ހޮސްޕިޓަލްތަކުގައި އެޑްމިޓްކުރާ މީހުންގެ އަދަދު ދަށަށް، އިތުރު 111 މީހުން ކޮވިޑަށް ޕޮޒިޓިވް
މިވަގުތު 13 މީހަކަށް އަންނަނީ ހޮސްޕިޓަލްތަކުގައި އެޑްމިޓްކޮށްގެން ފަރުވާދެމުން
ކޮވިޑް އަށް ޓެސްޓު ކުރުމަށް ސާމްޕަލް ނެގުން
ފާއިތުވި 24 ގަޑިއިރު ރާއްޖެއިން ކޮވިޑަށް ޕޮޒިޓިވްވެފައިވަނީ 111 މީހުންކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ)ން ބުނެފިއެވެ.
ފާއިތުވި 24 ގަޑިއިރު ވަނީ 5526 ސާމްޕަލް ޓެސްޓްކޮށްފައެވެ. މީގެތެރެއިން 54 ސާމްޕަލް މާލެ ސަރަހައްދުން ޕޮޒިޓިވްވެފައިވާއިރު އަތޮޅުތަކުން ޕޮޒިޓިވްވެފައިވަނީ 52 ސާމްޕަލެވެ. އަދި ރިސޯޓްތަކުން 5 ސާމްޕަލް ވަނީ ޕޮޒިޓިވްވެފައެވެ.
މިއާއެކު ރާއްޖެއިން ކޮވިޑަށް ޕޮޒިޓިވްވި މީހުންގެ ޖުމްލަ އަދަދު ވަނީ 82،475ށް އަރާފައެވެ. މީގެތެރެއިން މިވަގުތު އެކްޓިވް ކޭހުގެ ގޮތުގައި ގުނަމުންދަނީ 2081 ކޭހެވެ. 80،154 މީހުން ވަނީ ބަލިން ރަނގަޅުވެފައެވެ.
މިވަގުތު 13 މީހަކަށް އަންނަނީ ހޮސްޕިޓަލްތަކުގައި އެޑްމިޓްކޮށްގެން ފަރުވާދެމުންނެވެ. މިހާތަނަށް 227 މީހަކު ވަނީ މިބަލީގައި ނިޔާވެފައެވެ.
އޮގަސްޓް މަހުގެ 30ގެ ފަހުން ރާއްޖޭގައި ކޮވިޑަށް ޕޮޒިޓިވްވީ މީހުންގެ އަދަދު 150ން އައީ ރިޕޯޓްކުރަމުންނެވެ. އޭގެފަހުން ސެޕްޓެމްބަރ މަހުގެ 6 ވަނަ ދުވަހު އެއަދަދު ވަނީ 150ން ދަށްވެފައެވެ.
އަދި ފާއިތުވި ބުދަ އަދި ބުރާސްފަތި ދުވަހުވެސް ކޮވިޑަށް ޕޮޒިޓިވްވި އަދަދު ވަނީ ދަށްވެފައެވެ. މީގެއިތުރުން ހޮސްޕިޓަލްގައި އެޑްމިޓްކުރާ މީހުންގެ އަދަދުވެސް ވަނީ ދަށަށްދާން ފަށާފައެވެ. އެގޮތުން ސެޕްޓެމްބަރ މަހުގެ 4 ވަނަ ދުވަހު 27 މީހުން ހޮސްޕިޓަލްތަކުގައި އެޑްމިޓްކުރިއިރު ސެޕްޓެމްބަރ މަހުގެ 5 ވަނަ ދުވަހު 23 މީހުން އެޑްމިޓްކުރިއިރު ސެޕްޓްމެބަރ މަހުގެ 6 ވަނަ ދުވަހު 20 މީހުން އަދި ސެޕްޓެމްބަރ މަހުގެ 7 ވަނަ ދުވަހު 16 މީހުން ވަނީ އެޑްމިޓްކޮށްފައެވެ. ސެޕްޓެމްބަރ މަހުގެ 8 ވަނަ ދުވަހު 17 މީހުންނަށް އެޑްމިޓްކޮށްގެން ފަރުވާދިންއިރު ސެޕްޓެމްބަރ މަހުގެ 9 ވަނަ ދުވަހު 13 މީހުން ވަނީ އެޑްމިޓްކޮށްފައެވެ.
