުވެފައިވާ ކަމަށާއި، އެމަނިކުފާނު ފުރަތަމަ ފަހަރަށް ކޯޓަށް ގެންދަން ފެށީ މި ސަރުކާރުން ކަމަށެވެ. ޖިހާދު ވިދާޅުވީ، އެމަނިކުފާނު ބޭސްފަރުވާއަށް ވަޑައިގަތުމުން މަޙުރޫމްކޮށްފައިވާ ކަމަށާއި، ދަރިން ކައިރިއަށް ވަޑައިގަތުމުންވެސް މަޙުރޫމް ކޮށްފައިވާ ކަމަށެވެ. އަދި މަގުމައްޗަށް ނުކުމެވަޑައިގަތީ އިންސާފު ހޯއްދެވުމަށްކަމަށެވެ.

ޕީޕީއެމް އޮފީސް ސަރަހައްދުގައި ކުރިއަށްގެންދާ މި މުޒާހަރާގެ ބައިވެރިންނަށް ތާއީދު ކުރުމުގެ ގޮތުން ކުރީގެ ރައީސް ޢަބްދުﷲ ޔާމީން ޢަބްދުލް ޤައްޔޫމްވެސް ވަނީ އެމަނިކުފާނު ބަންދުގައި ހުންނެވި ގެކޮޅުގެ ކުޑަދޮރުން ބައްލަވާލައްވާފައެވެ. އެމަނިކުފާނު ފުރަތަމަ ކުޑަދޮރު ކައިރީގައި މަޑުކޮށްގެން ހުންނެވިއިރު، ފަހުން ފެނިވަޑައިގެންނެވީ، ބައިވެރިންނަށް ހިތްވަރު ދެއްވުމުގެ ގޮތުން ޕީޕީއެމް ދިދައަކާއި، ރާއްޖޭގެ ރަސްމީ ދިދަ ނަންގަވައިގެން ހޫރުއްވާ މަަންޒަރެވެ.