ކޯރަމް ހަމަނުވެގެން ގައުމީ މަޖިލިސް ނުބޭއްވުނު
9 ސެޕްޓެމްބަރު 2021 | ބުރާސްފަތި 03:35ކޯރަމް ހަމަވާނީ 37 މެމްބަރުން ޖަލްސާއަށް ހާޒިރުވެގެން
އެމްޑީޕީގެ ގައުމީ މަޖިލިސް ޖަލްސާއެއްގެ ތެރެއިން
ބުދަ ދުވަހުގެ ރޭ ބޭއްވުމަށް މަސައްކަތްކުރި އެމްޑީޕީގެ ޤައުމީ މަޖިލީހުގެ ޖަލްސާ ކޯރަމް ހަމަނުވެގެން ނުބޭއްވުނެއެވެ.
އެމްޑީޕީގެ ޤައުމީ މަޖިލިސްގެ ޖަލްސާ ބޭއްވުމަށް ހަމަޖެހިފައި އޮތީ ޖަމާލުއްދީން ސްކޫލުގައެވެ. ނަމަވެސް މިޖަލްސާއަށް ހާޒިރުވި މެމްބަރުންގެ އަދަދު މަދުވެގެން ޖަލްސާވަނީ ކެންސަލްކޮށްފައެވެ. މީގެ ކުރިންވެސް ކޯރަމް ހަމަނުވެގެން ޖަލްސާ ވަނީ ކެންސަލްކޮށްފައެވެ.
ގައުމީ މަޖިލީހުގައި ޖުމްލަ 146 މެމްބަރުން ތިބެއެވެ.
އެމްޑީޕީގެ ޤައުމީ މަޖިލީހުގެ ޖަލްސާއެއް ބޭއްވެނީ އެޕާޓީގެ އަސާސީ ޤަވާއިދު ބުނާގޮތުން، ޤައުމީ މަޖިލީހަށް ހާޒިރުވާންޖެހޭ ޝަރުތު ހަމަވާ މެމްބަރުންގެ ތެރެއިން ހަތަރުބައި ކޮށްފައި އެއްބަޔަށްވުރެ ގިނަ މެމްބަރުން ހާޒިރުވެގެންނެވެ. ކޯރަމް ހަމަވާން 37 މެމްބަރުން ޖަލްސާއަށް ހާޒިރުވާން ޖެހެއެވެ. މިހާރު ގައުމީ މަޖިލީހުގެ ޖަލްސާތައް ބޮޑަށް ބިނާވެފައި އޮންނަނީ، ރައީސް ނަޝީދަށް ދިން ހަމަލާގެ މައުލޫމާތު އެމްޑީޕީގެ މެއި 6 ކޮމެޓީން ހިއްސާކުރުމަށެވެ. މިކަމަށް ފާސްކުރީ ވެސް ގައުމީ މަޖިލީހުގެ ޖަލްސާއެއްގައެވެ. ކޮންމެ ހަފްތާއަކު އެއްފަހަރު ޖަލްސާއެއް ބާއްވައި އެ މައުލޫމާތު ހިއްސާކުރުމަށް ވަނީ ނިންމާފައެވެ.
މިހާރު އޮތް އެމްޑީޕީގެ ޤައުމީ މަޖިލީހުގެ މެމްބަރުންގެ ދައުރު ހަމަވެފައި ވީނަމަވެސް އައު މެމްބަރުން އިންތިޚާބު ކުރާނީ މި މަހުގެ 25 ވަނަ ދުވަހު ބޭއްވުމަށް ހަމަޖެހިފައިވާ އެމްޑީޕީގެ ޤައުމީ މަޖިލީހުގެ އިންތިޚާބުންނެވެ.
