ރައީސް ޔާމީނާއެކު ދުވަހަކުވެސް ސިޔާސީ މަސައްކަތެއް ނުކުރާނަން - ނާޒިމް
10 ސެޕްޓެމްބަރު 2021 | ހުކުރު 10:58އަނިޔާއެއް ދެއްވަން ޖެހިވަޑައިގެންނެވި ހަގީގީ ސަބަބު މިއަދާ ހަމައަށް ވެސް އެނގިވަޑައި ނުގަންނަވާ
މުހައްމަދު ނާޒިމް / ރައީސް ޔާމީނަށް ހިތް ބަރު ކަމެއް ނެތް
ކުރީގެ ރައީސް ޔާމީން އަބްދުލްގައްޔޫމާއެކު ދެން ދުވަހަކު ވެސް ސިޔާސީ މަަސައްކަތްޕުޅެއް ނުކުރައްވާނެ ކަމަށް ކުރީގެ ޑިފެންސް މިނިސްޓަރު ކާނަލް މުހައްމަދު ނާޒިމް ވިދާޅުވެއްޖެއެވެ.
ނާޒިމް މިހެން ވިދާޅުވީ، އޮންލައިން މީޑިއާއެއްގައި ކުރިއަށްގެންދާ ޕްރޮގްރާމެއްގައި ވާހަކަދައްކަވަމުންނެވެ. ނާޒިމް ވިދާޅުވީ، އެމަނިކުފާނު ޑިފެންސް މިނިސްޓަރުކަމުގައި ހުންނަވަނިކޮށް ގެކޮޅުން ފިސްތޯލެއް ފެނުނު ކަމަށް ބުނާ މައްސަލައަށްފަހު ތިން އަހަރާއި ބައި ޖަލުގައި ހޭދަ ކުރައްވަން ޖެހިވަޑައިގެންނެވީ އެއްވެސް ކުށެއް ކުރައްވައިގެން ނޫން ކަމަށެވެ. އެއީ ލިބިވަޑައިގެން ވަރަށް ބޮޑު އަނިޔާއެއް ކަމަށާއި، އެހެންނަމަވެސް އެކަމަށް ރައީސް ޔާމީނަށް މައާފު ކުރައްވާ ކަމަށެވެ. އަދި ބަރު ހިތެއް ނެތް ކަމަށް ވިދާޅުވިއެވެ.
އެހެންނަމަވެސް ރައީސް ޔާމީނާއެކު ދެން ދުވަހަކުވެސް ސިޔާސީ މަސައްކަތެއް ނުކުރައްވާނެ ކަމަށް ނާޒިމް ތަކުރާރުކޮށް ވިދާޅުވިއެވެ. ނާޒިމް ވިދާޅުވީ، ކުރީގެ ރައީސް ޔާމީނަކީ، އަލުން ވެރިކަމަށް ގެނައުމަށް ކުފޫ ހަމަވާ ބޭފުޅެއް ނޫން ކަމަށެވެ. އަދި ކުރީގެ ރައީސް ޔާމީނަކީ، ރާއްޖޭގެ ސިޔާސީ މަސްރަހުގައި މަސައްކަތް ކުރައްވަން ވެސް އެކަށީގެންވާ ބޭފުޅެއް ނޫންކަމަށް ނާޒިމް ވިދާޅުވިއެވެ.
ނާޒިމް ވިދާޅުވީ ފިސްތޯލައެއް ގެންގުޅުއްވި ކަމަށް ވިދާޅުވެ ފްރޭމް ކުރައްވައި، އެވަރުގެ އަނިޔާއެއް ދެއްވަން ޖެހިވަޑައިގެންނެވި ހަގީގީ ސަބަބު މިއަދާ ހަމައަށް ވެސް އެނގިވަޑައި ނުގަންނަވާ ކަަމަށެވެ. އަދި އެ ކަމުގެ ހަގީގަތް ހޯއްދަވަން ވަރަށް ބޭނުންފުޅުވާ ކަމަށާއި، އެކަމުގެ ތަހުގީގު އަދިވެސް ކުރިއަށް ގެންގޮސް ދެއްވުމަށް ފުލުހުންގެ ކިބައިން ވެސް އެދިވަޑައިގެންނެވި ކަމަށެވެ.
ނާޒިމް ވިދާޅުވީ އެމަނިކުފާނުގެ ނަޒަރުގައި އެކަން ހިނގަން މެދުވެރި ސަބަބަކީ، ޑިފެންސް މިނިސްޓްރީ އާއި އެލްޖީއޭ އަދި އިމިގްރޭޝަންގެ އިތުރުން ވަގުތީ ގޮތުން ހެލްތު މިނިސްޓްރީ ހިންގެވުމުގެ ޒިންމާ އޭނާއާ ހަވާލު ކުރެއްވުމުން ރައީސް ޔާމީން އެދިވަޑައިގެންނެވި މިންވަރަށް ނުވަތަ އެއަށްވުރެ މާ ރަނގަޅަށް ވެސް އެ ޒިންމާތައް އަދާ ކުރެއްވުމުން ކަމަށެވެ. އަދި ފެނުގެ ކާރިސާ ފަދަ ހާދިސާތަކުގެ ވަގުތު ވަރަށް އިސް ދައުރެއް އަދާކުރައްވަން ޖެހިވަޑައިގަތުމުން ވަރަށް ގިނައިން ޓީވީން ފެނުނު ފެނުން ކަމަށެވެ. އެކަން އެހެން ވެގެން ދާތަން ބަލަން ރައީސް ޔާމީންގެ އަރިހުގައި ތިއްބެވި ބައެއް ބޭފުޅުންނަށް އުނދަގޫވެވަޑައިގެންނެވިކަން އެނގިވަޑައިގެންނެވި ކަމަށް ނާޒިމް ވިދާޅުވިއެވެ. އަދި ނާޒިމަކީ ރައީސް ޔާމީނަށް 2018 ގައި ކުރިމަތިވާނެ އެންމެ ބޮޑު ބިރު ކަމަށް ބައެއް ބޭފުޅުން ވިސްނަވައި ދެއްވަމުން ގެންދެވި ކަމަށެވެ.
ނާޒިމް ވިދާޅުވީ ފްރޭމް ކުރައްވައި ޖަލަށް ލެއްވުން އަދި ތިން އަހަރާ ބައިގެ މުއްދަތަށް ޖަލުގައި ހުންނެވުމަކީ ކިހާ ބޮޑު އަނިޔާއެއްކަން އޭރު އެނގިވަޑައިނުގެންނެވި ނަމަވެސް މިހާރު ރައީސް ޔާމީނަށް އެކަން ވަރަށް ރަނގަޅަށް އެނގިވަޑައިގަންނަވާނެ ކަމަށެވެ. އަދި އެ ދުވަހު އޭނާ އޮންނެވީ ހޫނު ކުޑަ ގޮޅިއެއްގައި ނަމަވެސް ޖަލުގައި ފިނި ކޮޓަރީގައި ހުންނަވަން ޖެހިވަޑައިގަތުމުގެ ވޭން ވެސް މިހާރު އިހުސާސް ކުރެއްވޭނެ ކަމަށެވެ. އަދި ވިދާޅުވީ ރައީސް ޔާމީނަށް ވެސް އަދި އެހެން މީހަކަށް ވެސް އެފަދަ އަނިޔާއެއް ލިބިވަޑައިގަތުމަށް އެދިވަޑައިނުގަންނަވާނެ ކަމަށެވެ. ނާޒިމް ވިދާޅުވީ، ޑިފެންސް މިނިސްޓަރު ދިރިއުޅުއްވާ ގެކޮޅަށް ރައީސުލްޖުމްހޫރިއްޔާ އަށާއި ޕޮލިސް ކޮމިޝަނަރަށް ނާދެވޭނެ ކަމަށެވެ. އެއީ ބުއްދީގެ ހަމަތަކުން ބަލާއިރު ގަބޫލުކުރެވޭނެ ކަމެއް ނޫން ކަމަށެވެ. އެދުވަހު އެކަން ހިނގި އިރު ރައީސް ޔާމީން ދެނަހުރި ކަމަކަށް ނުވި ނަމަވެސް، މިއަދު އެމަނިކުފާނަށް ޖެހިވަޑައިގެންފައިވާ ހާލުން އެއީ ކިހާ ވޭން ހުރި ކަމެއް ކަން އެނގިވަޑައިގަންނަވާނެ ކަމަށެވެ. އެހެންނަމަވެސް މިއަދުވެސް ރައީސް ޔާމީނަށް ބަރު ހިތެއް ނެތް ކަމަށް ނާޒިމް ވިދާޅުވިއެވެ.
ނާޒިމް މިހާރު އުޅުއްވަނީ އެމްއެންޕީގެ ނަމުގައި އަމިއްލަފުޅު ސިޔާސީ ޕާޓީއެއް އުފައްދަވައި އަންނަ ރިޔާސީ އިންތިޚާބުގައި ވާދަކުރެއްވުމުގެ މަސައްކަތްޕުޅުގައެވެ.
